2 Kurintu. 1 - Fanawbuid tagsibaliwas Fakayabian

¹ Au Pablu, tam Fun Isus at nasugu kata Dius at fakaylatun. Ay tam faduksay Timuteu magamut si angku. Griruk ami sa ayu, Dius at ngay taw sis Kurintu, ay at nafili fag ngay taw sis talun Akaya.

² Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

Pablu at Fagusegananun

³ Segi Dius, tam Fun Isus at Mama, kanya mafangafanyu tua ay gfon fagmasunun.

⁴ Kanya wan tagfasun antam sas fagayu tam fagidapun, laman mafasun yangay tam fagayu at ke fagidapun, kata Dius nu gfasun antam.

⁵ Ay nu seyu em nadalan fag fagidapun aroro siginan em fagmasadiun sa tam Fun Isus, kayu yangay fia nya em nabul fagmasunun siginan anya.

⁶ Ay em ngay fagidapun gfasun ay gfalangfe ayu. Dius nu nafasun tua emi, kanya sik famasun yangay ayu, laman mafasun ami fia ayu nu nadalan ban am fagidapun kata em nagdalanan.

⁷ Maksvn em fagsegun sabaliwa ayu, aroro nasaful wami te, e gfasun yangay ban ayu kata nu e nafasun emi, aroro masadi tuam sa em fagidapun.

⁸ Em ngay faduksay, kaylat ami gfasaful sa ayu em nadalan fag ngay fagidapun gina ami sis talun Asya. Maksvn tua em nadalan, at kaksvnan arvs wami e fagsegun ya te, gleleg yay ban mi.

⁹ Ay ginanya gamatangan ami te, umbul waro mi. Nadalan ami takatanya fagayu laman wami gseg em sadili nu bunway laman gafanud tuami sas Dius, tagfadog gfaleleg at ngay kinbul.

¹⁰ Dius nafalangfe tua emi siginan kafag ngay faurianan tagfabul ma emi, ay gfataglayun tua nu gfalangfe emi. Ay gafanud ami te, kanya ban gfataglayun tua gfalangfe emi,

¹¹ siginan ay darangin at gubuk. Nu katanya, ngayu ban tagseg Dius aroro nafon tua sa emi nusnga setaw at masine, at famalus ay ngay darangin.

Pablu Nafabali at Algan

¹² Kamatungudun ami te, gugali tuami at yud e malong ay at matuyan si sangay taw at daga salubangan, ay kaugat wan sa ayu. Ay anke ugali ami takatanya, bunwa siginans fagdaul daga fag fagsafulun, nu bunway siginan tua Dius at fagmagalangun.

¹³ Em rirukan sa ayu ay fagmafatapun tua, ay ay fagtogdungugun. Ku fagsegun te, tumogdungug am fia em longan,

¹⁴ deyud am fia togdungug. Fakatanyaun laman ban e fakamatungudunun tuam sabaliwa emi, gina tam Fun Isus andasug fag menit, kata nu kamatungudun ami ayu.

¹⁵ Aroro gafanud au fia katanya, ku algan sa ban ayu taguna nu glao au, laman kaksvn ay fagusegananun.

¹⁶ Ku algan nandalan au sa ayu gina kban sas talun Masidunya, ay nu siginan kbans Masidunya kafoli kyay sa ayu laman ban ggubuk am angku gina au sas talun Udea.

¹⁷ Katanya ku algan. O katsi gamatangan am te, gfabadbalian kway ku amatanganan? O kata kway sik taw taglong gugat te, “Sabv” ay aroro mangaro “Duan” way?

¹⁸ Duan. Aroro nu setain Dius nu matuyan, katanya yangay ku longan ayu, wami glong te, “Sabv” ay “Duan.”

¹⁹ Au ay Silas ay Timuteu, em foyungan sa tua baliwa Dius at Baguama, Isus tam Fun. Ay em foyungan bunwa Sabv, abandi ban nu Duan way, nu bunway kata tua Isus nu yud gfabadbalian at fatuyanan.

²⁰ Aroro Isus wan tagfafasludan Dius at fatuyanan fagayu. Ay nu katanya siginan anya, guseganan tam te, Dius matuyan.

²¹ Dius wan tagfaksvn emi ay ayu, siginan tam fagmasadiun sa tam Fun Isus, ay kanya yangay at nafili antam.

²² Dius nafatuyan te, itam wan at ngay taw, ay kanya nafasa antam at Masine fag Falad laman tagfatuyan te, mul ban tam at ngay fatuyanan.

²³ Dius wan ku tagfatuyan te, ku fagyudun andasug sanya laman kdi gfae fakabaluun ayu.

²⁴ Em fakaylatun wami namagtainan ayu sas fagafanudun, nu bunway ggubuk ami ayu laman guseganan tuam aroro maksvn wan ay fagafanudun.