Alubad. 10 - Fanawbuid tagsibaliwas Fakayabian

Alubad 10 Darangin laman Ggubuk

¹ Yawi, wain am fagngayayuun emi? Ay wain am fagsuksuanun emi gina ami sis buknga fagidapun?

² Takamatungudun ay at mauri fag ngay taw gfaidapan at yud e fagmakatuun. Umfasludan yangay nangus sa anya fagayu at ngay algan mauri.

³ Kanya fagayu gfangalabian ay kamanagsag sat ngay fakaylatun mauri, ay gfauseganan tagfangalabian fag ngay taw, ay gfalingun Yawi.

⁴ Ay aroro kanya fagayu kamatungudun, wa kaylat nangakbang sas Yawi, ay wa gamatangan ya sa baliwas Dius.

⁵ Kabavn kanya fagayu gbabo way gugat. Ay kanya fag ngay taw wa gamatangan ya te, e namaurianan ban anya, ay gfalingun at ngay fawayan.

⁶ Ay glong te, “Di e mauig antam, ay wa ban e namaidapan ya antam kabavn!”

⁷ Kabavn at ngay nalong mauri, kamuag, ay kamalimu. Ay kaylat glong mauri laman gfamomuy at ngay iba.

⁸ Kanya fagayu gsuksuan sa sangay furuan laman namanya ngay taw tagdalan deyud e asalanan.

⁹ Ay kata sik liun, gsuksuan ay gfanya at fagnangagatun, laman gyukfu at mamomuy, ay nu nayukfu, gguyudan wan.

¹⁰ Siginan at kabitsugan, gtigna wa daul at ngay fakagatun yakmay narunguy.

¹¹ Kanya fagayu gamatangan way te, “Dius wa kasalag ay wa glag tam ngay fakamulun.”

¹² Yawi, ku Dius, alindugi ay faurianani wan at mauri fag ngay taw. Ay lag gfabayan tagafalingunan fag ngay taw.

¹³ Em Dius, wain kanya fagayu at fagfalingunun emu? Ay glong yangay te, “Dius ban wa nanginsaful emi.”

¹⁴ Dius, glag way o ngay taw ke maksvn fag fagidapun ay takabalu. Ngay taw at mafanyuan ay at yud e kalongan ya gafanud sa emu, ay ggubuk tuo anya.

¹⁵ Famomuyi wan ngay taw mauri. Ay faurianani yakmay anragang nu gfakamulun at mauri.

¹⁶ Yawi wan tagfunan kabavn ban! Ngay talun at taw yud gtoglag Dius umkalyam siginans fagdaul daga.

¹⁷ Yawi, gdungug o ngay tagafalingunan at darangin. Ay gfabitsug yangay o at ngay amatanganan.

¹⁸ Fakamuluni at matuyan sa sangay taw at yud e kalongan ya ay sa sangay tagafalingunan, laman ban ngay taw mauri gfaragang wan nu gfalimu at iba, aroro kanya fagayu taw yangay.