Alubad. 21 - Fanawbuid tagsibaliwas Fakayabian

Alubad 21 Guseganan aroro sat Nababoan

Laman sa tagfangguna alubad: Dabid at alubad.

¹ Yawi, am nafili fag fun guseganan, aroro nafon tuo anya at fagmabitsugun. Ay kanya gfanagsag mandi, aroro nafababo tuo anya.

² Ay nafon tuo anya at fakaylatun ay nabalus tuo at darangin.

³ Ay ankakbang tuo anya, ay nafon at fagmasineun, ay nafasangboan o anya sik sangbo at mawatan siginan at yud e suglat fag gintu.

⁴ Ay kanya naet sa emu te, famuti at leleg, ay nafon o anya tangaduge fag leleg.

⁵ Aroro nafababo tuo anya, kanya ansik takadungug ay ansik mabalyanan.

^6-7 Yawi, Tiba Tungud fag Dius, nafon o anya ngay famonun at yud kamin, ay nafamanabayan o anya sim day tigyangan, aroro kanya gafanud tua sa emu. Ay siginan nu mafangesug o, kanya di kataygilid.

⁸ Ay siginan am fagmabalyananun, gbabo o fagayu am fawayan.

⁹ Gina ban o ndasug, namamin ban o am ngay fawayan, kata nu kairug sisad faigangan. Ay kanya ban fagayu umkamin, aroro sam dotama.

¹⁰ Namabul ban o fagayu at ngay kasugfunanan, laman ban we sawad fagayu at gaban sas fagdaul daga.

¹¹ Kanya fagayu at ngay algan sa emu mauri, dewa katanya, kanya wa mababo.

¹² Ay kanya fagayu nu nalag te, gfatiuan wo sa anya fagayu am godun, kanya fagayu glagyu.

¹³ Yawi, gseg ami emu, aroro sam fagmabitsugun. Galubad ami sa emu ngay alubad at mauseganan, aroro sam fagmabalyananun.