Alubad. 35 - Fanawbuid tagsibaliwas Fakayabian

Alubad 35 Darangin laman Get Gubuk

Dabid at nariruk

¹ Yawi, fabadbaboani ku ngay fabadbaboan. Ay fawayani ku ngay fawayan.

² Bubai am famalabag ay gubuki angku.

³ Falganani am ngay bangko ay salubangi ngay taw tagfafalo angku. Ay longi sa angku te, “Au wan tagfababo emu.”

⁴ Ngay taw nangus at ke algan namabul angku umkapla wan. Ay salagi ngay taw at ke algan mauri sa angku.

⁵ Yawi, nu setain tagmara nu gfalayug ngay upa, katanya yangay nangus am tagbarita nu gfafalo kanya fag ngay taw mauri.

⁶ Gina nangus am tagbarita gfafalo anya fagayu, kanya nangus fagayu at dalan umdulum ay umsik madangsal.

⁷ Deyud au e asalanan, kanya fagayu nafasangdawan ay nalusung laman nanggamat angku.

⁸ Fagidapun nangus umdasug sa anya fagayu gina yud mafalganan. Kanya way ban nangus fagayu at kumsangdaw sat nafasangdawan, ay kanya yangay ban nangus at kumtong sat nalusung.

⁹ Yawi, nu katanya, guseganan au sa emu, aroro nafalangfe tuo angku.

¹⁰ Sas fagdaul ku amatanganan guro au te, “Yawi, o wan tagtungud sas fagayu. O wan ngay taw at yud e kwa ay tagafalingunan at tagfalangfe siginan takamalingun fag ngay taw.”

¹¹ E ngay taw tagfatuyan at yud matuyan sabaliwa angku. Kanya fagayu gfantabugan sa angku ku fagyudun saful fag asalanan.

¹² Ku ngay nafakamulun dewa masine, kanya fagayu at famasud sa angku at mauri way, nu katanya, maksvn nu kabalu au.

¹³ Dewa katanya, kanya ngap fagayu nu nke fakasaitun, kabalu au. Galanbungan au saku ay kwa gfangon laman gdarangin. Ay nu dway o nabalus ku darangin,

¹⁴ maksvn nu kabalu au, kata ku fagadgalangan ay ku faduksay nu nke fakasaitun. Ay grungan au glao kabalu, kata ku mina nu nbul.

¹⁵ Dewa katanya, nu au ngap at kinke fagidapun, kanya fagayu maful kadkasean, ay guseganan gfawayan angku. Ay anggan ku fagyudun toglag fag ngay taw nanangalo, ay kanya fagayu gfalingun gugat angku.

¹⁶ Kanya fagayu nu gfalingun angku we fakafanyun ya ay at kaksvnan nu kadotama gfaringgit at ngay bagang.

¹⁷ Ku Fun Dius, wain am fagdamaun lang angku? Gubuki angku siginan kafag ngay taw takamauri, kata ngay liun tagfangagat nu kaylat wan nanyukfu. Falangfei angku, aroro ku leleg sadi way!

¹⁸ Nu katanya, gfauseganan au ay gseg emu sis fagngayuan taw.

¹⁹ E ngay taw gfawayan angku deyud au e malong. Lag o kaylat kafag ngay taw nu guseganan aroro nababawan au. Ay lag yangay kaylat kanya fagayu nu gfalingun angku deyud au e malong.

²⁰ Kanya fag ngay taw at ngay longan kabavn we matuyan ya, abat ngate, gfauri way ngay taw tagugali at matuyan.

²¹ Kanya fagayu guro gfantabugan sa angku te, “Anud! Nalag ami am ngay nafakamulun!”

²² Yawi, saful way o takatanya fagayu. Ku Fun, lag maragangan ay lag gubun angku.

²³ Ku Dius, ku Fun, falganani ay fawayani laman sa angku!

²⁴ Yawi, ku Dius, matuyan nu gfawabilugan o, nu katanya, foyungi sa anya fagayu te, kdi e asalanan. Ay lag kaylat kanya fagayu nu kase angku.

²⁵ Lag kaylat kanya fagayu nu glong sat ngay sadili te, “Katsi, anfasludan wan em fakaylatun, aroro nafamin wami anya!”

²⁶ Nangus ngay taw takamatungudun ay taguseganan gina au e fagidapun umkapla nangus fia. Ay umkapla yangay nangus ngay taw tagamatangan te, kwe tungkul.

²⁷ Ngay taw nangus at nasaful te, kwe asalanan, guro guseganan aroro sa ku nababoan, ay kanya nangus fagayu glong gugat te, “Segi Yawi, aroro kanya gfalangfe tua at ngay fagsuguan.”

²⁸ Namasure au sa sangay taw am fagmatuyanun, ay gfauseganan au emu fagngabak menit.