2 Pedru 1 - Fanawbuid tagsibaliwas Fakayabian

¹ Au, Simun Pedru, tam Fun Isus at nasugu ay at fagsuguan. Griruk au sa ayu at ngay nabul at mafanud fag fagafanudun kata emi, aroro sa tam Dius ay Tagfalangfe, Isus tam Fun, at fagmatuyanun.

² Sumawa fia ayu Dius at fagmagalangun ay at fagmanabayanun siginan ay natoglagan tam Fun Isus tam Dius.

Suguan sas Dius at ngay Nauro ay at Nafili

³ Dius at fagmabalyananun tagfon antam tam fagayudanun fagayu laman gugali tua tam gfaning anya, siginan tam natoglagan anya at nauro antam aroro siginan at fagmabalyananun ay at fagmasineun.

⁴ Siginan takatanya, kanya nafatuyanan sa antam fagayu nusnge wain at mafanud, laman ay ugali tagsiginan tuas Dius ay laman masaruy am at mauri fag ugali sis fagdaul daga.

⁵ Nu katanya, ugatani fia masine ay famuti sa ay fagafanudun fagmalukmeun, ay sas fagmalukmeun famuti fagsafulun.

⁶ Ay sas fagsafulun famuti fagfaragangun ay sadili, ay sas fagfaragangun ay sadili, famuti fagagwantanun, ay sas fagagwantanun, famuti fagfaningun sas Dius,

⁷ ay sas fagfaningun sas Dius, ay fakadkafanyuanun tagfaduksayan, ay sas fakadkafanyuanun famuti fakedkesuganun.

⁸ Nu kaksvn tua nu gugali am takatanya, di ban umyud e masuad ay natoglagan tam Fun Isus nu bunway e tungkul tua ban.

⁹ Ay nusnga sinu fag taw nu dway e si anya takatanya fag ngay ugali, kanya fag taw we fagsafulun sat matuyan, ay nalyam te, Dius nafalyam at ngay asalanan ebi ataw at nafakamulun.

¹⁰ Ku ngay faduksay, ugatani atuyani te, Dius tuam at ngay nafili. Aroro nu katanya tua ay fakamulun, di ban am kamomuy.

¹¹ Nu katanya, Isus, tam Fun ay tam Tagfalangfe, namaful ayu sat fagfagtainanan yud e fakatabuan ban kabavn.

¹² Gfamatang ktua gugat ayu, dewa am nasaful wan takatanya fagayu, ay dewa am maksvn wan sa ay nabul fag fagmatuyanun.

¹³ Gamatangan au te, kaduge au gleleg ste sfagdaul daga, masine nu gfamatang au gugat sa ayu sabaliwa takatanya fagayu.

¹⁴ Saful kwa te, wa glugo ya nu gleleg au, gfaning tam Fun Isus at foyungan angku.

¹⁵ Ay gfakamulun au fia fagayu laman ban deyud e au ya, gfataglayun tuam gugat gamatangan sat matuyan.

Nalag Ami tam Fun Isus at Fagmabalyananun

¹⁶ Em foyungan sa ayu sa baliwa tam Fun Isus at fagmabalyananun nu gdog ban kadasug, bundi lang siginans taw at fagsafulun ay at fagmamatanganun. Nu bunway nalag ami fia at fagmabalyananun,

¹⁷ gina tam Dius tam Mama gfon anya fagmasineun ay famauseganan. Anfasludan takatanya gina Dius garingang siginan tiba tungud fag fagmasineun te, “Tuy ku fakesugun ku Baguama; maksvn nu guseganan au anya.”

¹⁸ Nadungug ami kafag aringang tagsiginans banwa gina ami galo anya sit mafilian fag buksul.

¹⁹ Nu katanya, em fagafanudun nkugat yay nu kaksvn aroro siginan em nadungug tam Dius at ngay taglong at foyungan. Ay masine nu gdungugan am fia takatanya fag foyungan, takata sik salung tagdamlag sisad fagmadulumun nu dyakmay menit nadog ansure sbalabag. Ay kanya kata sik tagurabas gdamlag sa ay ngay amatanganan.

²⁰ Tagtungud sas fagayu, amatangani te, sis Dius at Longan we foyungan tagsiginan sik taglong at sadili famayamag.

²¹ Aroro Dius at ngay taglong at foyungan bundi siginan at ngay sadili amatanganan, nu bunway siginan tua at Masine fag Falad at gubuk laman kanya fagayu mafamoyung Dius at longan.