2 Fun 12 - Fanawbuid tagsibaliwas FakayabianUas nu Gfunan Talun Uda 2Kr 24:1-16 1 Gina sis fafituk banwa Yeu nu gfunan sis talun Israel, Uas gfasigad gfunan sis Uda. Ay kanya gbanwan sis Erusalem, ay nu gfunan ufatk safuluk banwa. At mina Sibya sik taw Beerseba. 2 Kaduge kanya gleleg, matuyan at nafakamulun sis Yawi at daga salubangan, aroro Euyada fag tagfon fanggalangun nafoyung anya. 3 Dewa katanya, kanya wa naiklas ngay bale fagnansegan si tangabat fag ngay buknga, nu katanya, ngay taw gfataglayun nu gfon fanggalangun ay nu girug at famaebebanglu fag lune. 4 Uas nalong sa sangay tagfon fanggalangun te, “Fafuli ngay taw at fanggalangun fag ngay salapi at nabuba sas Yawi at bale. Kafag ngay salapi at nafaful siginan sa ngay taw at famayad gina gtap anya fagayu, ay at famayad laman sat fatuyanan, ay at ngay fanggalangun. 5 Ngay tagalaga salapi gfon sa sangay tagfon fanggalangun kafag ngay salapi laman famasine Yawi at bale.” 6 Dewa katanya, kaduge duak safulu e tuluk banwa Uas nu gfunan, ngay tagfon fanggalangun ya nafafasine Yawi at bale. 7 Nu katanya, fun Uas nafauro Euyada ay tiba yak tagfon fanggalangun ay nainto te, “Wain ay fagyudun nafafasine Yawi at bale? Siginan katsi lag am gbul salapi laman say sadili fakaylatun, nu bunway famasine tua nangus Yawi at bale.” 8 Ngay tagfon fanggalangun naylat nu yud ya nanget salapi sa sangay taw, ay bunwa ban kanya ya fagayu tagfasine Yawi at bale. 9 Euyada nabul sik fagsuadan ay nasulbung at suklub, ay nafoli sis day fagirugan sis siun baliwa fag day sakbawan Yawi at bale. Ay tagulit sakbawan fag ngay tagfon fanggalangun at nansuad sanya fag fagsuadan ngay salapi ngay taw at buba. 10 Kafag fagsuadan nu nkapnu wan, fun tagfon fanggalangun ay fun at tagriruk gtap kafag ngay salapi at gbuba sas Yawi at bale, ay gfalin sa tibak fagsuadan. 11-12 Sanya ginan, kanya fagayu nafon kafag salapi sa sangay taw tagfangguna nu gfasine Yawi at bale. Kanya at famayad sa sangay tagfakamulun sis Yawi at bale, ngay takawat balse, ay ngay tagsaful kawat famale siginans gang. Kafag salapi famayad yangay ngay balse ay at mafasinean fag gang, ay fagayu fagagbilugun laman famasine Yawi at bale. 13 Ay wa nagbilug kafag ngay salapi laman nangawat ngay fagfegusan at mawatan sanbung salapi, ngay famagud fagigangan, ngay taya fagsuadan famaramsig fag taguk, ngay budyung ay nusnge wain fag fagagbilugun at mawatan salapi ay gintu laman sas Yawi at bale. 14 Nu bunway nafon kafag ngay salapi sa sangay tagfakamulun laman famul fagagbilugun nu gfasine Yawi at bale. 15 Kanya fagayu wa naet ya sik rirukan famasaful nu setain nu gagbilug kafag ngay salapi aroro kanya fagayu at matuyan tua fag ngay fagfatigwanan. 16 At famayad asalanan fag fanggalangun ay famalyam asalanan fag ngay salapi wa nabuba sas Yawi at bale, aroro kanya ngay tagfon fanggalangun way at fagagbilugun. 17 Ginanya, Aram at fun Kasael, nafawayan ay naago furuan Gat. Ay sanya ginan, nafawayan yangay Erusalem. 18 Ay fun Uas nabul at ngay famonun at mafasamanan sas Yawi, anggan at ngay mangaguyang Eusafat, Euram ay Aasya, Uda at ngay fun, at ngay famonun at mafasamanan. Ay nabul yangay fagayu gintu tagsi sangay fagfungsuan ramraman sit bale ay sis Yawi at bale. Ay Uas nafafosuk kanya fagayu sas fun Kasael. Nu katanya, Kasael wa nanamawayan ya Erusalem. 19 Ay tiba ya at kinfasludan kaduge Uas gfunan ay fagayu at nafakamulun anriruk sis fafil fagrirukan sabaliwas Uda at ngay fun. 20 Dewa katanya, at ngay tagfakamulun anke algan mauri sa anya ay nafabul anya sis Bet-Milu sis dalan tagsas furuan Sila. 21 At nafabul anya Usakar, Simyat at baguama ay Eusabad, Sumer at baguama. Ay nanamoli anya sas fagfolian at ngay mangaguyang sis Dabid at furuan, ay at baguama Amasya at naungbus anya laman sik fun. |
Copyright © 2021 by OMF International, Philippines
OMF International