Alubad. 141 - Fanawbuid tagsibaliwas Fakayabian

Alubad 141 Darangin laman Dius Gdiri

Dabid at alubad.

¹ Yawi, guro au emu te, gubuki angku masakit! Ay dungugi angku.

² Ay aylati ku darangin, takata sik famaebebanglu fag fanggalangun. Ay aylati yangay nu gfabat au ku ngay take, takata sik fanggalangun gina yabi.

³ Yawi, gubuki angku laman kdi glong at mauri, kata nu e gfaragang ku lislis.

⁴ Fayayui angku siginan at mauri fag ngay fakamulun, ay siginan sangay taw tagfakamulun takatanya. Ay fayayui yangay angku siginan at ngay falganan fag ngay fakonun, laman kdi galoan.

⁵ Kaylat au at matuyan fag ngay taw nu gfaragang angku, aroro nasaful au te, kanya fagayu kesug tua angku. Kanya fagayu gsalag angku, kata sik langis at naugwag sa ku alfuyu. Dewa katanya, gdarangin au te, faragangi wan ngay taw mauri at ngay fakamulun.

⁶ Ay nu nafatong ban sas gubang kafag ngay taw at ngay tagfangguna, kanya ban fagayu sumaful te, ku ngay longan matuyan:

⁷ Kanya ban fagayu glong te, “Tam ngay bini ban umrapyag sis day fagfolian, kata ngay gang nu kasure nu e naali daga.”

⁸ Yawi, ku Fun, gdama au sa emu, aroro o wan ku fagsarirungan. Lag yap gfabayan nu kabul au.

⁹ Fayayui angku siginan ngay taw mauri at ngay sangdaw.

¹⁰ Kanya way ban nangus fagayu at kumsangdaw, ay au ban glangfe ktua manabayan.