2 Kurintu. 10 - Fanawbuid tagsibaliwas Fakayabian

Pablu nu Gfabadbaboan sabaliwa at Fakamulun

¹ Siginan tam Fun Isus at fagmagalangun ay nu kamababaun, au Pablu glong au sa ayu te, dungugani angku. Tibak taw glong te, nu magamut au si ayu malukme ktua, ay nu nyayu au siginan ayu maksvn nu gfangagras au.

² Tibak taw glong te, em ugali kata way at yud gafanud fag ngay taw at ugali. Nu katanya, nu ndasug kban sanya, gamatangan au te, maksvn nu garingang au sas nusnga sinu at nalong takatanya. Get au sa ayu te, lag am glong takatanya, laman ban kwa gfagaras nu garingang au sa ayu.

³ Ay dewa ami gbanwan ste swa daga, em famawayan bunwa tagste swa daga fag ngay balyawvtan.

⁴ Tam ngay famawayan bundi siginans taw at fagmabalyananun, nu bunway siginan tuas Dius, ay at fagmabalyananun tua tam famabo at ngay fawayan.

⁵ Ay grasras ami nusnga setaw fag famabadbaboan ay fagayu takamatungudun laman gsalag tibak taw nu kae fagsafulun sabaliwas Dius. Ay gtaban ami fagayu taw laman gfaning tua tam Fun Isus.

⁶ Ay gina ban mi natuyan te, mafamaning tuam, mafalganan ban mi gfaurianan fagayu takamabo.

⁷ Ay fagdamaun tagste way sfagdaul daga. Ay nusnga sinu tagamatangan te, sia wan tam Fun Isus at taw, kanya masine nu gamatangan yangay te, au tam Fun Isus kyangay at taw.

⁸ Kwa kapla dewa au kamatungudun sabaliwa em fagmabalyananun tam Fun at nafon sa emi laman tagfaksvn ayu, bundi tagfamomuy ayu.

⁹ Lag am gamatangan te, siginan ku rirukan gfalimuanan au ayu.

¹⁰ Aroro tibak taw glong te, “Pablu gfangagras sit ngay rirukan, ay dewa katanya, nu ndasug wan, at bilug momuy way, ay we tungkul at foyungan.”

¹¹ Ay kafag ngay taw taglong takatanya masine nu sumaful te, nusnga setaw em longan si em rirukan katsi dewa ami ngayayu, katanya yangay ban em fakamulun gina ban mi andasug sa ayu.

¹² Wami kaylat namaladlabian em ngay sadili sa sangay taw takamatungudun sat sadili. Kanya fagayu we fagsafulun, aroro namaladlabian way at ngay fakamulun siginan at mesa fagmaseganamaun.

¹³ Ay ami dimi gsawe nu kamatungudun ami, nu bunway em fakamatungudunun sa tuas Dius at nafatigwanan sa emi fag fakamulun, laman gfoyung ami anggan sa ayu at Masine fag Barita.

¹⁴ Ay andasug tuami laman namoyung sa ayu at Masine fag Barita sa baliwa tam Fun Isus. Ay satu nu dway ro mi andasug sa ayu, nasawe wan nu kamatungudun ami.

¹⁵ Wami kamatungudun sa tibak taw at nafakamulun, kata nu ami at nafakamulun. Gseg ami fia te, kaksvn wam sa ay fagafanudun, laman em fakamulun kaugat yay nu karapyag sa ayu.

¹⁶ Ay nu katanya tua, mafamoyung kyangay at Masine fag Barita sa sangay furuan at munakbang si ayu, laman kwa kamatungudun sabaliwa tibak taw at nafakamulun.

¹⁷ Kata at longan sit Rirukan te, “Nusnga sinu takaylat kamatungudun, nu kamatungudun sai tua baliwa tam Fun.”

¹⁸ Aroro tam Fun wa kaylat sik taw tagseg at sadili, nu bunway at fakaylatun tagseg tua anya.