2 Fun 10 - Fanawbuid tagsibaliwas Fakayabian

Nafabul Akab at Kalongan

¹ Akab e fituk safuluk baguama sis Samarya, nu katanya, Yeu nafadasug sik rirukan sas furuan daul at ngay fun ayu sirut, ay sat ngay fagtainan ay sa sangay tagalaga Akab at ngay baguama. Katatuy at rirukan:

² “Fun Akab at ngay baguama si ayu, anggan at ngay sakayan fag ngay faguyudan fangawayan, ay at ngay kabayu, ay nagbilug am at furuan daul at maaladan, ay anggan at ngay famawayan.

³ Nu katanya, nu natap am ku rirukan filii at sadi fun Akab at baguama at makatu gfunan. Ay fawayani laman sas Akab at ngay kalongan.”

⁴ Ay kanya fagayu maksvn nu kalimu ay nalong te, “Yeu nu nababo way kanya fag duak fun, kaugat wa ro kanya nu gbabo emi.”

⁵ Nu katanya, tagalaga fun at bale, ay ngay fagtainan sanya fag furuan, ay ngay tagalaga fun at ngay baguama nariruk sas Yeu te, “Ami am ngay fagsuguan waymi, gfakamulun ami fagayu am suguan emi. Wami gfili tibak fun; fakamuluni kata am algan at masine.”

⁶ Yeu nabalus kanya fagayu siginan at faduak rirukan te, “Nu gfadiuganan tuam angku, ay nu mafalganan tuam gfaning angku, nanggatvng am Akab at ngay baguama at ngay liug ay bubai at ngay alfuyu sa angku staes Esreel balabag, kata katsi fag buknga.” Ngay tagfangguna furuan Samarya tagalaga fun Akab at ngay baguama fag fituk safulu siginan nu masisian.

⁷ Yeu at rirukan nu ndasug, kanya fagayu nafabul fun Akab at ngay baguama fag fituk safulu. Ay kanya fagayu nasuad at ngay alfuyu sa sik sabi ay nafosuk sas Yeu sas Esreel.

⁸ Tagfosuk longan nu ndasug wan, kanya nalong sas Yeu te, “Kanya fagayu nafadasug wan fun at ngay baguama at ngay alfuyu.” Sanya ginan, Yeu nalong te, “Folii sas sakbawan furuan, duak talad kanya fag ngay alfuyu, ay famatoi sanya sitsigons balabag.”

⁹ Ay balabag di, Yeu naduksun, ay namalindug si sangay taw at daga salubangan ay nalong te, “Wam e nasalan, au way at ke algan mauri sabaliwa ku tagfayafun ay at nafabul anya. Ay sinu at nafabul anya fagayu?

¹⁰ Asafuli te, umfasludan Yawi at longan fagayu sas Akab at kalongan. Yawi nafafasludan at nalong siginan at fagsuguan Elyas.”

¹¹ Sanya ginan, Yeu nafabul Akab at kalongan fagayu sis Esreel, anggan at ngay fun sirut, ay at ngay fagadgalangan ay sanya fag ngay tagfon fanggalangun. Akab at ngay kalongan wa nke sawad ya.

¹² Ay Yeu gina glao sas Samarya, kanya nadalan sa sik furuan at ngayan te, Tagalaga Tupa at Fagmafulan.

¹³ Ay kanya nafablang talun Uda at fun Aasya at ngay kalongan tiba, ay nainto sanya fagayu te, “Sinu am?” Ay kanya fagayu nabalus te, “Aasya ami at ngay kalongan. Nastae ami laman nansibo fun Akab at ngay baguama, kaugat wan at mangena Esebel at ngay baguama.”

¹⁴ Yeu nasugu at ngay fagsuguan te, “Gamati anya fagayu ay lag gfabul!” Nu katanya, kanya nagamat anya fagayu ay nataban ay nafabul sis day bubun sanya. Kanya fagayu ufatk safulu e dua. Yeu we nafasawad ya.

¹⁵ Yeu nu nalao sanya ginan, kanya nalag Rekab at baguama Yeunadab nu kadasug laman namablang anya. Ay duama nu nakamatoan, Yeu nainto anya te, “O gfadiuganan tuo angku kata nu gfadiuganan au emu?” Ay Yeunadab nabalus te, “Sabv.” Ay Yeu nalong te, “Nu katanya, fatedi angku am daluap.” Ay Yeunadab nated at daluap ay Yeu nafato anya sat sakayan fag faguyudan.

¹⁶ Yeu nalong te, “Aloi angku laman lumag o te, matuyan au sas Yawi.” Ay Yeunadab nanangalo anya.

¹⁷ Ay nu ndasug sas Samarya, Yeu nafabul Akab at ngay kalongan at sawad, kata Yawi at longan sas Elyas.

Nafabul Baal at ngay Fagsuguan

¹⁸ Yeu nafaful fagayu taw ay nalong te, “Akab wa maksvn nu gfaning Baal. Ay au amaksvn yap tua nu namaning au.

¹⁹ Nu katanya, fastiei Baal at ngay taglong fagayu ay anggan at ngay fagsuguan ay at ngay tagfon fanggalangun. Fastiei wan fagayu aroro namon au ngayuk fanggalangun sas Baal. At yud ro nastae gfabul au.” Dewa katanya, Yeu kamaningan way laman gfabul Baal at ngay fagsuguan.

²⁰ Yeu nalong te, “Falganani sik fagmafulun laman nanseg tam Baal.” Nu katanya, sanya fag ngay taw nafasaful.

²¹ Yeu nafauro sas fagdaul Israel Baal at ngay fagsuguan fagayu, ay we si ya at mesa bale. Ay kanya fagayu andasug sas fagnansegan Baal fag bale ay ankapnu.

²² Ay Yeu nalong sa tagalaga ngay lanbung te, “Fasuluni tuy fag ngay lanbung sas fagayu at nanseg Baal.” Nu katanya, kanya nafon ngay lanbung sa anya fagayu.

²³ Sanya ginan, Yeu nasakbo gadgaloan Rekab at baguama Yeunadab sas fagnansegan Baal fag bale. Ay Yeu nalong sas Baal at ngay fagsuguan te, “Tuyani fia te, tagste we gseg Yawi, ngay tagseg way lang Baal.”

²⁴ Nu katanya, fagayu tagseg Baal nasakbo sasad bale laman namon at fagirugun fag ngay fanggalangun ay tiba yak fanggalangun. Yeu e waluk safuluk fagsuguan sis day fagnansegan fag bale, ay kanya nalong sat ngay fagsuguan te, “Gfabul au nusnga sinu si ayu at nafabayan gduksun nusdi sadi.”

²⁵ Yeu nu ntabu gfon at fagirugun fag ngay fanggalangun, kanya nasugu at ngay tagulit ay at ngay fun tagfawayan te, “Sakboi wan ay fabuli fagayu tagseg Baal! Lag am gfabayan nu e gduksun!” Nu katanya, kanya fag ngay fagsuguan nafabul wan fagayu tagseg Baal, ay naukas at ngay bilug sas day bale. Sanya ginan, kanya fagayu nasakbo sasad basad fia fag suluk.

²⁶ Ay kanya fagayu nabul sanya ginan famamatang fag gang ay nabuba sas day bale fagnansegan ay nairug,

²⁷ ay narufa kafag gang, ay naiklas wan Baal at bale. Ay dasug katsi sanya fagalangan way lang.

²⁸ Nu katanya, Yeu nasalag wan nu gseg Baal sis talun Israel.

²⁹ Dewa katanya, kanya wa natalyuyan at asalanan, nafaning way Erubuam, Nebat at baguama at nafakamulun, at nafae asalanan ngay taw Israel. Kanya fagayu gseg fagsegan fag ngay baka at mawatan siginans gintu tagsis Betel ay Dan.

³⁰ Ay Yawi nalong sas Yeu te, “Masine am nafakamulun. Nafaning tuo ku ngay suguan te, fabuli Akab at ngay kalongan. Aroro sa am nafakamulun, am ngay kasugfunanan ban tagfunan Israel sitsigons faufatk kasugfunanan.”

³¹ Dewa katanya, Yeu bunwa fagdaul at amatanganan nu gfaning Yawi, Israel at Dius at faugali, ay kanya wa natalyuyan at asalanan, nafaning way Erubuam, Nebat at baguama at nafakamulun, at nafae asalanan ngay taw Israel.

³² Kadugenya, Yawi gfasigad gfalay Israel at talun, aroro fun Kasael nagbilug wan tibak afud talun Israel:

³³ sas fakamenitan Liskung Urdan ay fagdaul talun Gilyad sitsigons Basan, ay ngay talun sas fawalan baliwa fag alvngvdan sas furuan Aruer at munakbang sis Liskung Arnun. Kafag ngay talun, Gad, Rubin ay Manase at ngay kasugfunanan at talun.

³⁴ Ay tiba ya at kinfasludan kaduge Yeu gfunan ay fagayu at nafakamulun, anriruk sis fafil fagrirukan sabaliwas Israel at ngay fun.

³⁵ Ay Yeu nu nbul wan, nanamoli anya sas furuan Samarya. Ay at baguama Yuakas, at natubus anya laman sik fun.

³⁶ Yeu nafunan sis Israel sis furuan Samarya kaduge duak safulu e waluk banwa.