2 Fun 6 - Fanawbuid tagsibaliwas Fakayabian

Sik Wase at Kintong sasad Mamam

¹ Sik menit, ngay taglong ankakbang sas Elisyu, ay glong te, “Nalag wo, tam fagmafulan gugat fag bale alay yay.

² Nu katanya, nantaban ami emu laman nanfangkayu tam sas tigyangan Liskung Urdan. Sanya, ngayu fag kayu, ay sanya wa ro nu kawat tam tam fagmafulan fag bale.” Ay Elisyu nalong te, “Agvd, loi wan.”

³ Dewa katanya, sanya at sadi glong te, “Takamoyung, nu masine di, gadgaloan yap tam.” Ay Elisyu nabalus te, “Kin, bastam.”

⁴ Ay nalao wan. Ay kanya fagayu nu ndasug sas tigyangan Liskung Urdan, gfangkayu wan.

⁵ Kaduge at sadi gfuan, at ba wase antong sasad fagngabasadan lino, ay kanya guro te, “Takamoyung, tain ro manga, ay ku ulbusan way!”

⁶ Elisyu nainto te, “Dada baliwa nu katong?” Ay kanya nafoyung. Ay Elisyu nagatvng sik kayu at sanga ay naukas sasad lino, ay wase ansure.

⁷ Ay Elisyu nalong te, “Buli wan.” Ay kanya nanamul.

Elisyu Nafaragang ngay Taw Aram nu Nanamawayan

⁸ Aram at fun gina gfawayan Israel, kanya nafakamatoan at ngay fun tagfawayan, ay nalong te, “Nangaful tam sanya.”

⁹ Ay Elisyu nalong sas Israel at fun te, “Dirii tua! Lag am gdalan sanya fag talun, aroro ngay taw Aram nangaful sanya.”

¹⁰ Nu katanya, Israel at fun nafainsaful sanya fag furuan te, o matuyan. Ngayu ginan Elisyu nu gfararang sas fun, laman kanya wa nandalan sanya.

¹¹ Aroro sa takatanya, Aram at fun andotama, ay nafauro at ngay fun tagfawayan ay nalong te, “Sinu am tagfadiuganan Israel at fun?”

¹² At sadi at fun tagfawayan nabalus te, “Em fun, wami e gfadiuganan. Elisyu, fag taglong sis Israel, at nafoyung sas Israel at fun fagayu nusnge wain am nalong, dewa am nalong sim suluk.”

¹³ Ay Aram at fun nalong te, “Loi wan nanrvbvy am anya laman masugu au at nanggamat anya.” Ay ginanya e nalong sa kafag fun te, “Elisyu sis furuan Dutan.”

¹⁴ Ay kanya nasugu sanya ngayuk tagfawayan, tiba gsakay sit ngay kabayu ay tiba gsakay sis kabayu at faguyudan. Ay mayabi wan kanya fagayu nu kadasug sas furuan Dutan ay kanya fagayu naligung.

¹⁵ Elisyu at fagsuguan anfulo mayabas ay nalag at ngay fawayan nu gsakay sit ngay kabayu ay sit ngay faguyudan maligung kafag furuan, ay kanya nalong sas Elisyu te, “Fagtainan, tain ro ta fakamulun?”

¹⁶ Ay Elisyu nabalus te, “Lag o kalimu. Anta, ta ufud ayu yap tua anya fagayu.”

¹⁷ Ay Elisyu gdarangin te, “Yawi, luangi ku fagsuguan at ngay mata laman glag.” Ay Yawi naluang Elisyu at fagsuguan at ngay mata. Ay kafag fagsuguan nalag te, ngay kabayu mapnu ngay buksul, ay tagigang fag ngay faguyudan gligung Elisyu.

¹⁸ Kaduge at ngay fawayan kakbang sas Elisyu, kanya gdarangin sas Yawi te, “Fadarafuni kafag ngay tagfawayan.” Ay Yawi nafadarafun kanya fagayu kata Elisyu at fagetun.

¹⁹ Ay Elisyu nalong sat ngay fawayan te, “Wa stae ay dalan ay bunwa tuy ay fagrvbvyun fag furuan. Aloi angku; nantaban au ayu sa ay fagrvbvyun fia fag taw.” Ay Elisyu nataban anya fagayu sas furuan Samarya.

²⁰ Ay gina kanya fagayu gsakbo sas Samarya, Elisyu gdarangin te, “Yawi, fabuskadi at ngay mata laman glag.” Ay Yawi nafabuskad Aram at ngay tagfawayan at ngay mata, ay kanya fagayu nalag te, siwas furuan Samarya.

²¹ Israel at fun nu nalag anya fagayu, nainto sas Elisyu te, “Fagtainan, o gfabul kwa anya fagayu?”

²² Ay Elisyu nabalus te, “Lag gfabul. O nunda gfabul tam tam ngay nataban siginans fagawayanan? Foni fakonun ay fanginum sa anya fagayu ay faulii sat fun.”

²³ Ay at fun nafalganan sik tagbia fag yafun laman sa kafag ngay tagfawayan, sanya ginan nafauli wan sat fun. Ay siginan ginanya, ngay taw Aram wa nadog ya namawayan talun Israel.

E Naligung Samarya

²⁴ Sik menit, Ben-Adad, Aram at fun, nafaful fagayu at tagfawayan, ay naligung furuan Samarya.

²⁵ Nu katanya, sanya fag furuan anke maksvn fag fanlunus, ay ankabyat at ngay fagbulun nu kabayad. Sik asnu at alfuyu nu kabayad waluk safuluk salapi, ay ifut labikung sik wabilug fantas limak salapi.

²⁶ Sik menit, gina Israel at fun gdalan sis tigyangan alad, sik mangena nauro anya te, “Mesug fag fun, gubuki angku.”

²⁷ Ay kanya nabalus te, “Yawi nu dway nagubuk emu, tain ro nu magubuk au emu? Wa tam e trigu ya ay e fanlangu ku fon emu.”

²⁸ Ay fun nainto te, “Nataw fia am fagidapun?” Ay kafag mangena nabalus te, “In ku sena nalong angku te, ‘Kon wata am munama, ay balabag ban ku munama man.’

²⁹ Nu katanya, nafatama wami ay naon ku munama. Ay balabag di, nalong au anya te, ‘Emu man am munama ta fagfabulun laman ta fakonun,’ dewa katanya, kanya nasuksuk way.”

³⁰ Ay fun nu nadungug kafag mangena at longan, nagirat at lanbung aroro maksvn nu kabalu. Kaduge kanya sis day alad, ngay taw nalag anya nu masulunan saku sit daga lanbung aroro kabalu.

³¹ Kanya nalong te, “Dius ro nangus maksvn nu gfaurianan angku, kway ro nagatvng Elisyu, Safat at baguama at liug katsi fag menit.”

³² Ay ginanya, Elisyu malunggung sit bale gfakamatoan Israel at ngay fagtainan gina at fun gsugu at fagsuguan laman gfauro anya. Ay fun at nasugu gina yud yay andasug, Elisyu nalong sa kafag ngay fagtainan te, “Kafag takamabul taw nasugu sik taw laman nanggatvng ku liug. Ay kanya ro fag taw nu ndasug, dingdingi sakbawan ay lag gfasakbo. Ay matuyan, at tagfayafun ro gguyan fia anya.”

³³ Kaduge Elisyu garingang, kafag fagsuguan andasug ay fun glong te, “Yawi nafadasug sa antam fagidapun. Nu katanya, wain ku fagfanyaun yay at gubuk?”