Abakuk 1 - Fanawbuid tagsibaliwas Fakayabian

¹ Katatuy Yawi at foyungan sas Abakuk fag taglong.

Abakuk at Fagetun at Fasadi

² Abakuk gdarangin te, “Yawi, ginain yaban nu gbalus o angku? Ginain yaban nu gfalangfe o angku siginans fagidapun?

³ Wain yay am fagfalagun sa angku ngay fagmauriun? Dewa nday gfadfabulan, ay e fagmauriun, ay kadkaurian ay gbadbaboan.

⁴ Nu katanya, am faugali we tungkul ya. Ay wa yangay e fagmatuyanun ya aroro tagfawabilugan at fagfadiugananun at ke asalanan way fag ngay taw, bunwa at yud e asalanan. Nu katanya, fagmatuyanun we tungkul ya.”

Yawi at Famalus sas Abakuk

⁵ Yawi gbalus te, “Amatangani fia takafasludan sa sangay talun, ay umdulo am maksvn. Aroro namasure kban at ngay madulo gina si ay kabukngan, ay dewa katanya, wa ban am gafanud dewa e namadungug sa ayu.

⁶ Ngay taw Babilunya gfangadotama ay kamabul, ay gsugu au anya fagayu laman namawayan. Kanya fagayu masakit nu gfawayan ngay talun sas fagdaul daga, laman nangagbilug ngay taw at fagbanwanan.

⁷ Ngay taw maksvn nu kalimu anya fagayu, aroro nusnga setaw at fakaylatun gfakamulun, gfafasludan wa fia ay we mafafaragang.

⁸ At ngay kabayu amatarung yap ngay leupardu, ay amadot yap ngay idu talun tagfanloan sad yabi. Ay at ngay kabayu gtarung yangay siginan tangayayu fag talun, kata sik bio at masakit nanyukfu at fagnangonun.

⁹ At ngay tagfawayan kadasug laman namaidapan at fawayan fag ngay taw. Kanya fagayu kata sik maksvn fag tagmara siginans fakamenitan. Ay kanya fagayu nataban ngayuk taw, kayu lagnas.

¹⁰ Kanya fagayu gfalingun ngay fun ay at ngay tagfangguna. At kaksvnan nu gfalingun, kase ngay furuan aroro kanya fagayu makatu way gulul sas alad siginan nu gfabungsud lutuk. Takatanya fag balyawvtan, kanya fagayu masakbo ay magbilug ngay furuan.

¹¹ Sanya ginan, kanya fagayu masakit glao, kata tagmara nu gdalan. Nu katanya, kanya fagayu anke asalanan, aroro we fagtoglagun ngay fagsegan, nu bunway gseg wan at sadili fagmakatuun.”

Abakuk at Fagetun at Fadua

¹² Abakuk nalong te, “Yawi, o wan ku Dius siginan ebi. O wan at yud e malong ay at yud e fakatabuan fag Dius. Yawi ku fagsarigan, nafili o ngay taw Babilunya laman gfaurianan emi.

¹³ Yawi, aroro di o e malong, wo kaylat fagmauriun ay fagidapun. Dewa katanya, wain am fakaylatun tagfandaya fag ngay taw Babilunya nu gfaidapan emi? Wain am fakaylatun anya fagayu nu namaurianan ngay taw at yud e asalanan?

¹⁴ Ay at ngay fawayan nafakata o sik ngay albon at yud e gfangguna laman namabo at ngay fawayan.

¹⁵ Ngay taw Babilunya maful guseganan aroro nataban at ngay fawayan kata ngay albon nu n-gamat sas fanggamat.

¹⁶ Aroro ngayu at nataban, kanya fagayu kamatungudun at ngay fagmakatuun kata sik tagfangalbon nu gseg at fanggamat, siginan nu gfon at mabebanglu fag fanggalangun sat fanggamat. Siginan at fanggamat, kanya anke ngay ramraman ay anke ngay fakonun.

¹⁷ Yawi, o kanya ban fagayu gfataglayun wan nu yud e afanyu nu gtaban ay nu gfauri ngay talun at taw?”