2 Kurintu. 11 - Fanawbuid tagsibaliwas Fakayabian

Pablu ay Takamuagan fag ngay Nasugu

¹ Ku ngay faduksay lag ro am gamatangan, katsi ro nu garingang au dewa way kata sik yud mamatanganan fag taw.

² Gafanawa au ayu kata Dius nu gafanawa ayu, aroro kata am sik diaga ku nafatuyanan sa sik mangama, ay kanya fag mangama we tiba nu bunway tam Fun Isus.

³ Dewa katanya, gamatangan au gugat te, ay ngay amatanganan manyayu siginan at matuyan ay nu gafanud am sa tam Fun Isus, kata Eba nu gadayan ule.

⁴ Aroro masakit nu kaylat am gdungugan sas nusnga sinu at kindasug laman kamoyung sabaliwa tibak Isus tagsaman em foyungan, ay kaylat yayam tibak falad, tagsaman ay nabul wan fag Masine fag Falad, ay gafanud am sa tibak masine fag barita, tagsaman em nafoyung sa ayu fag Masine fag Barita.

⁵ Ay nu gamatangan au nu gfoyung au sa ayu, kwa naguyanan sa sangay takadungug fag ngay nasugu.

⁶ Dewa yud masine nu garingang au, e fagsafulun ktua. Ay natuyan am te, matuyan, siginan nu gfoyung ami sa ayu sas fagayu balyawvtan.

⁷ Ay gina au gfoyung sa ayu at Masine fag Barita, kwa naet famayad siginan ayu. Nafamababaun au laman ggubuk ayu sabaliwa nu kaksvn ay fagafanudun. O takatanya ku fakamulun gfae asalanan way angku?

⁸ Ebi gina au gfoyung sa ayu, tibak tagafanud si tibak furuan gfon sa angku ku fagayudanun. Ay kata nu nafangkamul au at ngay fagagbilugun laman mafagubuk au ayu.

⁹ Ay gina au magamut si ayu, deyud au e kwa ya, kwa nafaidapan nusdi at sadi si ayu, aroro tam ngay faduksay siginans talun Masidunya nafosuk tua sa emi at fanggubukun. Siginans fakasigadan nasaruy au laman kwa gfaidapan ayu sas nusnga setaw fag balyawvtan, ay sas fagayu buknga gfakamulun au takatanya.

¹⁰ Ay aroro si tua angku tam Fun Isus at fagmatuyanun, ngay taw sis talun Akaya we mafaragang nu kamatungudun au.

¹¹ Wain ku fagfakamulunun takatanya? O at masuad kwa kesug ayu? Dius nasaful wa te, maksvn nu kesug au ayu.

¹² Ay gfataglayun au gfakamulun ku fakamulun takatanya laman tibak taw tagsanya we glong te, “Pablu at fakamulun kata yay em fakamulun.”

¹³ Takatanya fag ngay taw takamuagan way fag ngay nasugu ay tagfandaya fag tagfakamulun, ay kanya fagayu kamuagan te, “Ami wan tam Fun Isus at nasugu.”

¹⁴ Wa madulo takatanya. Aroro anggan Satanas mafaning yangay kata sik tagfae fagmayamagun fag tagbarita.

¹⁵ Nu katanya, wa tam kadulo Satanas at ngay fagsuguan nu kamaningan yangay te, “Ami wan fagmatuyanun at ngay fagsuguan.” Dewa katanya, kanya ban fagayu umfaurianan kata at nafakamulun.

Pablu Kamatungudun sabaliwa at ngay Fagidapun

¹⁶ Gdog kyay glong sa ayu te, nusnga sinu am, lag am gamatangan te, au kata kway at yud e amatanganan. Ay dewa katanya, nu katanya wan ay amatanganan, gfaning kwan laman anggan au kamatungudun kwan kata sik yud mamatanganan fag taw.

¹⁷ Nu kamatungudun au nu sa way baliwa ku sadili, ku aringang takatanya bunwa siginan tam Fun, nu bunway kata way sik yud mamatanganan fag taw at aringang.

¹⁸ Nu katanya, anggan au nanfamatungudun kyangay kata tibak taw takamatungudun ste swa daga.

¹⁹ Glong am te, e fagsafulun am, dewa katanya, naylat way am gdungugan at yud e fagsafulun fag ngay taw.

²⁰ Aroro naylat am nusnga sinu fag taw dewa gfagsuguan ayu, ay dewa gdaya ayu, ay dewa gtaban ayu, ay dewa kamaseganamaun sa ayu, ay dewa gfalingun ayu.

²¹ Maksvn mayngap nu mapla aroro wami kaseganama kafag ngay taw. Dewa katanya, glong ami te, wami makatu gfakamulun takatanya fag balyawvtan. Ay dewa katanya, kata tibak taw si ayu nu kamatungudun, au kamatungudun kyangay. Garingang au kata sik tagfansaful.

²² Kanya fagayu nu sik ngay taw Ebreu, anggan au sik taw Ebreu kyangay. Ay nu sik ngay taw Israel, sik taw Israel kyangay. Ay nu Abrayam at ngay kasugfunanan, anggan au Abrayam kyangay at kasugfunanan.

²³ O kanya fagayu tam Fun Isus at ngay fagsuguan? Au amatuyan kyap tua kanya fag ngay taw nu sik fagsuguan au. Nalong au takatanya kata sik tagfansaful, aroro nu gfakamulun au gtungud tua kanya fag ngay taw nu gfakamulun. Ngayu ginan au kaubung, ay kwa mafatap ya te, kayu ginan nya nu gafalangan au. Ay ngayu ginan au gsalubang sas fakabulun.

²⁴ Ay limak lao au gafalangan tuluk safulu e siamk fugfug.

²⁵ Tulu ginan au gafalangan taw Ruma at tagfawayan at famalang, ay sayginan gafanan gang siginans taw Udyu. Ay tuluk sakayan lino ku nasakay at kinrasras. Ay nu gfioan au sis fagngabasadan dagat, sik menit ay sik yabi.

²⁶ Ay nusnga nday au, nadalan au fagmalimuun: gina au gdife liskung, ay sa sangay tagfangkamul, ay sa ku ngay kaiban taw Udyu, ay anggan sas yud Udyu fag ngay taw, ay si sangay furuan, ay sas talun at yud e taw, ay sis dagat, ay sa tam ngay faduksay takamuagan.

²⁷ Ay nadalan kyangay at maksvn fag fagidapun, ay lufuy, ay malayun nu gintiugunan au, ay nainlunusan au maksvn, ay naindanuman. Ay batang kwa ginriosan aroro kwe lanbung.

²⁸ Ay saman ya takatanya, kayu menit maksvn nu gamatangan au sas fagayu tagafanud nusnga nday fag furuan.

²⁹ Ay sik tagafanud nu nmomuy at fagafanudun, kabalu au. Ay nu e nafakamulun way at mauri, maksvn nu gidapan au gamatangan.

³⁰ Nu kaylat au kamatungudun, ku fakamatungudunun sa way baliwa ku fagmamomuyun.

³¹ Matuyan ku longan, kdi kamuag. Dius, tam Fun Isus at Mama, nasaful wan. Kabavn segi anya.

³² Ay gina au sis furuan Damasku, fun Aretas nafaulit sat ngay tagulit fagayu sakbawan furuan laman nanggamat angku.

³³ Ay baliwan e nasuad tua angku sa sik bang daul ay nafatagbung sas day furuan at alad ay sanya ginan nalagyu kwan.