2 Fun 24 - Fanawbuid tagsibaliwas Fakayabian

¹ Gina Yuyakim gfunan, Nabukudunusur, Babilunya at fun, nanamawayan anya. Kaduge tuluk banwa Nabukudunusur nafagsuguan Yuyakim, dewa katanya, sis fatuluk banwa, Yuyakim nafawayan anya.

² Yawi nafadasug sa anya ngay taw Babilunya, taw Aram, taw Muab, ay taw Amun fag ngay tagakabayuan laman namarasras Uda, kata Yawi at nalong sat ngay fagsuguan fag ngay taglong.

³ Anfasludan takatanya sas Uda kata Yawi at suguan, Yawi naiyan ngay taw Uda siginan at daga salubangan aroro sas Manase at asalanan ay at ngay nafakamulun.

⁴ Manase nafabul ngay taw at yud e kwa ay nafatayuk taguk sas Erusalem, ay Yawi wa nafalyam at asalanan takatanya.

⁵ Ay tiba ya at kinfasludan kaduge Yuyakim gfunan ay fagayu at nafakamulun anriruk sis fafil fagrirukan sabaliwas Uda at ngay fun.

⁶ Yuyakim anbul, ay at baguama Yuyakin at natubus anya laman sik fun.

⁷ Igiptu at fun wa namawayan ya tibak talun, aroro Babilunya at fun naago wan sik afud at talun, siginans fagfamiluganan mamam sis talun Igiptu, sitsigons Liskung Eufrates.

Yuyakin Gfunan Talun Uda

⁸ Yuyakin labi waluk banwa gina gfasigad gfunan, ay kanya gbanwan sis Erusalem, ay nu gfunan tuluk magdanun. At mina Nekusta sik taw Erusalem, Elnatan at baguina.

⁹ Kanya mauri at nafakamulun sis Yawi at daga salubangan, kata at mama Yuyakim at nafakamulun.

¹⁰ Gina kanya gfunan, talun Babilunya at fun Nabukudunusur at ngay fun tagfawayan nanamawayan sas Erusalem ay naligung.

¹¹ Gina Babilunya at ngay tagfawayan gligung Erusalem, fun Nabukudunusur nalao sanya.

¹² Yuyakin, Uda at fun, ay at mina, ay at ngay fagsuguan, ay takadungug fag ngay taw, ay ngay fun sirut nafamababaun sas Nabukudunusur. Ay gina fawaluk banwa fun Nabukudunusur nu gfunan sis Babilunya, kanya nataban Yuyakin.

¹³ Kata Yawi at longan, fun Nabukudunusur nabul fagayu ramraman sis Yawi at bale ay sis fun at bale. Kanya nabul yangay nusnge wain at mawatan siginans gintu, Sulumun, Israel at fun, at nafawat laman sas Yawi at bale.

¹⁴ Kanya nataban fagayu tagbanwan sis Erusalem, gadgaloan fagayu fun tagfawayan ay at ngay tagfawayan, anggan ngay tagsaful kawat at masine fag ngay fagagbilugun. Nu fagayu wan, safuluk libuk taw. At sawad, at yud way lang e kwa.

¹⁵ Fun Nabukudunusur nataban yangay Yuyakin sas Babilunya, gadgaloan at mina, ay at ngay bubay, ay at ngay fun sirut, ay at takadungug fag ngay taw sis Uda.

¹⁶ Fun Nabukudunusur nataban yangay fituk libuk tagfawayan at maseganama, ay sadik libuk tagsaful kawat at masine fag ngay fagagbilugun.

¹⁷ Ay kanya nafili Matanya, Yuyakin at sai, laman sik fun, ay nafangayan anya te, Sedekya.

Sedekya nu Gfunan Talun Uda

¹⁸ Sedekya at banwa duak safulu e sadi gina gfasigad gfunan. Kanya gbanwan sis Erusalem ay nu gfunan labi sadik banwa. At mina Kamutal, Eremyas at baguina fag taw Libna.

¹⁹ Sedekya at fakamulun mauri way sis Yawi at daga salubangan, kata fun Yuyakim.

²⁰ Nu katanya, Yawi andotama, ay naiyan ngay taw Erusalem ay taw Uda siginan at daga salubangan. Ay Sedekya nafamabo talun Babilunya at fun.