1 Uan 5 - Fanawbuid tagsibaliwas Fakayabian

Tam Fagafanudun Nababo Fagdaul Daga at Fagmauriun

¹ Nusnga sinu tagafanud te, Isus wan Dius at nafili fag Fun, kanya fag taw Dius at sisian. Sik taw nu kesug tua sik mama, kesug yangay anggan kafag mama at sisian.

² Katatuy nu saful tam te, kesug tam Dius at ngay sisian, nu kesug tua tam Dius ay nu gfaning tua tam at ngay suguan.

³ Katatuy nu kesug tam tam Dius: gfaning tua tam at ngay suguan. Ay at ngay suguan wa maidap gfaning.

⁴ Dius at ngay sisian gbabo tua fagdaul daga at fagmauriun. Nababo tam takatanya aroro siginan tam fagafanudun.

⁵ Sinu tagbabo fagdaul daga at fagmauriun? Nusnga sinu tagafanud te, tam Isus Dius at Baguama.

⁶ Tam Fun Isus antuyan fia te, Dius at Baguama, siginan nu kasurung sas mamam, ay siginan yangay at taguk at kinbusbus gina kabul. Bundi lang siginans mamam, nu bunway siginan yangays taguk. Ay at tagfatuyan at Masine fag Falad wan, aroro kanya wan at matuyan.

⁷ Tulu tagfatuyan sabaliwas Isus:

⁸ at Masine fag Falad, ay mamam ay taguk, ay kanya fag tulu gdiuganan.

⁹ Gafanud tua tam sik taw nu gfatuyan, ay Dius nu gfatuyan gtungud tua sik taw nu gfatuyan. Ay Dius tua at nafatuyan sabaliwa at Baguama.

¹⁰ Nusnga sinu tagafanud sas Dius at Baguama, gafanud tua Dius nu gfatuyan. Dewa katanya, nusnga sinu at yud gafanud sas Dius, kanya nafangayan Dius te, sik takamuag, aroro kafag taw wa gafanud Dius nu gfatuyan sabaliwa at Baguama.

¹¹ Katatuy Dius nu gfatuyan: Dius nafon sa antam leleg at yud e fakatabuan, ay kafag leleg siwa at Baguama.

¹² Nusnga sinu at masadi sas Dius at Baguama e leleg tua ban at yud e fakatabuan. Ay dewa katanya, nusnga sinu at yud masadi sa anya wa ban e leleg at yud e fakatabuan.

Leleg at Yud e Fakatabuan

¹³ Nariruk au takatanya, sa ayu fag ngay tagafanud sas Dius at Baguama, laman sumaful am fia te, e leleg tua ban am at yud e fakatabuan.

¹⁴ Nu katanya, gafanud tam te, Dius gfon sa antam nusnge wain tam fagetun, nu kata tua at algan.

¹⁵ Ay nu saful tua tam te, kanya gdungug tua nusnge wain tam fagetun, saful watam te, nabul watam tam ngay fagetun sa anya.

¹⁶ Sik taw nu nalag at faduksay nu e asalanan, ay at asalanan nu ddi gfadasug anya sas fakabulun, darangini anya, laman Dius gfon anya leleg at yud e fakatabuan. Kanya sabaliwa at ke asalanan at yud gfadasug sas fakabulun. E sik asalanan tagfadasug taw sas fakabulun. Ay bunwa takatanya fag asalanan ku nalong te, darangini.

¹⁷ Nusnge wain fag fakamulun at mauri, kanya asalanan, dewa katanya, tibak asalanan di gfadasug taw sas fakabulun.

¹⁸ Nasaful watam te, Dius at ngay sisian di gfataglayun nu gasalanan, aroro Dius at Baguama gdiri tua anya, laman Satanas di gfauri anya.

¹⁹ Nasaful watam te, Dius watam at ngay sisian, ay Satanas gfagtainan sas fagdaul daga.

²⁰ Ay nasaful yangay tam te, Dius at Baguama andasug ay nafon sa antam fagsafulun, laman sumaful tam at Matuyan. Ay katsi gbanwan tua tam sit Matuyan aroro gbanwan tua tam sit Baguama Isus tam Fun, aroro sia wan at matuyan fag Dius ay leleg at yud e fakatabuan.

²¹ Ku ngay sisian, lag am gseg at yud matuyan fag ngay fagsegan.