Alubad. 142 - Fanawbuid tagsibaliwas Fakayabian

Alubad 142 Darangin laman Dius Gfalangfe

Dabid at alubad, sabaliwa at kinfasludan sa anya gina sis luib. Sik darangin.

¹ Yawi, guro au gdarangin sa emu te, “Afanyui angku.”

² Glong au sa emu ku ngay fagafanawaun ay ku ngay fagidapun, kata nu gugwag au mamam sim daga salubangan.

³ Gina au yud e fagsegun ya, saful o at matuyan fag dalan ku fagnanlaoan. Dewa katanya, ku ngay fawayan nafoli at sangdaw sa ku dalan.

⁴ Dius, glag wo ngay taw tagsi ku ligung, kanya fagayu we kafanyu ya angku. Ay kwe fagnangakbangan ya taggubuk angku.

⁵ Yawi, nu katanya, guro au sa emu te, “O way lang ku taggubuk ay ku fakaylatun ste sfagdaul daga.”

⁶ Nu katanya, dungugi nu get au gubuk, aroro maksvn wan nu gidapan au. Falangfei angku siginan sangay taw tagfaurianan angku, aroro kanya fagayu amabitsug yap tua angku.

⁷ Yawi, falfasi angku ste ginan fag fagubungan, laman manamauseganan ktua emu. Ay at matuyan fag ngay taw nangaful sa ku ligung, aroro natuyan te, matuyan tuo sa angku.