2 Fun 21 - Fanawbuid tagsibaliwas Fakayabian

Manase nu Gfunan Talun Uda

¹ Manase at banwa labi dua gina gfasigad gfunan. Ay kanya gbanwan sis Erusalem ay nu gfunan limak safulu e limak banwa. At mina Kefsiba.

² Ay kanya mauri way at nafakamulun sis Yawi at daga salubangan. Kanya nafaning way Yawi at naiyan fag ngay taw at ngay fagmauriun. Yawi nafababawan anya fagayu sa sangay taw Israel.

³ Kanya nafadog yay nafawat ngay bale fagnansegan sa tangabat fag ngay buknga at mama Esekyas at naiklas. Kanya nawat yangay ngay fagirugan laman sas Baal, ay nawat turuk fagtoglagan Asera fag fagsegan mangena, kata Akab, Israel at fun, at nawat. Ay kanya naseg fagayu nusnge wain tagsis banwa.

⁴ Ay nawat yangay ngay fagirugan fanggalangun sis Yawi at bale, ay Yawi nalong sabaliwa at bale te, “Sis Erusalem e gfauseganan tua ban angku kabavn.”

⁵ Ay kanya nafatungkud kafag ngay fagirugan fanggalangun sis Yawi at bale at duak fagaweanan, laman kanya nanseg fagayu tagsis banwa.

⁶ Ay kanya nairug at sisian laman at fanggalangun. Ay kanya nafakamulun kata ngay taginsaful ay tagfangufit, ay nainto sa sangay tagfakamatoan sat ngay kinbul at falad. At ngay fakamulun maksvn nu mauri, ay gfadotama Yawi.

⁷ Ay kanya nafasakbo sas Yawi at bale at nafawat fag turuk fagtoglagan Asera fag fagsegan, nu inda Yawi at nalong sas Dabid ay sat baguama Sulumun te, “Ste si ku bale ay sis Erusalem, ku nafili laman sas fagayu taw Israel at ngay kasugfunanan, at fagnamauseganan angku kabavn.

⁸ Ngay taw Israel ban nu gfaning tua fagayu ku ngay suguan ay ku faugali, ku fagsuguan Muisis at nalong sa anya fagayu, kwa ban gdog ya gaiyan anya fagayu ste ginan fag talun ku nafon sat ngay mangaguyang.”

⁹ Dewa katanya, kanya fag ngay taw wa kaylat gdungugan, ay Manase nafaylat ngay taw Uda ay Erusalem, laman gfakamulun at mauri, ay kanya fagayu at nafakamulun gtungud yap tua tibak gaban taw at nafakamulun mauri. Yawi nafamin kafag ngay taw si sangay taw Israel at daga salubangan.

¹⁰ Yawi nalong te, siginan at ngay fagsuguan fag ngay taglong:

¹¹ “Manase, Uda at fun, nafakamulun at maksvn nu mauri, amauri yap tua ngay taw Amur ngay taw Israel at naungbus sanya fag talun.

¹² Nu katanya, au Yawi, Israel at Dius, namadasug au fagidapun sas Erusalem ay sas Uda, ay fagayu at nadungug takatanya umlimu.

¹³ Namaurianan au Erusalem kata nu gfaurianan au Samarya ay fun Akab fag talanan. Namegus au Erusalem kata sik fagsuadan at mafegusan ay mafaluban.

¹⁴ Naiyan au dewa ku ngay taw at sawad, ay nafatabanan au sat ngay fawayan.

¹⁵ Umfasludan takatanya sa anya fagayu aroro nafakamulun at mauri sa ku daga salubangan, ay kanya fagayu nafadotama angku, siginan nu gfaduksun au at ngay mangaguyang siginans talun Igiptu dasug katsi.”

¹⁶ Ngayu Manase at nafabul at yud e asalanan ay at ngay taguk ankapnu Erusalem at dalan. Saman ya nu gfae asalanan ngay taw Uda sis Yawi at daga salubangan.

¹⁷ Ay tiba ya at kinfasludan kaduge Manase gfunan ay fagayu at nafakamulun anriruk sis fafil fagrirukan sabaliwas Uda at ngay fun.

¹⁸ Manase nu nbul wan, nanamoli anya sis day bale daul, sis Usa at tanuman. Ay at baguama Amun at natubus anya laman sik fun.

Amun nu Gfunan Talun Uda

¹⁹ Amun at banwa duak safulu e dua gina gfasigad gfunan. Ay kanya nabanwan sis Erusalem, ay nu gfunan duak banwa. At mina Mesulemet, Karus at baguina tagsiginans Utba.

²⁰ Ay kanya mauri way at nafakamulun sis Yawi at daga salubangan, kata at mama Manase.

²¹ Kanya nafaning at mama at ugali ay naseg at mama at naseg fag ngay fagsegan.

²² Ay kanya natalyuyan at ngay mangaguyang at Dius, Yawi. Ay kanya wa nabanwan kata Yawi at balyawvtan.

²³ Ay Amun at ngay fagsuguan anke algan mauri sa anya, ay kanya fagayu nafabul anya sit bale.

²⁴ Dewa katanya, ngay taw Uda nafabul fagayu at nafabul Amun. Ay kanya fagayu nafili at baguama Usyas at fantubus anya laman sik fun.

²⁵ Ay tiba ya at kinfasludan kaduge Amun gfunan ay fagayu at nafakamulun anriruk sis fafil fagrirukan sabaliwas Uda at ngay fun.

²⁶ Ay nanamoli anya sat fagfolian sis Usa fag tanuman. Ay at baguama Usyas at natubus anya laman sik fun.