2 Krunika 17 - Fanawbuid tagsibaliwas Fakayabian

Eusafat nu Gfunan Talun Uda

¹ At natubus Asa laman sik fun, at baguama Eusafat. Ay Eusafat nafaksvn at fagfunanun, laman manamawayan sas Israel.

² Ay kanya nasugu at ngay tagfawayan laman nangulit sat ke alad fag ngay furuan sis Uda, ay kanya nawat yangay at ngay tagfawayan at fagulitan fag bale sis talun Uda ay si sangay furuan sis Efraim, at mama Asa at nagbilug.

³ Ay Yawi naufud Eusafat, aroro gina taguna fag ngay banwa kanya nu gfunan, nafaning tua at mangaguyang Dabid nu mabanwan. Kanya di nananget gubuk sas Baal fag ngay fagsegan,

⁴ nu bunway kanya ankakbang tua sat mama at Dius ay nafaning tua at ngay suguan, abat ngate, gfaning ngay taw Israel nu gugali.

⁵ Yawi nafaksvn Eusafat at fagfunanun, ay ngay taw Uda nafon sa anya at ngay famonun. Nu katanya, kanya anramraman ay ansik takadungug.

⁶ Ay kanya gfaning tua Yawi at ngay balyawvtan. Kanya nanamaiklas ngay fagnansegan si tangabat fag ngay buknga, ay anggan ngay turuk fagtoglagan Asera fag fagsegan sis talun Uda.

⁷ Ay gina sis fatuluk banwa nu gfunan, kanya nataban at ngay tagfangguna: Ben-Kail, Ubadyas, Sakaryas, Netanel, ay Mikaya laman namoyung sa sangay furuan sis Uda.

⁸ Ay galo yangay anya fagayu ngay taw Lebi: Semaya, Netanya, Sebadya, Asael, Semiramut, Eunatan, Adunya, Tubya, Tub-Adunya, ay ngay tagfon fanggalangun: Elisama, ay Euram.

⁹ Ay kanya fagayu gbuba fagrirukan Yawi at suguan, ay nadalanan sas fagayu furuan sis Uda, ay kanya fagayu nafoyung sa sangay taw.

¹⁰ Yawi naylat fagayu fagfagtainanan at munakbang sis talun Uda nu kalimu tua anya, nu katanya, we manamawayan ya fun Eusafat.

¹¹ Ay tibak taw Filistia nabuba at ngay famonun fag ngay salapi laman at famayad sas fun Eusafat, ay ngay taw Arabya nanamon yangay fituk libu fituk sandank tupa ay fituk libu fituk sandank kambing.

¹² Nu katanya, ankaksvn yay Eusafat nu mabalyanan. Kanya nafawat sis talun Uda at mogat fag ngay fagsarigan ay ngay furuan fagfungsuan gutluan.

¹³ Ngayu at nafaful tagsaman saman fag ngay ramraman sa sangay furuan sis Uda. Ay kanya nafasas furuan Erusalem at ngay tagfawayan tagsaful ay at maseganama.

¹⁴ Ay nariruk at ngay tagfawayan at ngay ngayan kata at mesa talanan. Siginans Uda at kasugfunanan, Adna wan tagfangguna tuluk sandank libuk tagfawayan tagsaful ay at maseganama, ay nafud sas sadik libu galay sik gaban.

¹⁵ Ay at faduak tagfangguna Eukanan, kanya gfangguna duak sandan waluk safuluk libuk tagfawayan.

¹⁶ At fatulu Amasya, Sikri at baguama, kanya gfangguna duak sandank libuk tagfawayan tagsaful ay at maseganama. Kanya mafalganan gfakamulun Yawi at fakamulun.

¹⁷ Ay siginans Benamin at kasugfunanan Elyada sik taw at maseganama, ay gfangguna duak sandank libuk tagfawayan. Kanya fag ngay tagfawayan e ngay famalabag ay e ngay godun.

¹⁸ Ay at fadogan, Eusabad tagfangguna sadik sandank waluk safuluk libuk tagfawayan at ke ngay famawayan.

¹⁹ Kanya fagayu fun Eusafat at ngay tagfakamulun, saman ya at ngay tagfawayan sa sangay furuan at ke ngay alad tagsis talun Uda.