2 Kurintu. 6 - Fanawbuid tagsibaliwas Fakayabian

¹ Ami, taggubuk Dius at fakamulun, maksvn nu glong ami ayu te, lag am gfayud e tungkul Dius at nafon antam fag fagmagalangun.

² Aroro kanya nalong te, “Ebi gina au gfalag sa emu ku fakafanyun, nadungug ktua am darangin, ay ebi gina fakalangfean fag menit nagubuk ktua emu.” Amatangani, katsi wan at buknga nu gbul am Dius at fakafanyun. Katsi wan fag menit fakalangfean.

Pablu at ngay Fagidapun

³ Di mi gfataid nusnga sinu fag taw, laman di e gfalingun em fakamulun.

⁴ Nu bunway sas fagayu em balyawvtan gfalag ami sas fagayu taw te, ami wan Dius at ngay fagsuguan. Ay gagwantan ami at maksvn fag ngay fagidapun, ay fakabulun, ay at masakit fag ngay fagayudanun.

⁵ Nafalangan ami lubid, ay ankubung ami, ay ngay taw nafabadbaboan emi. Gfakamulun yay mi deyud fanfakamulunan ya, ay tibaginan wami gtiug ya fagngabak yabi, ay tibak menit wami gfangon ya.

⁶ Gfatoglag ami te, ami wan Dius at ngay fagsuguan siginan nu gugali ami at masine, ay siginan em fagsafulun, ay fagmagwantaun, ay fagmalukmeun, ay at masine fag amatanganan, siginan at Masine fag Falad at fanggubukun ay at matuyan fag fakesugun.

⁷ Gfoyung ami at matuyan, siginan Dius at fagmabalyananun. Dius at fagmatuyanun kanya wan em famawayan ay em famalabag.

⁸ E gfauseganan emi, ay e gfalingun emi, ay e glong at masine sabaliwa emi, ay e glong at mauri. Ay e nafangayan emi te, sik ngay takamuag, dewa matuyan em foyungan.

⁹ Ngay taw toglag oma emi, dewa katanya we gdungugan emi. Ay arvs gakabulun wami, ay dewa katanya gleleg yaymi. Ay dewa ami anfaurianan, yami nbul.

¹⁰ Maksvn nu kabalu ami, ay dewa katanya, guseganan tuami gugat. Dewa mi kata at yud e kwa, gfaramraman tuami ngayuk taw. Ay dewa mi kata at yud e fagagbilugun, e kwa tuami fagayu nusnge wain.

¹¹ Ngay taw Kurintu, matuyan tua nu gfoyung ami sa ayu, aroro maksvn nu kesug ami ayu.

¹² Di oma e kurang nu kesug ami ayu, dewa katanya, am, nu kesug am emi wa maksvn.

¹³ Kata sik mama nu glong sat ngay sisian, maksvn nu glong ami sa ayu te, esugi emi kata nu kesug ami ayu.

Lag Gfadgaloan at Yud Gafanud

¹⁴ Lag am gfadgaloan at yud gafanud fag ngay taw. Aroro wa masine gfagamutan at matuyan ay at mauri. Ay wa yangay masine gasfuan at mayamag ay at madulum.

¹⁵ Tam Fun Isus wa masine namadgaloan Satanas. Anggan sik tagafanud wa masine gfadgaloan at yud gafanud.

¹⁶ Ay Dius at bale wa masine namadgaloan sat yud matuyan fag ngay fagsegan. Itam wan tagleleg fag Dius at bale. Ay Dius yangay at nalong te, “Gbanwan kban ay galo kanya fag ngay taw. Au ban kafag ngay taw at Dius, ay kanya ban fagayu ku ngay taw.”

¹⁷ “Nu katanya, tam Fun glong te, Ayayui wan siginan kafag ngay taw. Ay lag am gted nusnge wain tagfasik masuya ayu. Nu nafakamulun tua ban am takatanya, kaylat kwan ayu.”

¹⁸ “Ay au waban fia ay Mama, ay am waban fia ku ngay sisian. Au wan, ay Fun at mabalyanan, at nalong takatanya.”