2 Fun 16 - Fanawbuid tagsibaliwas Fakayabian

Akas nu Gfunan Talun Uda

¹ Gina sis falabi fituk banwa Peka, Remalya at baguama nu gfunan sis Israel, Akas, Utam at baguama gfasigad gfunan sis Uda.

² Akas gina gfasigad gfunan, at banwa duak safulu. Ay kanya gbanwan sis Erusalem, ay nu gfunan labi unumk banwa. Ay kanya nafakamulun at mauri sit Dius Yawi at daga salubangan, ay wa nafaning at mangaguyang Dabid at nafakamulun.

³ Kanya nafaning way Israel at ngay fun, ay kanya girug gugat at ngay famaebebanglu fag lune sis datag Ben-Inum, ay girug yangay at ngay baguama laman at fanggalangun. Kanya nafaning tibak gaban taw at maksvn nu mauri, Yawi at naiyan siginan sangay taw Israel.

⁴ Kanya gfon gugat at ngay fanggalangun, ay girug gugat ngay famaebebanglu fag lune sa sangay fagnansegan tagsi tangabat fag ngay buknga, si sangay tungud buksul ay si sangay fun kayu at marabung at lanbung.

⁵ Resin, Aram at fun ay Peka, Israel at fun, nafawayan fun Akas. Kanya fagayu nasakbo sas Erusalem, dewa katanya, wa nakatu gagbilug.

⁶ Ginanya, Resin, Aram at fun, nagbilug yay furuan Elat, siginan kanya nu gaiyan ngay taw Uda. Ay ngay taw Aram namanwan sanya ay sanya wan nu gbanwan dasug katsi.

⁷ Akas nasugu at ngay tagfosuk longan laman nanlong sas Tiglat-Pileser, Asirya at fun te, “Au am fagsuguan tagfadiuganan emu. Falangfei angku siginan Aram at fun ay Israel at fun at namawayan angku.”

⁸ Akas nabul salapi ay gintu siginans Yawi at bale ay siginan at ngay fagfungsuan ramraman sit sadili bale ay nafabuba laman at famonun sas Asirya at fun.

⁹ Asirya at fun naylat Akas at fagetun, nu katanya, kanya nafawayan ay nagbilug furuan Damasku. Kanya nataban sas furuan Kir ngay taw tagbanwan sanya, ay nafabul Resin.

¹⁰ Sanya ginan, fun Akas nalao sas Damasku laman nangalagan Tiglat-Pileser, Asirya at fun. Ay kanya nu ndasug sanya, e nalag sik fagirugan. Nu katanya, kanya nafabuba sas Uryas fag tagfon fanggalangun at nawat fag fagaloan nu kawat fagirugan.

¹¹ Ay Uryas nawat sik fagirugan kata Akas at nafabuba fag fagaloan ay nafatabu gina Akas gakafoliun siginans Damasku.

^12-13 Fun Akas nu ndasug wan siginans Damasku, kanya nalag kafag fagirugan. Kanya ankakbang sas fagirugan ay nafon at fagirugun fag fanggalangun ay naugwag sanya fag fagirugan at fanggalangun fag fanginum ay nabul taguk siginan at fanggalangun laman sas fagmanabayanun ay naramsig fagirugan.

¹⁴ Sanya ginan, kanya nabul at dan fag fagirugan at mawatan siginans tansu sis Yawi at daga salubangan tagsis wabilug at bagu fag fagirugan ay Yawi at bale, ay kanya nafoli kafag fagirugan sit bagu fag fagirugan at fawalan fag alvngvdan.

¹⁵ Ay Akas nasugu sas Uryas fag tagfon fanggalangun te, “Siginan katsi, sai wa at bagu fag fagirugan nu girug am ay fagirugun fag ngay fanggalangun sis balabag ay ay gutluan fag fanggalangun ay fagirugun sad yabi. Ay irugi yangay ngay fanginum fag fanggalangun. Kanya fag ngay fanggalangun siginans fun ay siginans fagayu taw. Ay ramsigi sas fagirugan tagsiginans fagirugun fag ngay fanggalangun fag taguk. Ay nu nandarangin au sas day fagirugan mawatan tansu.”

¹⁶ Ay Uryas fag tagfon fanggalangun nafakamulun fun Akas at suguan anya fagayu.

¹⁷ Sanya ginan, fun Akas nabul faguyudan at ngay dingding ay ngay fagfegusan tagsit tungud. Kanya nabul yangay tagbia fag fagfegusan at nafangayan te, Dagat, tagsi sangay baka at mawatan tansu at tungud guyuy, ay nafoli sit fagfatungkudan fag gang.

¹⁸ Laman Asirya at fun guseganan, Akas nabul at ugun fag ramit, at fagagbilugun gina Famiangalay fag Menit. Ay nadingding Uda at ngay fun at fagsakboan fag sakbawan sas Yawi at bale.

¹⁹ Ay tiba ya at kinfasludan kaduge Akas gfunan ay fagayu at nafakamulun anriruk sis fafil fagrirukan sabaliwas Uda at ngay fun.

²⁰ Ay Akas nu nbul wan, nanamoli anya sat ngay mangaguyang at fagfolian sis Dabid at furuan. Ay at baguama Esekyas at natubus anya laman sik fun.