3 Uan 1 - Fanawbuid tagsibaliwas Fakayabian

¹ Au sik fagtainan sa sangay tagafanud, griruk au sa emu, ku fakesugun ku faduksay Gayu. Kesug au emu aroro si tua ta sfagmatuyanun.

² Ku fakesugun, gdarangin au emu, laman di o e fakasaitun ay laman manabayan tuo, kata nu manabayan o sa am fagafanudun.

³ Maksvn nu guseganan au ebi gina tam ngay faduksay tiba andasug ste, ay nafoyung sa angku te, gfaning tuo at matuyan.

⁴ We gtungud ya ku fagusegananun nu nadungug au te, ku ngay sisian sas fagafanudun gfaning tua at matuyan.

⁵ Ku fakesugun, masine am nafakamulun aroro ggubuk tuo tam ngay faduksay, deyud o toglag anya fagayu.

⁶ Ay kanya fagayu nafoyung sa sangay tagafanud ste sabaliwa nu kesug o. Gubuki anya fagayu sa takafauseganan tam Dius, laman kanya fagayu mabayan nu gtaglayun glao.

⁷ Aroro kanya fagayu glulian sa sangay furuan laman kamoyung sabaliwa tam Fun, ay wa gbul fanggubukun siginan at yud gafanud.

⁸ Nu katanya, masine nu ggubuk tam takatanya fag ngay taw, laman ggudgubukan tam gfarapyag at matuyan.

⁹ Ebi nariruk au sa sangay tagafanud sanya, ay Diutrefes wa kaylat gdungugan emi. At fakaylatun kaylat gfagtainan ayu.

¹⁰ Ay nu ndasug kban sanya, namoyung kban sa ayu at ngay longan at yud matuyan sabaliwa emi. Saman ya kanya, wa kaylat gfasakbo tam ngay faduksay at nadalan sanya, ay gsalag takaylat ggubuk, ay gaiyan ya.

¹¹ Ku fakesugun, lag o gfaning at fagmauriun, nu bunway faningi tua at masine. Tagfakamulun at masine, kanya Dius at taw. Ay tagfakamulun at mauri, at yud way gtoglag Dius.

¹² Fagayu tagafanud glong te, Demetriu at fakamulun masine. Ay kanya gfaning tua at matuyan. Ay anggan ami gfoyung yangay ami te, kanya gfakamulun at masine. Ay nasaful o te, fagayu em longan matuyan.

¹³ Ngayu yay ku fagyalongunun sa emu, dewa katanya, kwa kaylat ya griruk.

¹⁴ Ku fagsegun, wa ban nangus glugo ya, lumadlagan yay ta ay gkamatoan.

¹⁵ Sumawa nangus fia emu fagmanabayanun. Ta ngay faduksay ste glong te, O manabayan tuo? Ay longi sa tam ngay faduksay sanya te, O manabayan tuam?