2 Samwel 11 - Fanawbuid tagsibaliwas Fakayabian

Dabid ay Batseba

¹ Gina ngay fun namawayan fag buknga, Dabid wa nanangalo, anfamato way sis Erusalem. Ay kanya nafalao sas fagawayanan Uab ay Israel at ngay tagfawayan. Ay kanya fagayu nababo ngay taw Amun ay naligung furuan Raba.

² Ay sik fafun, Dabid nasas tungud bale ay glodloan. Ay kaduge kamanawan, kanya nalag sik mangena gigus. Kafag mangena masine mandi.

³ Nu katanya, kanya nasugu sat fagsuguan te, “Nanginsaful am sinu atsi fag mangena.” Ay at fagsuguan nalong sa anya te, “Kanya fag mangena Batseba, Eliam at baguina ay Uryas fag taw Ket at mangena.”

⁴ Ay Dabid nasugu sik ngay tagfosuk longan laman nantaban anya. Ay Batseba nu ndasug sas Dabid at bale, Dabid nafataladan anya. (Ginanya, Batseba bagu yay kafia nu gfangigusan.) Ay Dabid nu nafataladan wan Batseba, nafauli wan.

⁵ Ay abandi Batseba nasaful te, gfafion, ay nafasaful sas Dabid.

⁶ Ay Dabid nu nasaful te, Batseba gfafion wan, kanya nafadasug sas Uab sik longan te, “Faulii yap Uryas fag taw Ket.” Ay Uab nafauli wan anya.

⁷ Ay Uryas nu ndasug, Dabid nainto anya te, “Tain katsi Uab ay at ngay tagfawayan nu gfawayan?”

⁸ Ay Dabid gfataglayun glong sas Uryas te, “Ulii yap nantungkud yap o.” Ay Uryas nalo wan gbuba ngay famonun siginans fun Dabid.

⁹ Dewa katanya, Uryas wa noli sat bale. Nanangagamut way nantiug sas Dabid at ngay fagsuguan sis day sakbawan bale daul.

¹⁰ Dabid nu nasaful te, Uryas wa noli, kanya nainto anya te, “Wain am fagyudun noli? Ay glugo wan nu yud o guli sa am bale.”

¹¹ Ay Uryas nabalus te, “Yawi at Fagsuadan Nasadian, ay ngay taw Israel ay taw Uda at ngay tagfawayan sayay at fagawayanan fag datag, ay sanya yangay Uab fag fun tagfawayan ay at ngay nafili fag ngay tagfawayan. Nu katanya, kwa masine guli sa ku bale laman nanfangon ay nanginum ay namataladan ku mangena. Aroro nafatuyan au te, kwa namakamulun takatanya kaduge e awayan!”

¹² Ay Dabid nalong te, “Katsi fag yabi ste yap o, ay balabag ban gfafoli kwa emu sas fagawayanan.” Ay ginanya fag menit Uryas ya nalao siginans Erusalem. Ay balabag di,

¹³ Dabid nagewan Uryas laman gfasfuan anya gfangon ay ginum. Ay Dabid nafalangu anya. Dewa katanya, ginanya fag yabi Uryas ya noli; natiug yay magamut Dabid at ngay fagsuguan.

¹⁴ Balabag di, Dabid nariruk sik rirukan sas Uab ay nafabuba sas Uryas.

¹⁵ Katatuy at rirukan: “Gina am gfawayan, fasii sfagunan Uryas, si ay ngay fawayan at maseganama. Ay am afolii way ay fabayani wan Uryas nu kabul.”

¹⁶ Nu katanya, kanya fagayu kaduge gligung furuan Raba, Uab nafasas fagunan Uryas, sit ngay fawayan at maseganama.

¹⁷ Ay at ngay fawayan nafafalo Uab ay nafabul Uryas ay tiba ya Dabid at ngay tagfawayan.

¹⁸ Ay Uryas nu nbul wan, Uab nafadasug sik longan sas Dabid sabaliwa at kinfasludan gina gfawayan.

¹⁹ Kanya nalong sa tagfosuk longan te, “Nu nafoyung ro wo sas fun Dabid at kindasug sabaliwa nung ami gfawayan,

²⁰ tibaginan ro kanya kadotama ay ginto emu te, ‘Ay wain ay faginkakbangun sas furuan daul? O nunda wam gamatangan te, ay fawayan ro fagayu gfana ayu siginan stungud alad?

²¹ O nunda wam namatang ebi gina Abimelek, Erub-Beset at baguama kabul sis Tebes? O nunda wam nasaful te, sik mangena nafatong siginans tungud alad sik gang fanligis trigu ay natuk sas Abimelek, ay kanya anbul? Ay wain ay fagnanangakbangun sas day alad?’ Ay kanya ro nu nainto sa emu takatanya, balusi ro anya te, ‘Anggan am fagsuguan Uryas fag taw Ket anbul wan.’ ”

²² Ay tagfosuk longan nalo wan. Ay kanya nu ndasug sas fun Dabid, kanya nalong Uab at nalong fagayu.

²³ Ay kanya glong te, “Em fawayan nafafalo emi sa sangaba datag, dewa katanya, nafafalo yaymi fia anya fagayu gfafoli sat furuan daul at sakbawan.

²⁴ Ay sanya ginan, em ngay fawayan tagsaful gfana nafana emi siginans tungud alad. Ay tiba am ngay tagfawayan anbul wan gasfuan am fagsuguan Uryas fag taw Ket.”

²⁵ Ay Dabid nalong sa tagfosuk longan te, “Nanlong o sas Uab te, ‘Lag kabalu sat kinfasludan, aroro wa tam saful te, sinu takabul sas awayan.’ Longi anya te, ‘Faksvni am amatanganan, ay fataglayuni nu gfawayan am yakmay am narasras kafag furuan.’ ”

²⁶ Ay Batseba nu nasaful te, at mangama Uryas anbul wan, kanya maksvn nu kabalu.

²⁷ Ay kanya nu nlangfe wan nu kabalu, Dabid nafauro Batseba ay nafasat bale daul laman at mangena. Ay wa glugo ya, kanya anke sisian sik munama. Dewa katanya, Dabid at nafakamulun maksvn nu mauri sas Yawi at daga salubangan.