2 Uan 1 - Fanawbuid tagsibaliwas Fakayabian

At Fakasigadan

¹ Au sik fagtainan sa sangay tagafanud, griruk au sa emu, Dius at nafili fag mangena ay anggan sam ngay sisian. Matuyan kesug au ayu, ay anggan fagayu at nasaful at matuyan kesug yangay ayu.

² Kesug ami ayu, aroro at Matuyan gbanwan tua si antam ay gufud antam kabavn.

³ Dius tam Mama, ay at baguama Isus tam Fun at fagmagalangun, ay at fakafanyun, ay at fagmanabayanun, ay anggan at fagmatuyanun ay at fakesugun, sumawa nangus fia antam.

At Matuyan ay Fakesugun

⁴ Guseganan au nu nalag au am sisian tiba nu gfaning at Matuyan kata tam Mama sis banwa at suguan antam.

⁵ Ay katsi glong au emu, te, masine nu kedkesugan tua tam. Tuy bunwa sik bagu fag suguan, e suguan wan takatanya siginan ebi taguna.

⁶ Fakesugun at masuad, nu gfaning tua tam Dius at ngay suguan, ay at suguan kata wan tam nadungug ebi te, banwani sas fakesugun.

⁷ Ngayuk tagfandaya nalo sas fagdaul daga. Kanya fag ngay taw at yud gafanud te, Isus ansik taw. Ay kanya fagayu gfandaya ay gfawayan tam Fun Isus.

⁸ Nu katanya, mafalganani tua, laman ban di nfangulan ay nainlufuyan ay mul tua ban am at famonun.

⁹ Nusnga sinu at yud gfaning tam Fun Isus at longan, ay nu kamasaweun way, Dius wa si anya. Dewa katanya, nusnga sinu tagbanwan sa tam Fun Isus at foyungan, tam Mama, anggan at Baguama si tua anya.

¹⁰ Sik taw nu ndasug sa ayu, ay at foyungan way kata em foyungan, lag gfasakbo sa ay bale ay lag gfagadgalangan.

¹¹ Aroro nusnga sinu at nafagadgalangan anya, nafadiuganan yangay anggan at fakamulun mauri.

¹² Ngayu yay oma ku fagyafoyungunun sa ayu, dewa katanya, kwa kaylat ya griruk. Ku fagsegun, umdasug kyay ban sa ayu ay lumadlagan tam ay gkamatoan, laman tam fagusegananun umkaksvn.

¹³ Am faduksay fag mangena, Dius at nafili kata emu, at ngay sisian glong emu te, O manabayan tuo?