Agay 1 - Fanawbuid tagsibaliwas Fakayabian

Yawi Glong te, Dogi Awati Ku Bale

¹ Gina sis faduak banwa taguna fag menit sis faunumk magdanun fun Daryu nu gfunan sis talun Persya, Yawi e nalong sas Serubabel ay sas Uswe siginans Agay, Yawi at taglong. Serubabel, Sealtiel at baguama, talun Uda at fun sirut, ay Uswe, Eusadak at baguama ay sik fun tagfon fanggalangun.

^2-3 Katatuy Yawi at Mabalyanan at longan siginan at taglong Agay: “Ngay taw glong te, ‘Bunya katsi at buknga laman gdog ami kawat am bale.’

⁴ O gbanwan wayam fia si ay ngay bale at masine, ay angku ngap ku bale maiklasan way?

⁵ Amatangani nu mabanwan am katsi.

⁶ Ngayu oma ay natanum, dewa katanya, alay way ay gutluan. E fakonun oma am, dewa katanya, wa kasakan. E fanginum oma am, dewa katanya, kadanum yayam. E lanbung oma am, dewa katanya, karios yayam. E bulan oma am, dewa katanya, kamin way vtv.

⁷ Amatangani nu mabanwan am katsi.

⁸ Undaudi sas buksul ay nanfangkayu am, ay dogi yap awati ku bale. Nu katanya tua, guseganan au, ay gseg tuam angku. Au, Yawi, taglong tuy.”

⁹ Yawi at Mabalyanan glong yangay te, “Gseg am te, ngayu tua ban ay gutluan, dewa katanya, alay way. Nustua ay nafauli ay gutluan, nafafaragfag kway lang. Nafakamulun au sa ayu takatanya aroro nafabayan am ku bale nu maiklasan, ay fagugatanun gfasine ay ngay mesa bale way lang.

¹⁰ Aroro siginan ay nafakamulun takatanya, banwa wa gfae damug ya, ay wam kae gutluan ya.

¹¹ Nafagong kwan fagdaul ay talun ay fagayu buksul, nu katanya, nataipan yangay ngay rawvg, ubas at mamam, langis, ay fagayu taw, ay ay ngay fagbaugun, ay anggan fagayu ay nainlufuyan.”

¹² Ay Serubabel ay Uswe, ay anggan ngay taw Israel at kinfoli sas talun Israel siginan at fagatabananan fag talun Babilunya, nafaning tua ay nafafasludan Yawi at suguan at nadungug siginan at taglong Agay. Nu katanya, kanya fagayu gfalag te, gsuyu tua Yawi.

¹³ Agay, Yawi at taglong, nalong sa sangay taw Israel te, “Yawi ban gufud tua gugat ayu.”

¹⁴ Nu katanya, Yawi nafabitsug Serubabel ay Uswe, ay at kinfoli fag ngay taw Israel at ngay amatanganan laman nandog nangawat sik bale laman sas Yawi at Mabalyanan, kafag ngay taw at Dius.

¹⁵ Ay kanya fagayu nafasigad kawat sis faduak safulu e ufatk menit gina sis faunumk magdanun, sis faduak banwa fun Daryu nu gfunan.