1 Uan 4 - Fanawbuid tagsibaliwas Fakayabian

At Matuyan fag Falad ay Takamuagan fag Falad

¹ Ku ngay fakesugun, lag am gafanud sas nusnga sinu fag taw dewa glong te, “Si wa angku at Masine fag Falad.” Nu bunway insafuli te, o at falad siginan tuas Dius, aroro ngayuk takamuagan fag taglong at kinrapyag sas fagdaul daga.

² Katatuy ay fagsafulan te, Dius tua at Falad tagbanwan si sik taw: kafag taw nu gfoyung tua te, Isus andasug ste swa daga kata fia sik taw. Kanya at falad siginan fias Dius.

³ Ay nusnga sinu at yud gfoyung te, Isus ansik taw fia, tagsi anya fag falad bunwa siginans Dius, siginan way tagfawayan Dius at Nafili fag Fun. Ebi nadungug am te, sik takamawayan kadasug ban, ay katsi kanya andasug wan ste swa daga.

⁴ Ku ngay sisian, am wan Dius at ngay taw, ay nababo wam takamuagan fag ngay taglong, aroro at Masine fag Falad tua tagsi ayu. Kanya amabalyanan yap tua tagsis fagdaul daga at taw fag falad.

⁵ Ay kafag ngay taglong takamuagan tagsiginans fagdaul daga, anggan at foyungan siginans fagdaul daga. Nu katanya, at yud gafanud fag ngay taw gdungugan anya.

⁶ Dewa katanya, itam Dius tua tam at ngay taw, ay nusnga sinu at natoglag Dius, gdungugan tua antam. Ay dewa katanya, nusnga sinu at yud siginans Dius, kanya wa gdungugan antam. Katanya tam fagsafulan te, sik taw at foyungan siginan tua at Masine fag Falad ay mannga siginan way takamuagan fag falad.

Dius wan Fakesugun

⁷ Ku ngay fakesugun, edkesugani tua, aroro fakesugun siginans Dius. Nusnga sinu takesug tua at faduksay, kanya Dius at sisian, ay toglag tua Dius.

⁸ Ay nusnga sinu fag taw nu dway kesug at faduksay, kanya wa natoglag Dius, aroro Dius wan fakesugun.

⁹ Katatuy Dius nu gfasure sa antam te, kesug antam: kanya nasugu at Baguama ste swa daga laman e leleg tua ban tam siginan anya.

¹⁰ Bunwa itam taguna at nesug tam Dius, nu bunway Dius tua at nesug antam, siginan nu gsugu at baguama laman at fanggalangun famalyam tam asalanan.

¹¹ Ku ngay fakesugun, nu kaksvn tua nya Dius nu kesug antam, anggan itam edkesugani tua.

¹² We taw batang glag tam Dius. Dewa katanya, nu kedkesugan tua tam, Dius gbanwan tua si antam, ay at fakesugun siwa fia antam.

¹³ Dakngani Dius nafon tua sa antam at Falad, nasaful tua tam te, gbanwan tam sis Dius, ay kanya gbanwan yangay si antam.

¹⁴ Nalag ami fia, ay gfatuyan ami te, Dius nasugu at Baguama, laman Tagfalangfe fagdaul daga at taw.

¹⁵ Nusnga sinu fag taw tagfoyung tua te, Isus tam Dius at Baguama, Dius gbanwan si anya ay kanya gbanwan yangay sis Dius.

¹⁶ Ay nasaful tua tam ay gafanud tam te, Dius kesug antam. Dius ay fakesugun sadi way. Ay nusnga sinu tagbanwan sis fakesugun, kanya gbanwan yangay sis Dius, ay Dius gbanwan si anya.

¹⁷ Katanya tam Dius at balyawvtan nu kesug fia antam, laman ban di tam kalimu gina ndasug fanginsafulan asalanan fag menit, aroro tam ugali ste swa daga kata tua Isus at ugali.

¹⁸ Nu si tua antam fakesugun, di tam e fakalimuun ya. Ay at matuyan fag fakesugun gfalyam ngay fakalimuun. Sik taw nu e fakalimuun yay, kanya kalimu te, umfaurianan, ay nu katanya, ya si anya fakesugun.

¹⁹ Si tua antam fakesugun aroro Dius nesug tua antam.

²⁰ Nusnga sinu taglong te, “Kesug au Dius,” ay kauri way at faduksay, kanya sik takamuag. Aroro sik taw nu nalag at faduksay ay nu dway kesug anya, kaugat wa ro nu yud kesug Dius, at yud kalag.

²¹ Katatuy Dius at suguan sa antam: nu kesug tuam Dius, esugi yangay ay ngay iba.