Alubad. 119 - Fanawbuid tagsibaliwas Fakayabian

Alubad 119 Dius at Longan א (Alef)

א (Alef)

¹ Mauseganan sik taw nu masine tua at ugali, ay nu gfaning Yawi at faugali.

² Mauseganan yangay sik taw tagalo tua Dius at ngay foyungan, ay tagugatan tua grvbvy Dius at fakaylatun.

³ Kanya di gfakamulun at mauri, nu bunway gfaning tua Dius at ngay fakaylatun.

⁴ Yawi, nafon tuo sa emi am ngay fagaloan, laman em fagnangugatanun namaning.

⁵ Guseganan au ankaksvn tua nu gfaning au am ngay foyungan.

⁶ Nu katanya, nu natap kban am ngay suguan, dakdi kapla emu.

⁷ Gfauseganan au emu sas fagdaul ku amatanganan at matuyan, kaduge au gamatangan am ngay faugali at matuyan.

⁸ Gfaning kban gugat am ngay foyungan, nu katanya, lag gfabayan angku.

ב (Bet)

ב (Bet)

⁹ Setain ro sik baguama laman matuyan tua nu gbanwan? Kanya masine nu gfaning tua gugat am ngay longan.

¹⁰ Nangakbang ktua ban gugat sa emu sas fagdaul ku amatanganan. Nu katanya, gubuki angku laman kdi gsaruy am ngay suguan.

¹¹ Gfasi ktua ban gugat ku amatanganan am ngay longan, laman ban kdi gasalanan sa emu,

¹² Yawi, gseg au emu! Foyungi angku am ngay foyungan.

¹³ Glong ktua ban gugat fagayu am ngay faugali, am nafoyung sa emi.

¹⁴ Nu guseganan au gfaning am ngay foyungan, aksvn yap tua nu gfanagsag au ku ngay ramraman.

¹⁵ Gamatangan ktua ban gugat am ngay fagaloan ay am ngay balyawvtan.

¹⁶ Guseganan ktua ban gugat am ngay foyungan, ay kdi ban kalyam am ngay longan.

ג (Gimel)

ג (Gimel)

¹⁷ Afanyui angku am fagsuguan, laman kya kabul; nu katanya, gfataglayun ktua ban gfaning am ngay longan.

¹⁸ Luangi ku amatanganan, laman gtogdungug ktua am faugali at madulo.

¹⁹ Ku leleg ste swa daga wa glugo; kata kway sik betaw. Nu katanya, lag gsuksuk sa angku am ngay suguan, abat ngate, foyungi way.

²⁰ Kayu buknga, maksvn nu kaylat au gyatapun ay gyasafulun am ngay faugali.

²¹ Gsalag o takamatungudun, ay gfaurianan o tagsaruy am ngay suguan.

²² Fayayui angku siginan nu kamapla ay nu kamalingun, aroro gfaning ktua am ngay foyungan.

²³ Dewa at ngay fun gkamatoan laman gfalganan nu namaurianan angku, ku amatanganan sa tua gugat am ngay foyungan.

²⁴ Am ngay foyungan gfae fagusegananun tua gugat angku, ay kanya ku takamoyung.

ד (Dalet)

ד (Dalet)

²⁵ Antaygilid au ay gakabulun kwan, nu katanya, fabitsugi angku kata am fatuyanan.

²⁶ Nafoyung au sa emu ku ngay nagdalanan, ay nadungugan tuo angku. Nu katanya, foyungi sa angku am ngay foyungan.

²⁷ Fayamagi sa angku am ngay fagaloan, laman gamatangan ktua gugat am ngay fakamulun at maksvn nu madulo.

²⁸ Anmomuy au, aroro sa ku fakabaluun; nu katanya, fasuni ay fabitsugi angku kata am fatuyanan.

²⁹ Fayayui angku siginans fakamuagun, ay gubuki angku laman saful ktua am faugali.

³⁰ Nafili au am ngay faugali, laman ku fagnangugaliun at matuyan.

³¹ Yawi, gbakvd ktua gugat am ngay foyungan, nu katanya, lag gfabayan nu gafaplan au.

³² Gugatan ktua gfaning am ngay suguan, kata nu glagyu au sit matuyan fag dalan, aroro gfamut tuo ku fagmayamagun.

ה (He)

ה (He)

³³ Yawi, foyungi angku am ngay foyungan, laman ku fagnamaningun kaduge au gleleg.

³⁴ Foyungi angku am faugali, laman gtogdungug ktua, ay gbakvd ay gfaning sas fagdaul ku amatanganan.

³⁵ Gubuki angku nu gfaning au am ngay suguan, aroro kanya gfae fagusegananun angku.

³⁶ Gubuki angku laman kaylat ktua nangasaful ay nangalo am ngay foyungan. Nu katanya, kdi galabian ya ngay ramraman.

³⁷ Gubuki angku laman kdi gdama fagayu at yud e tungkul, ay fabitsugi angku kata am fatuyanan.

³⁸ Fafasludani am fatuyanan sa angku am fagsuguan, aroro e fatuyanan tuo sas fagayu tagfaning emu.

³⁹ Masine tua am ngay faugali! Nu katanya, fayayui angku siginan sangay famalingun, aroro kalimu au.

⁴⁰ Nasaful o te, maksvn nu kaylat au gfaning am ngay fagaloan. Nu katanya, fabitsugi angku, aroro matuyan tuo.

ו (Vav)

ו (Vav)

⁴¹ Yawi, esugi ay falangfei angku kata am fatuyanan,

⁴² laman mafabalus ktua ngay taw tagfalingun angku, aroro gafanud ktua sa am ngay longan.

⁴³ Lag o kaylat nu kalyam ku fagmakatuun glong am longan at matuyan, aroro am ngay faugali wan ku fagsegun.

⁴⁴ Kabavn ban, namaning au am faugali. Ay namakamulun kban takatanya kaduge au gleleg.

⁴⁵ Nu katanya, siginan ku nalfasan, gbanwan ktua ban manabayan, aroro gugatan ktua gamatangan am ngay fagaloan.

⁴⁶ Ay dewa sa sangay fun, kwa kapla glong sabaliwa am ngay foyungan.

⁴⁷ Kesug au am ngay suguan, nu katanya, guseganan au gfaning.

⁴⁸ Kesug au ay gsuyu am ngay suguan, ay gamatangan kban gugat am ngay foyungan.

ז (Zayin)

ז (Zayin)

⁴⁹ Amatangi am fatuyanan sa angku am fagsuguan, aroro siginan am fatuyanan, nafae fagsegun o angku.

⁵⁰ Ay am fatuyanan wan tagfabitsug ay tagfasun angku, gina au e ngay fagidapun.

⁵¹ Takamatungudun fag ngay taw gfalingun gugat angku, dewa katanya, kdi gsaruy siginan am faugali.

⁵² Yawi, namatang au am ngay faugali am nafon ebi, ay kanya wan tagfasun angku.

⁵³ Maksvn tua nu kadotama au at mauri fag ngay taw, aroro kanya fagayu gsaruy am faugali.

⁵⁴ Nusnga nday au, galubad au sabaliwa am ngay foyungan.

⁵⁵ Yawi, gamatangan au gugat sabaliwa emu dewa yabi, ay gfaning au am faugali.

⁵⁶ Takatatuy ku fakamulun: gfaning au am ngay fagaloan.

ח (Khet)

ח (Khet)

⁵⁷ Yawi, o way lang ku fakaylatun. Ay gfatuyanan au te, namaning kban am ngay longan.

⁵⁸ Sas fagdaul ku amatanganan gfainfanyuan au get sa emu te, afanyui angku kata am fatuyanan.

⁵⁹ Namatangan au sabaliwa ku ugali at kinlangfe, ay anfoli au sa emu laman namaning am ngay foyungan.

⁶⁰ Ay ginanya yay, nafaning kwan am ngay suguan.

⁶¹ At mauri fag ngay taw, dewa nasiuk angku, kdi ban kalyam am faugali.

⁶² Galay wabilug yabi kafulo au laman namauseganan emu, aroro am ngay faugali, matuyan tua.

⁶³ Fagayu taw tagsuyu emu ay tagfaning am fagaloan; au wan at fagadgalangan.

⁶⁴ Yawi, nu mafangesug o anfagdaul sas fagdaul daga. Foyungi angku am ngay faugali.

ט (Tet)

ט (Tet)

⁶⁵ Yawi, masine tua am nafakamulun sa angku am fagsuguan, kata am fatuyanan.

⁶⁶ Foyungi angku at matuyan fag algan ay at kasakan fag fagsafulun, aroro gafanud ktua sam ngay suguan.

⁶⁷ Gina o yud yay nafaurianan angku, anyayu au emu, dewa katanya, katsi gfaning ktua am longan.

⁶⁸ At kasine o anggan am ngay fakamulun. Nu katanya, foyungi angku am ngay faugali.

⁶⁹ Takamatungudun fag ngay taw dewa gfauri angku siginan at fakamuagun, gfaning ktua gugat am ngay fagaloan sas fagdaul ku amatanganan.

⁷⁰ Kafag ngay taw we fagsafulun ay wa gtogdungug, dewa katanya au, guseganan ktua gfaning am faugali.

⁷¹ Masine at kindasug sa angku fag fagidapun, aroro siginan takatanya, nasaful ktua am ngay foyungan.

⁷² Am nafon sa angku fag faugali nu mafanud, gtungud tua tangayu fag ramraman.

י (Yod)

י (Yod)

⁷³ Am ngay daluap nawat ay nafaksvn angku, ay nafon o angku fagmayamagun laman sumaful au am ngay suguan.

⁷⁴ Ngay taw tagsuyu emu nu nalag angku, gfanagsag nangus maksvn, aroro gafanud au sa am longan.

⁷⁵ Yawi, nasaful au te, am ngay faugali matuyan, ay aroro matuyan o, nafaurianan o angku laman sumaful au at matuyan.

⁷⁶ Nangus gfasun o angku aroro mafangesug tuo, kata am fatuyanan sa angku am fagsuguan.

⁷⁷ Afanyui angku laman gleleg ktua gugat, aroro guseganan au gfaning am faugali.

⁷⁸ Takamatungudun nangus fag ngay taw tagfalingun gugat angku umkapla. Dewa katanya, au gamatangan ktua gugat am ngay fagaloan.

⁷⁹ Fabayani wan ngay taw tagfaning emu ay at nasaful am ngay foyungan nu kakbang sa angku.

⁸⁰ Nafafaning ktua nangus am ngay foyungan, laman ban kdi kapla.

כ (Kaf)

כ (Kaf)

⁸¹ At kadugean nu gfanya au nu gfalangfe o angku kamomuy kwan, dewa katanya, am longan tua gugat ku fagsegun.

⁸² Wa mayamag ya nu kamanawan au, nu gfanya au am fatuyanan sa angku. Ay ginto au te, “Ginain ya ban nu gfabitsug o ay gfasun angku!”

⁸³ Kata kway lang sik fagsuadan mamam mawatan fagbaugun at balat at kinkitut wan ay at yud katalin ya, ay dewa katanya, kya nalyam am ngay faugali.

⁸⁴ Seduge ya ban nu gfanya au? Ginain ya ban nu gfaurianan o tagfauri angku am fagsuguan?

⁸⁵ Takamatungudun fag ngay taw, yud gfaning am faugali, kali sik ngabasad fag lusung laman nanggamat angku.

^86-87 Gubuki angku aroro deyud au e malong kanya fagayu gfauri angku, yakmay au gakabulun wan. Dewa katanya, kdi nyayu siginan am ngay fagaloan, aroro am ngay suguan matuyan tua.

⁸⁸ Dirii angku, aroro mafangesug o, laman mafafaning au am nafon sa angku fag ngay foyungan.

ל (Lamed)

ל (Lamed)

⁸⁹ Yawi, kabavn ban am longan katanya tua gugat, kata banwa nu yud gbadbalian.

⁹⁰ Ay am fagmatuyanun ban gtaglayun tua sas fagayu kasugfunanan. Mogat nu kawat o fagdaul daga, nu katanya, katanya tua ban gugat.

⁹¹ Am ngay faugali ban matuyan tua gugat, aroro fagayu nusnge wain galo way kata am fakaylatun.

⁹² Am faugali yaman gfasun gugat angku, anbul kwa ro sas fakabaluun.

⁹³ Kwa kalyam am ngay fagaloan, nu katanya, di o gfabul angku.

⁹⁴ O wan tagagbilug angku, nu katanya falangfei angku. Aroro kabavn gugatan au gfaning am ngay fagaloan.

⁹⁵ At mauri fag ngay taw namalabag angku laman namabul, dewa katanya gamatangan ktua gugat am ngay foyungan.

⁹⁶ Nasaful au te, fagayu tagsis fagdaul daga e fakatabuan way, dewa katanya am ngay suguan ban katanya tua gugat.

מ (Mem)

מ (Mem)

⁹⁷ Kesug au am faugali. Nu katanya, fagayu menit gamatangan ktua gugat.

⁹⁸ Am ngay suguan si tua gugat ku amatanganan. Nu katanya, amamatanganan kyap tua ku ngay fawayan.

⁹⁹ Ku fagtogdungugun ayu yap tua ku ngay takamoyung, aroro kabavn ku fagamatanganun am ngay foyungan tua.

¹⁰⁰ Nu matogdungug au gtungud yap tua ku ngay fagtainan, aroro ku fagaloan am ngay faugali tua.

¹⁰¹ Gsaruy au at mauri fag ngay ugali, laman mafaning au am ngay longan.

¹⁰² Kwa gsaruy am ngay faugali, aroro o tua tagfoyung angku.

¹⁰³ At kasine am ngay longan, tuy amatamis yap tua deut.

¹⁰⁴ Siginan am ngay fagaloan, kaksvn tua ku fagmatogdungugun, nu katanya, kauri kway at mauri fag ngay fakamulun.

נ (Nun)

נ (Nun)

¹⁰⁵ Am ngay longan gbakvd ay gtaban angku sa ku dalan.

¹⁰⁶ Gfafasludan au ku fatuyanan sa emu te, gfaning au am ngay faugali.

¹⁰⁷ Yawi, gidapan au maksvn. Nu katanya, fabitsugi angku kata am fatuyanan.

¹⁰⁸ Yawi, aylati ku fagusegananun sa emu, ay foyungi angku am ngay faugali.

¹⁰⁹ Kabavn dewa au gugat gidapan arvs gakabulun kwan, kdi kalyam am faugali.

¹¹⁰ At mauri fag taw nafoli sik sangdaw, laman sa angku, dewa katanya kdi nasaruy am ngay fagaloan.

¹¹¹ Am ngay foyungan ku fagagbilugun yud ban e fakatabuan, aroro tuy wan tagfon angku fagusegananun.

¹¹² Mafalganan au gfaning am ngay foyungan, sitsigons fakatabuan.

ס (Samek)

ס (Samek)

¹¹³ Kauri au ngay taw at yud matuyan sa emu, dewa katanya, kdi kalyam am faugali.

¹¹⁴ O wan ku fagsegan ay ku tagbalabag. Ay am ngay longan ku fagsegan.

¹¹⁵ Am fag ngay taw tagfakamulun at mauri, ayayui angku, laman mafaning ktua ku Dius at ngay suguan.

¹¹⁶ Yawi, foni angku fagmabitsugun kata am fatuyanan, laman gleleg ktua gugat. Lag o kaylat ku fagsegun sa emu nu kalyam.

¹¹⁷ Gubuki angku laman umlangfe au, ay laman ku amatanganan kabavn sa tua am ngay foyungan.

¹¹⁸ Naiyan wo ngay taw at yud gfaning am ngay foyungan. At mafanud we tungkul kanya fagayu at famalingun.

¹¹⁹ Naiyan wo at mauri fag ngay taw ste sfagdaul daga. Ay au kesug ktua am ngay longan.

¹²⁰ Gtadtaruyan au kalimu emu, kalimu au am fagnamakamulunun fag ngay faugali.

ע (Ayin)

ע (Ayin)

¹²¹ Kabavn ku fakamulun at matuyan tua ay at masine, nu katanya lag gfabayan ku ngay fawayan nu gbabo angku.

¹²² Fatuyanani sa angku am fagsuguan te, ggubuk o angku, ay lag o gfabayan takamatungudun fag ngay taw nu gfalingun.

¹²³ Ku mata kadulum wan nu gfanya au am fatuyanan sa angku te, gfalangfe o angku.

¹²⁴ Fakamuluni sa angku am fagsuguan kata nu mafangesug o. Ay foyungi sa angku am ngay foyungan.

¹²⁵ Foni angku fagmatogdungugun, laman tumogdungug au am ngay foyungan.

¹²⁶ Yawi, fakamuluni wan, aroro ngay taw wa gfaning ya am faugali.

¹²⁷ Nu kesug au am ngay suguan, gtungud yap tua at mafasinean fag gintu.

¹²⁸ Galo ktua fagayu am ngay fagaloan, ay kauri au at mauri fag ugali.

פ (Pe)

פ (Pe)

¹²⁹ Am ngay suguan maksvn nu madulo, ay gfaning au sas fagdaul ku amatanganan.

¹³⁰ Am ngay longan tagfon fagmayamagun sa sangay taw at amatanganan, ay tagfon fagsafulun sat yud e fagsafulun.

¹³¹ Gfatanganga au gugat at kaksvnan nu kaylat au am ngay suguan.

¹³² Damai ay afanyui angku kata am fakamulun gugat sa sangay taw takesug emu.

¹³³ Siginan am ngay longan, tabanani angku, ay lag gfabayan fagmauriun nu gagbilug angku.

¹³⁴ Falangfei angku sa sangay taw takamalingun, laman mafafaning au am ngay fagaloan.

¹³⁵ Falagi sa angku am fagsuguan am fagmatuyanun, ay foyungi sa angku am ngay foyungan.

¹³⁶ Maksvn nu gwayway au, aroro ngay taw wa gfaning am faugali.

צ (Tsade)

צ (Tsade)

¹³⁷ Yawi, matuyan tuo, ay matuyan yangay am ngay faugali.

¹³⁸ Am nafon sa emi fag ngay foyungan matuyan tua ay mafanud.

¹³⁹ Maksvn nu kadotama au, aroro ku ngay fawayan wa nafaning am ngay longan.

¹⁴⁰ Natuyan au te, am ngay fatuyanan mafanud, ay nu sa angku am fagsuguan maksvn nu mafanud.

¹⁴¹ Au sik mafalingun kway, ay sik naiyanan fag taw, dewa katanya kwa kalyam am ngay fagaloan.

¹⁴² Am fagmatuyanun we fakatabuan. Ay am faugali matuyan.

¹⁴³ Ngay fagmauriun ay fagidapun andasug sa angku, dewa katanya am ngay suguan nafon tua angku fagmasunun.

¹⁴⁴ Am ngay foyungan matuyan tua ay di e fakatabuan, foni sa angku sik fagmayamagun laman gleleg ktua gugat.

ק (Qof)

ק (Qof)

¹⁴⁵ Yawi, gwayway au guro sa emu sas fagdaul ku amatanganan, ay balusi angku laman mafafaning ktua am ngay foyungan.

¹⁴⁶ Guro au sa emu te, falangfei angku, laman mafafaning au am ngay foyungan.

¹⁴⁷ Anfulo kwan sbalabag sirut, laman get au sa emu gubuk, aroro gafanud au sam longan.

¹⁴⁸ Kwa natiug ya fagngabak yabi, laman gamatangan au am longan.

¹⁴⁹ Yawi, dungugi angku aroro mafangafanyu tuo, ay gubuki angku laman gleleg ktua gugat kata am ngay faugali.

¹⁵⁰ At mauri fag ngay taw munakbang wan si angku, laman namaurianan angku; kanya fagayu wa gfaning am faugali.

¹⁵¹ Yawi, dewa katanya munakbang tuo gugat si angku, ay am ngay suguan matuyan tua gugat.

¹⁵² Siginan ebi, nu gtap au am ngay foyungan, nasaful au te, di ban e fakatabuan.

ר (Resh)

ר (Resh)

¹⁵³ Damai ku fagidapun ay falangfei angku, aroro kdi nalyam am faugali.

¹⁵⁴ Gubuki ay falangfei angku, ay fabitsugi angku kata am fatuyanan.

¹⁵⁵ At mauri ban fag ngay taw wa kalangfe, aroro kanya fagayu wa nafaning am ngay foyungan.

¹⁵⁶ Yawi, mafangafanyu tuo, nu katanya, fabitsugi angku kata am ngay faugali.

¹⁵⁷ Ngayu tagfauri angku, dewa katanya kdi nyayu siginan am ngay foyungan.

¹⁵⁸ Maksvn nu kauri ngay taw at yud matuyan sa emu, aroro kanya fagayu wa gfaning am longan.

¹⁵⁹ Yawi, damai nu setain nu gfaning au am ngay fagaloan. Fataglayuni nu gleleg au, aroro mafangesug tuo.

¹⁶⁰ Matuyan tua am ngay longan, ay kabavn am ngay faugali katanya tua gugat.

שׂ / שׁ (Sin/Shin)

שׂ / שׁ (Sin/Shin)

¹⁶¹ Ngay funan gfauri angku deyud au e malong, dewa katanya, ku fakalimuun am longan tua.

¹⁶² Guseganan au am ngay longan, kata sik taw at nalag ngayuk ramraman.

¹⁶³ Kauri au fakamuagun, ay kesug ktua am faugali.

¹⁶⁴ Kayu menit fitu ginan nu gseg au emu, aroro am ngay faugali matuyan.

¹⁶⁵ Fagayu takesug am faugali manabayan tua nu gbanwan, ay di gasalanan.

¹⁶⁶ Yawi, o way lang ku fagsegun ku tagfalangfe, ay gfaning au am ngay suguan.

¹⁶⁷ Kesug au ay gfaning am ngay foyungan sas fagdaul ku amatanganan.

¹⁶⁸ Saful o fagayu ku ngay fakamulun, nu katanya, gfaning au am fagaloan ay am ngay foyungan.

ת (Tav)

ת (Tav)

¹⁶⁹ Yawi, dungugi ku ngay fagetun sa emu te, foni angku sik matogdungug fag amatanganan, kata am fatuyanan.

¹⁷⁰ Dungugi ku darangin, ay falangfei angku, kata am fatuyanan.

¹⁷¹ Kabavn guseganan au sa emu, aroro nafoyung tuo sa angku am ngay foyungan.

¹⁷² Galubad au sabaliwa am longan, aroro fagayu am ngay suguan matuyan tua.

¹⁷³ Kabavn gubuki tua angku, aroro ku fagfaningun am ngay fagaloan tua.

¹⁷⁴ Yawi, maksvn nu kaylat au nu gfalangfe o angku, am faugali tagfon angku fagusegananun.

¹⁷⁵ Fataglayuni nu gleleg au, laman gfauseganan ktua emu, nangus am ngay faugali tua taggubuk angku.

¹⁷⁶ Kata au sik tupa at nalyam yud nasaful dalan, nu katanya, rvbvyi angku am fagsuguan, aroro dakdi nalyam am ngay suguan.