Alubad. 132 - Fanawbuid tagsibaliwas Fakayabian

Alubad 132 Darangin laman Dius Ggubuk at Bale

Alubad gina gundaud sas Erusalem.

¹ Yawi, amatangi tua Dabid, ay at nadalan fag ngay fagidapun.

² Ay amatangi yangay at fatuyanan sa emu te,

³ “Kya guli ay kya nantaygilidan sa ku igyan,

⁴ ay kya nantiug,

⁵ yakmay kban nalag sik fagfalindugan Yawi at bale, Akub at Dius at mabalyanan at fagbanwanan.”

⁶ Gina ami sis Efrata, nadungug ami sabaliwas Fagsuadan Nasadian, ay nalag ami sis datag Aar.

⁷ Nalong ami te, “Glao watam sas Dius at fagbanwanan, nu inda at faglunggungan, ay nanseg tam anya sit daga salubangan.”

⁸ “Yawi, alindugi, adasugi stie sam fagbanwanan, gasfuan fagsuadan am nasadian tagfatoglag te, mabalyanan o.

⁹ Am nafili nangus fag ngay tagfon fanggalangun, matuyan tua nu mabanwan, ay am ngay taw nangus at matuyan, kabavn galubad tua gugat guseganan.”

¹⁰ Aroro kesug tuo am fagsuguan Dabid, lag gaiyan am nafili fag fun tagsiginan at kasugfunanan.

¹¹ Ebi nafatuyanan o sas Dabid te, “Gfalganan kban gugat siginan am kasugfunanan, tagtubus emu laman sik fun. Ay matuyan gfafasludan ban o takatanya, ay di ban o kalyam.”

¹² Ay nalong yangay o te, “Am ngay kasugfunanan ban nu gfaning tua kata ku nasadian ay ku faugali sa anya fagayu, kanya ban fagayu umsik ngay fun kabavn.”

¹³ Yawi nafili furuan Siun laman at fagbanwanan. Ay nalong te,

¹⁴ “Namanwan kban ay nanfiangalay ste kabavn, aroro katanya ku fakaylatun.

¹⁵ Gfon kban sas furuan daul Siun nusnge wain at fagayudanun, ay gfon kyangay ban fakonun anggan sat yud e kwa tagbanwan sanya.

¹⁶ Gfasik ngay matuyan kban at ngay tagfon fanggalangun, ay kafag ngay taw ban at matuyan, kabavn galubad tua guseganan.

¹⁷ Ay namafunan kban ste sfuruan Siun Dabid at kasugfunanan at sadi, ay kanya ban umkata sik salung laman at namangguna ku ngay taw.

¹⁸ Gfasik mabalyanan kban ku nafili fag fun, dewa katanya, gfapla kban at ngay fawayan.”