2 Kurintu. 5 - Fanawbuid tagsibaliwas Fakayabian

Tam Fagbanwanan sas Banwa

¹ Nasaful tam te, dewa ban anrasras wan tam fagbanwanan ste swa daga, at masuad tam bilug, tam Dius e nafalganan tua sik fagbanwanan at yud karasras kabavn, ay kanya fag fagbanwanan bunwa taw at nawat.

² Ay kaduge tam ste swa daga fag fagbanwanan, ginkidapan tam laman ban magbilug tua tam tagsis banwa fag fagbanwanan,

³ ay gina ban tam nagbilug kanya fag fagbanwanan, di tam malulasan ya.

⁴ Kaduge tam gbanwan ste swa daga, tam bilug at fagbanwanan katsi, e fagagwantanun tam ngay fagidapun. Ay dewa katanya, bunwa at masuad te, kaylat watam kabul, nu bunway kaylat tam namul sik bagu fag bilug, laman tam bilug takabul way umtubus sa sik bilug at yud kabul kabavn.

⁵ Dius wan at nafalganan takatanya sa antam, ay kanya nafon sa antam at Masine fag Falad laman tagfatuyan te, matuyan gtubus ban tam bilug.

⁶ Nu katanya, em amatanganan mabitsug tua gugat aroro nasaful wami te, kaduge tam ste swa daga si tam bilug fag fagbanwanan, ya tam si tam Fun at day tigyangan.

⁷ Gugali ami gfaning em fagafanudun, bundi ste swa daga takalag fagayu nusnge wain.

⁸ Guseganan wami, ay gamatangan wami te, masine wami gubun tuy fag bilug laman namanwan tuami sa tam Fun at day tigyangan.

⁹ Nu katanya, katsi em fakaylatun gfauseganan ami fia anya dewa ami ste yay swa daga ay anggan gina ban ami sit day tigyangan.

¹⁰ Aroro galay ban tam at sadi nangalindug tam sa tam Fun Isus at daga salubangan. Ay kanya nanginsaful te, o e asalanan tam, laman mul tam at famayad sas fagayu tam nafakamulun at masine ay at mauri kaduge tam gleleg ste swa daga.

Ngay Taw Ansadi sas Dius

¹¹ Dakngani saful wami te, masine nu gseg tua tam fia tam Fun, maksvn nu gugatan ami gfoyung sa sangay taw laman gafanud ban sa anya. Dius nasaful wan em kaugalian ay em fagsegun sumaful yangay am sabaliwa emi.

¹² Nafoyung ami sa ayu takatanya, bunwa te, kamatungudun ami em sadili sa ayu, nu bunway kaylat ami nu e fakamatungudunun am sabaliwa emi, laman saful tuam gbalus sa sangay taw takamatungudun nu gfakamulun, ay aroro mangaro wa katanya tagsit amatanganan.

¹³ Ay nu nkata ami sik tagfansaful, kanya aroro sas Dius. Ay em amatanganan nu matuyan tua, kanya tagfae fagmasineun ban ayu.

¹⁴ Tam Fun Isus wan at fakesugun tagsugu emi katanya. Aroro nasaful wami te, kanya anbul laman sas fagayu taw, nu katanya, fagayu tam antap yangay tam te, anbul tam gasfuan anya.

¹⁵ Kanya anbul laman sas fagayu taw laman fagayu taw tagleleg katsi wa gfaning at sadili, nu bunway gfaning tua tam Fun Isus at kinbul ay at nadog yay naleleg laman sas fagayu taw.

¹⁶ Nu katanya, siginan katsi wami gamatangan ya sabaliwas taw, kata takalag fagayu nusnge wain. Ebi taguna katanya way nu gtoglag ami tam Fun Isus, ay katsi di katanya.

¹⁷ Nu katanya, nusnga sinu at kinsadi sa tam Fun Isus kanya sik bagu tua fag taw. Naubun wan ebi ataw at ugali; katsi at ugali bagu wan.

¹⁸ Dius wan tagfakamulun takatanya fagayu. Ay tam Fun Isus nafafoli antam sas Dius, ay kanya nafili emi laman namafoli ami ngay taw sa anya.

¹⁹ Katatuy ku longan at masuad: siginan tam Fun Isus, Dius nafafoli fagayu taw sa anya, ay wa ban gamatangan ya kafag ngay taw at asalanan. Ay kanya nafatigwanan wan sa emi takatanya laman namafoli ami ngay taw sa anya.

²⁰ Fakatanyaun ami wan tam Fun Isus at ngay fagsuguan, ay Dius wan tagaringang sa ayu siginan emi. Aroro sa tam Fun Isus glong ami ayu te, asadii wan sas Dius.

²¹ Tam Fun Isus we asalanan, dewa katanya, aroro sa antam, Dius natap anya te, sik tagasalanan, laman siginan anya Dius gtap antam kata nu yud tam e asalanan.