2 Timuteu 2 - Fanawbuid tagsibaliwas Fakayabian

Tam Fun Isus at Fagsuguan

¹ Ay o, ku sisian Timuteu, maksvni tua am amatanganan siginan tam Fun Isus at gubuk sa emu.

² Am ngay nadungug siginan angku sisad fagngayuan taw, foyungi yangay sat matuyan fag ngay taw at makatu gfoyung sa tibak taw.

³ Agwantani ngay fagidapun gfasfuan angku aroro tam Fun Isus o at tagfawayan.

⁴ Sik tagfawayan wa kasalag ste swa daga nusnge wain, laman kanya gfon fagusegananun sat fun.

⁵ Sik tagawean wa ban e bulan nu dway gfaning faugali sabaliwas awean.

⁶ At maseganama fag tagtanum, kanya taguna gbul at ekwan.

⁷ Amatangani masine ku foyungan emu, ay tam Fun gfon sa emu fagmatogdungugun sabaliwa fagayu takatanya.

⁸ Amatangi tam Fun Isus; kanya nadog yay naleleg, ay siginans fun Dabid at kasugfunanan. Kanya wan ku fagfoyungun sa sangay taw.

⁹ Aroro siginan takatanya, anke fagidapan au ay masiukan au salambitan kata sik tagasalanan. Ay dewa katanya, Dius at Longan we masiuk.

¹⁰ Ay nu katanya, gagwantan au fagayu nusnge wain laman sas Dius at nafili fag ngay taw, laman siginan tam Fun Isus kanya fagayu umlangfe ay mul at yud e fakatabuan fag fagmasineun.

¹¹ Matuyan tuy fag longan te, Nu nbul tua tam gasfuan tam Fun Isus, gleleg yangay ban tam gasfuan anya.

¹² Ay nu nagwantan tua tam, gfunan yangay ban tam gasfuan anya. Nu kauri way tam anya, kanya kauri yangay ban antam.

¹³ Itam deyud tam matuyan, kanya matuyan tua kabavn, aroro kanya wa mafamuag sabaliwa at sadili.

At Matuyan fag Tagfakamulun sas Dius

¹⁴ Famatangi sa kafag ngay taw fagayu takatanya, ay sis Dius at daga salubangan, sugui sa anya fagayu te, “Lag am gbadbaboan sat yud e tungkul fag longan.” We tungkul fagbadbaboanun, takatanya gfauri way at ngay tagdungugan.

¹⁵ Ugatani fia fauseganani Dius ay lag o kapla kamoyung. Fafoyunguni tua fia at matuyan.

¹⁶ Saruyi at yud e tungkul ay at mauri fag kamatoanan aroro nusnga sinu tagfakamulun takatanya kaugat way nu kayayu siginans Dius.

¹⁷ Takatanya fag ngay taw at foyungan kata way sik fakasaitun takarapyag sas bilug. Katanya yangay Imeneu ay Filitu at foyungan.

¹⁸ Duama nasaruy at matuyan ay nafamomuy tibak taw at fagafanudun siginan nu gfoyung te, anfasludan wan ngay kinbul nu gdog gleleg.

¹⁹ Dewa katanya, Dius at nafalganan sat ngay taw fag fagsarigan mogat tua. Ay katatuy at Rirukan te, “Tam Fun nasaful wan nu sinu at fagagbilugun fag ngay taw.” Ay nusnga sinu fag taw taglong te, “Gfaning au tam Fun,” at masine kanya nu ddi gfaning ya at mauri.

²⁰ Sa sik bale daul, e ngay fagagbilugun at mawatan siginans gintu ay sanbung salapi, ay e fagagbilugun yangay at mawatan siginans kayu ay lutuk. E buknga fia gbangkad tibak fagagbilugun, ay tiba fagayu wa menit.

²¹ Nusnga sinu takayayu tua siginans fagmauriun, kanya kata tua at mafanud fag ngay fagagbilugun. Ay kanya fagayu mafalganan sa tam Fun laman e fanambagun sa anya, ay mafalganan tua gugat gfakamulun nusnga setaw at masine.

²² Nu katanya, o, saruyi baguama at fakaylatun fag ugali at mauri. Ugatani ugalii at matuyan, ay e fagafanuduni, ay e fakesuguni, ay e fagmanabayanuni, gasfuan fagayu taw tagdarangin sa tam Fun at ke masine fag amatanganan.

²³ Saruyi at yud e tungkul fag ngay badbaboan, aroro takatanya gfae fagawayanun way ayu.

²⁴ Tam Fun at ngay fagsuguan masine nu ddi kamawayan, nu bunway malukmei tua sas fagayu taw, ay masine tua nu gfoyung, ay magwanta tua.

²⁵ Ay masine kanya famafanyuani tua nu gfakamatoan tagfabadbaboan anya, bangaran ban takatanya fag balyawvtan Dius gfon yay sanya fag ngay taw sik buknga laman gubun at ngay asalanan, ay sumaful yay at matuyan.

²⁶ Nu katanya, at ngay amatanganan umyamag yay ban ay kanya ban fagayu umkalfas siginans Satanas, at nasangdaw ay at nataban anya fagayu laman namaning anya.