2 Pedru 2 - Fanawbuid tagsibaliwas Fakayabian

Takamuagan fag ngay Takamoyung

¹ Ebi e takamuagan fag ngay taglong si sangay taw Israel, ay kadasug yangay ban sa ayu takatanya fag ngay taglong. Kafag ngay taw masuksukan nu gfadasug tagsalan ay at mauri fag ngay foyungan. Ay kanya fagayu kauri tam Fun, at nafalangfe anya fagayu. Nu katanya, faurianan ban masakit nu kadasug sa kafag ngay taw.

² Ay ngayu ban tagfaning kanya fagayu at ngay ugali, ay siginan ban takatanya tibak taw namalingun tam fagfaningun fag foyungan at matuyan.

³ Ay kafag ngay taw gdaya ban ayu siginan at ngay fakamuagun, aroro galabian salapi. Ngaduge wan faurianan nu mafalganan sa kafag ngay taw, ay munakbang wan kanya fagayu nu kamin.

⁴ Dius wa nfanyu ya takamabo fag ngay tagbarita. Abat ngate, kanya naubung kafag ngay tagbarita sasad lusung tangabasad ay at maksvn nu madulum. Kanya ban fagayu sanya way gugat nu dyakmay ban andasug nu ginsaful asalanan fag menit.

⁵ Ay Dius wa yangay anfanyu ebi fag ngay taw, ay kanya nafadasug sik lino daul laman gfamin kafag ngay taw at yud gfaning anya. Ay at kinlangfe, Nui way lang, ay at fadgaloan fag fitu. Nui wan at nafamoyung sat matuyan fag ugali.

⁶ Dius nafaurianan yangay Suduma ay Gumura fag duak furuan, ay nafamin tagsanya fagayu siginans afuy. Ay at kinfasludan sa kafag duak furuan sik famararang sat yud gfaning Dius.

⁷ Ay Dius nafalangfe Lut, sik taw matuyan; kanya kauri at mauri fag ngay taw at fakamulun at maksvn nu mapla.

⁸ Lut maksvn nu kabalu aroro siginan at nalag ay at nadungug fag ngay fagmauriun kayu menit, gina gbanwan magamut kafag ngay taw at mauri.

⁹ Nu katanya, amatangani te, tam Fun saful tua gfalangfe at matuyan fag ngay taw siginan sangay famaskud, ay saful yangay gfaurianan at mauri fag ngay taw gina ban andasug fanginsafulan asalanan fag menit.

¹⁰ Kaugat wan ngay tagfaning at bilug at fakaylatun, ay takauri tam Fun at fagmabalyananun. Takatanya fag ngay taw at yud gfangapla ay kamatungudun, ay wa gadgaragun gfalingun ngay awatan at mabalyanan tagsis banwa.

¹¹ Ngay tagbarita, dewa amabitsug yap tua kanya fag ngay taw, kanya wa gfalingun taw banwa si tam Fun at daga salubangan.

¹² Ay kanya fag ngay taw gfalingun nusnge wain deyud saful. Kanya kata way sik mangilafang at yud e amatanganan. Ay at faginsalugun laman taw ggamat ay gfabul anya. Kanya ban fag ngay taw kabul kata ngay mangilafang.

¹³ E namasud ban sa anya kata at nafakamulun fag fagmauriun sat iba. Ay kanya fag ngay taw wa kapla gfakamulun at mauri dewa gina mamenit. Ay gfadasug sa ayu at maksvn fag fagmaplaun ay fag fagafalingunanun, ay gdaya ayu gina am magamut gfangon.

¹⁴ Kafag ngay taw kabavn gdama gugat sa sangay mangena ay gamatangan sas fagfanugtugun, ay wa gfaragang nu gfakamulun sas asalanan. Kanya gtaban at ngay mamomuy fag taw sas asalanan, ay annanad wan sas fagfanganuranun. Kanya ban fagayu umfaurianan.

¹⁵ Kanya nasaruy at matuyan fag dalan ay nafaning Balaam, Beur at baguama, at ugali. Ay kaylat gbul famayad laman namakamulun at mauri.

¹⁶ Ay Balaam at asnu naringang kata sik taw ay nagras anya, ay nasalag anya sat fagyudun mamatanganan fag fakamulun.

¹⁷ Kanya fag ngay taw kata way at malanggangan fag bulbug, ay kata linyabu nu nauyupan fulug. Dius nafalganan wan sik fagmadulumun laman sa kafag ngay taw.

¹⁸ Kafag ngay taw kamaseganamaun nu garingang, dewa katanya, we tungkul at foyungan. Ay kanya fagayu gfamatanganan sas fagfanugtugun laman gfaylatan gfafoli sas asalanan ngay taw at bagu yay kalfas siginan at yud matuyan fag ngay ugali.

¹⁹ Kafag ngay taw gfatuyanan sat nafaylatan fag ngay taw te, “Nu gfaning tuam emi, umkalfas wam laman mafakamulun am nusnga setaw ay fakaylatun.” Ay dewa katanya, kanya fagayu gafagsuguanan asalanan tagfadasug anya fagayu sas faurianan. Aroro sik taw gafagsuguanan nusnga setaw tagfatawad gugat anya.

²⁰ Kafag ngay taw nu nalfas ste ginan swa daga fag fagmauriun siginan nu gtoglag Isus, tam Fun ay tam Tagfalangfe, ay kanya fagayu nu nfoli way ay nadog nagbilugan asalanan, nu mauri gtungud yay ebi taguna.

²¹ Amasine yap kafag ngay taw nu ddi ngap nasaful dalan tagsas fagmatuyanun, ay abandi ngap kanya nu gubun way at matuyan fag suguan at nafoyung sa anya.

²² Anud sik longan te, “Idu nu nafangkok, gdog yay kon at fangkok,” ay “Dewa e nafegus sik bumbu, nangafoli yay sat faglibliban.”