2 Timuteu 3 - Fanawbuid tagsibaliwas Fakayabian

Taguyan fag ngay Menit

¹ Amatangani te, sa ban taguyan fag ngay menit, maksvn nu maidap.

² Ngay taw ban kamasadiliun, ay galabian salapi, ay kamatungudun, ay kamuag, ay glong at mauri sat ngay iba, ay kamabo at fagtainan, ay wa saful gfauseganan sas nusnga sinu dewa e nafakamulun sa anya at masine, ay wa gfaning Dius.

³ Ay saman ya takatanya, we fakesugun, ay wa kalyam tibak taw at asalanan sa anya, ay kamuag glong sabaliwa at iba, ay wa saful gfaragang at sadili, ay masakit gfangauri, ay kauri nusnge wain at masine,

⁴ ay gfanlukan sat ngay iba, ay gfangabanganan, ay kamatungudun, ay kesug way at sadili fakaylatun abat ngate kesug Dius,

⁵ ay kamaningan glong te, “Gfaning ami Dius,” dewa katanya, we kalag sit ugali ay sit fakamulun. Lag o gfaning takatanya fag ngay taw.

⁶ Takatanya fag ngay taw grvbvy at balyawvtan laman masakbo sa sangay mangena at momuy at amatanganan at bale ay gdaya kanya fagayu. Kanya fag ngay mangena nabyatan at asalanan ay natabanan sas nusnge wain fag fakaylatun.

⁷ Kanya fag ngay mangena kabavn gadal oma gugat, ay dewa katanya, wa natogdungug at matuyan.

⁸ Kata duama Anes ay Ambres nu kamabo Muisis, katanya yangay kanya fag ngay mangama at fakamulun nu yud gfaning sat matuyan. Kanya fag ngay taw we amatanganan ya sat masine, ay wa matuyan at fagafanudun.

⁹ Dewa katanya, kanya fag ngay taw wa mafataglayun sat fagmauriun, aroro at fagyudun mamatanganan umsure sas fagayu taw, kata at kinfasludan sas Anes ay Ambres.

Pablu at ngay Suguan sas Timuteu

¹⁰ Dewa katanya, saful tuo ku foyungan sa emu, ay ku leleganan, ay ku algan, ay ku fagafanudun, ay ku fagmafamanyaun, ay ku fakesugun, ay ku fagagwantanun.

¹¹ Nasaful wo ku nadalan fag ngay faurianan, ay anggan nu gagwanta au sis furuan Antiukya, ay sis furuan Ikunyu, ay sis furuan Listra. Maksvn ku nadalan fag fagidapun. Dewa katanya, tam Fun nafalangfe tua angku siginan kafag ngay fagidapun.

¹² Ay nusnga sinu takaylat gugali at matuyan nu galo tam Fun Isus dumalan ban faurianan.

¹³ Dewa katanya, at mauri ay tagfandaya fag ngay taw at fagmauriun umkaksvn ban. Kanya fag ngay taw gfataglayun nu gfandaya ay anggan kanya gadayan yangay.

¹⁴ Ay o, fataglayuni tua fakamuluni fagayu am nasaful ay anggan am fagafanudan. Ay saful o te, matuyan tua at ngay nafoyung sa emu takatanya.

¹⁵ Siginan ngay nu masisian o, saful wo Dius at Longan, tagfae fagsafulun emu sabaliwas fakalangfean siginan am fagafanudun sa tam Fun Isus.

¹⁶ Dius at Longan fagayu anriruk siginan at Falad, ay gfoyung antam sat matuyan, ay gsalag at yud matuyan, ay gturun at yud masine fag fakamulun, ay gtaban antam sat matuyan fag ugali.

¹⁷ Nu katanya tua, Dius at fagsuguan mafalganan tua fia sas fagayu fakamulun at masine.