2 Kurintu. 4 - Fanawbuid tagsibaliwas Fakayabian

Takarasras fag Fagsuadan

¹ Dius mafangafanyu tua, nu katanya kanya nafili emi laman gfakamulun ami sa baliwa at bagu fag nasadian, ay di kamomuy em amatanganan.

² Ay nu katanya naubun wami at mapla ay at masuksukan fag ngay fakamulun. Ay wami gfandaya ay wami gtubus Dius at Longan. Nu bunway, fagayu em foyungan matuyan tua. Dius wan em tagfatuyan, ay masine tua em amatanganan sa sangay taw at daga salubangan.

³ Ay nu e yud way togdungug sabaliwa em foyungan, takatanya fag taw tagafaurianan way.

⁴ Kafag ngay taw wa gafanud, aroro Satanas, tagfunan fagdaul daga, nafalikbug kafag ngay taw at amatanganan laman kafag ngay taw wa nalag at Masine fag Barita at yamag sabaliwa tam Fun Isus at fagmabalyananun. Tam Fun Isus wan Dius at aninu.

⁵ Gfoyung ami sa ayu sabaliwas Isus tam Fun, ay bunwa sabaliwa em sadili. Gfakamulun ami laman sa ayu aroro sas Isus.

⁶ Aroro Dius wan at nalong te, “E yamagi sasad madulum,” ay kanya yangay tagfayamag tam amatanganan laman tumoglag tam at fagmabalyananun at kinsure siginan tam Fun Isus.

⁷ Kafag ramraman siwa emi, ay ami kata waymi at fagsuadan fag tikung laman gfatoglag ami sas fagayu taw te, at yud e gtungud fag fagmabalyananun wa siginan em sadili, nu bunway siginan tuas Dius.

⁸ Dewa ndaginan way lang tagfaidapan emi, ay dewa katanya dimi nababawan. Tibaginan em amatanganan gawabilugan, ay dewa katanya e fagsegun tuami gugat.

⁹ Ay ngayu tagfauri emi, ay dewa katanya, Dius di gfabayan emi. Ngayu ginan nu e gfaidapan emi, ay dewa katanya dimi nbul.

¹⁰ Si tua gugat em bilug Isus at fakabulun, laman Isus at leleg kalag si emi.

¹¹ Kabavn munakbang ami sis fakabulun aroro sas Isus, laman Isus at leleg umsure si em bilug takabul.

¹² Nu katanya, kaduge ami garimanan gakabulun, gbul am leleg at yud e fakatabuan kabavn.

¹³ Kata at rirukan te, “Nafoyung au aroro gafanud au.” Ay katanya yangay em fagafanudun. Ay gfoyung ami aroro gafanud ami.

¹⁴ Aroro saful wami te, Dius wan at nafadog nafaleleg tam Fun Isus, ay kanya yangay ban gfaleleg anggan emi kata anya, ay gbuba ban antam sat day tigyangan.

¹⁵ Fagayu em fagagwantanun gfae fagmasineun tua ayu, laman Dius at fagmagalangun gina karapyag sas ngayuk taw, kaugat yay nu kaayu tagfauseganan ay tagseg anya.

Gleleg sas Fagafanudun

¹⁶ Nu katanya, di kamomuy em amatanganan. Ay em bilug dewa garimanan wan kamomuy, kayu menit kabitsug tua em amatanganan.

¹⁷ Em ngay fagidapun wa maksvn ay wa ngaduge. Ay kanya gfosuk emi sat yud e fakatabuan fag famonun at yud e gfasud.

¹⁸ Ay em fagfanyaun katsi bundi tagste swa daga takalag, aroro fagayu tagste swa daga e fakatabuan way ban. Ay dewa katanya, at yud kalag, kanya tua ban at yud e fakatabuan kabavn.