Alubad. 103 - Fanawbuid tagsibaliwas Fakayabian

Alubad 103 Dius nu Kesug

Dabid at nariruk.

¹ Gseg au Yawi. Nafatuyanan au te, gseg kban gugat anya sas fagdaul ku amatanganan, aroro kanya matuyan.

² Gseg au Yawi, ay kdi ban nangus kalyam at fon fag ngay fagmasineun.

³ Kanya nafalyam tua fagayu ku asalanan, ay nafafia fagayu ku fakasaitun.

⁴ Kanya nafalangfe angku siginans fakabulun, ay nafalag sa angku te, mafangesug ay mafangafanyu.

⁵ Kanya nafon yangay sa angku fagayu nusnge wain at masine, nu katanya, ku ngay fakaylatun anfasludan. Ay kaduge au gleleg, kata ktua gugat sik mabaguama, ay mabitsug ktua gugat kata sik bio.

⁶ Yawi nu ginsaful matuyan tua sas fagayu tagafalingunan.

⁷ Kanya nafoyung sas Muisis ngay balyawvtan, ay nafalag sa sangay taw Israel at ngay fakamulun.

⁸ Yawi mafangafanyu, ay mafanggubuk, ay di masakit gfangadotama, ay nu mafangesug, kabavn tua.

⁹ Ay bundi kabavn nu gfantabugan ay nu gfangauri.

¹⁰ Kanya nu gfaurianan antam di kaksvn tam ngay asalanan ay tam ngay kakurangan.

¹¹ Aroro nu seyayu banwa ay daga at wabilug, kaksvn yangay nya Dius nu kesug fagayu tagfaning anya.

¹² Ay nu seyayu fakamenitan sas fakayabian, katanya yangay nu gfayayu antam siginan tam ngay asalanan.

¹³ Nu setain sik mama nu kafanyu at ngay sisian, katanya yangay Yawi nu kafanyu fagayu tagfaning anya.

¹⁴ Aroro kanya saful way tam kakurangan, ay saful yangay te, at fangawat antam daga way.

¹⁵ Fagayu taw at leleg kata way sik makmak, ay at fagmabitsugun kata way sik barugwak.

¹⁶ Ay nu natagmara, kafag barugwak kalyam wan, ay nusdi at fagtugbungan wa kasaful ya te, sanya.

^17-18 Dewa katanya, di e fakatabuan Yawi nu kesug ngay taw tagsuyu ay tagfaning at nasadian, ay tagamatangan tua gugat at ngay suguan. Ay gfataglayun yangay ban at fagmatuyanun anggan sa kafag ngay taw at ngay kasugfunanan.

¹⁹ Yawi nawat at faglunggungan sis banwa, ay gfunan sas fagayu.

²⁰ Segi Yawi, am at mabalyanan fag ngay tagbarita tagdungugan tua, ay tagfaning at ngay longan.

²¹ Segi Yawi, am fag ngay tagbarita, am wan at ngay fagsuguan ay at ngay tagfawayan tagfaning at fakaylatun.

²² Segi Yawi, fagayu am at awatan, aroro sia wan tagfagtainan nusnga nday. Gseg au Yawi.