2 Kurintu. 12 - Fanawbuid tagsibaliwas Fakayabian

Pablu at ngay Taginfan ay sik ngay Foyungan

¹ Katsi nanfamatungudun au, dewa au nasaful te, takatanya we tungkul. Nanlong au sa ayu sabaliwa sik ngay taginfan ay sik ngay foyungan siginan tam Fun.

^2-3 Labi ufat wak banwa at kinlangfe, tam Fun nabuba angku sas fatuluk lanib banwa. Ginanya sik tagafanud kwan sa tam Fun Isus. Kwa nasaful fia te, o kanya sik taginfan way ay o mannga bundi, Dius way lang tagsaful.

⁴ Ay saful au te, andasug au sas Dius at fagbanwanan. Ay sanya e nadungug au, ay we taw mafayamag, ay we taw masine glong sanya baliwa.

⁵ Kamatungudun au sabaliwa ku nalag, ay bunwa sabaliwa ku sadili. Ku fagmamomuyun way lang ku fakamatungudunun.

⁶ Dewa au kamatungudun, di kata sik taw at yud mamatanganan, aroro matuyan tua ku foyungan. Dewa katanya, gfaragang au aroro kwa kaylat nusnga sinu fag taw nu gamatangan te, gfasawe au siginan ku nafakamulun ay ku nalong.

⁷ Ay dewa katanya, laman kdi kamanagsag sabaliwa Dius at foyungan sa angku at maksvn nu madulo, Dius nafadasug sa ku bilug sik fanmomuy daul, siginan Satanas at tagbarita nu gurus sa ku bilug sik takata sdugi. Dius nafadasug sa angku takatanya laman kdi kamatungudun.

⁸ Ay tulu ginan au gdarangin sa tam Fun te, “Buli wan tagsi angku fag dugi.”

⁹ Ay kanya nabalus angku te, “Ansak wan ku fagmagalangun sa emu, aroro ku fagmabalyananun kalag si emu gina o mamomuy.” Nu katanya, maksvn nu guseganan au kamatungudun sa baliwa ku fagmamomuyun laman tam Fun Isus at fagmabalyananun si tua gugat angku.

¹⁰ Aroro siginan tam Fun Isus, guseganan ktua, dewa au mamomuy, ay dewa e gfalingun, ay e gfaidapan ay e gfauri angku. Aroro kanya gfabitsug tua angku gina au mamomuy.

Pablu nu Kesug ngay Tagafanud sis Kurintu

¹¹ Ay ankata au sik yud mamatanganan, aroro am yay at nafabulun angku te, fakamuluni takatanya. Nu katanya, nauseganan tuam nangus sabaliwa angku. Ay dewa au yud e fagsafulun kdi naguyanan sa kafag ngay taw taglong te, kanya fagayu at ke fagsafulun fag ngay nasugu.

¹² Nafasaful au sa ayu te, sik matuyan au fag nasugu, siginan ku nafalag sa ayu fag ngay fakamulun at madulo.

¹³ Nataw at masine ku nafakamulun sa tibak furuan ku yud nafakamulun sa ayu? Kwe nafakamulun tiba, sas day nu yud au naet nusnga setaw sa ayu. Falyami wan kanya ku kakurangan sa ayu.

¹⁴ Ay katsi mafalganan au nansibo ayu at fatulu ginan. Ay kwa ban namaidapan ya ayu. Aroro am tua ku fakaylatun, bunwa ay ramraman. Aroro ngay fagtainan tua tagfaful fakonun laman sat ngay sisian, ay bunwa sik sisian tagfaful fakonun laman sat ngay fagtainan.

¹⁵ Guseganan au gfakamulun fagayu ku fakamulun ay gfon au anggan ku leleg aroro sa ayu. Wain ay fagyudun fia kesug angku, ay kaksvn wa kanya nu kesug au ayu?

¹⁶ Nasaful wam te, kwa nafaidapan ayu. Ay dewa katanya, tibak taw glong te, nadaya au ayu.

¹⁷ Tain nu gdaya au ayu? O nunda ku nasugu sa ayu fag ngay mangama e nabul nusnge wain siginan ayu?

¹⁸ Nasugu au sa ayu Titu ay nafaalo au sa anya at sadi tam faduksay. O nunda Titu e nabul siginan ayu? O nunda wa gsud em amatanganan ay em fakamulun?

¹⁹ Gamatangan wayam manga te, gyafafanudun way ami sa ayu te, ami wan at matuyan fag ngay nasugu? Duan. Kamoyung ami sis Dius at daga salubangan sa em fagmasadiun sa tam Fun Isus. Ku ngay fakesugun, nafoyung ami sa ayu takatanya laman gfaksvn ay fagafanudun.

²⁰ Aroro gafanawa au te, gina kban andasug sanya, e lagan kway ban manga ku fagyudun guseganan si ayu, ay e lagan yangay ban am manga ay fagyudun guseganan ku fakamulun, ay gawayan way ban am manga, ay galabian ay iba, ay kadkadotaman, ay gbadbaboan, ay glong at yud matuyan sabaliwa ay iba, ay ginasan sat yud matuyan, ay kamatungudun, ay gugali at yud matuyan fag ugali.

²¹ Gafanawa au te, nu nadog kban manga ndasug sa ayu, Dius ban manga gfapla way angku si ay daga salubangan. Nu katanya way ban, maksvn nu kabalu au aroro ngayu yay si ayu at ke asalanan, ay at yud yay naubun at fagmauriun ay at fagfanugtugun.