1 Uan 2 - Fanawbuid tagsibaliwas Fakayabian

¹ Ku ngay sisian, griruk au takatanya laman diam gasalanan. Ay sik taw nu nasalanan way, e gwabilug antam ay tam Mama. Tam Fun Isus wan tam tagwabilug; kanya matuyan.

² Kanya wan Dius at fanggalangun famalyam tam asalanan, ay bundi itam lang at ke asalanan, anggan tua ngay taw sas fagdaul daga at ngay asalanan.

³ Siginan nu gfaning tam Dius at longan, gtuyan tam te, toglag tam anya.

⁴ Nusnga sinu taglong te, “Toglag au Dius,” dewa katanya nu dway gfaning Dius at longan, kanya kamuag way, ay we si anya at matuyan.

⁵ Nusnga sinu tagfaning Dius at longan gfalag te, matuyan tua nu kesug Dius. Katatuy tam fagsafulan te, si tam anya:

⁶ nusnga sinu taglong te, “Gbanwan au sas Dius,” masine nu gugali kata Isus at ugali.

⁷ Ku ngay fakesugun, ku rirukan sa ayu bunwa sik bagu fag suguan nu bunway sik tangaduge wan fag suguan, ay nadungug ebi taguna.

⁸ Ay tuy fag suguan dewa ngaduge wan, kata yay gugat nu bagu, aroro ansure si tam Isus at fakamulun ay anggan si ay fakamulun. Fagmadulumun kalyam wan, ay at matuyan fag fagmayamagun gdamlag wan.

⁹ Nusnga sinu taglong te, “Si kwa sad mayamag,” ay kauri yay at faduksay, kanya siyay gugat sad madulum.

¹⁰ Nusnga sinu takesug at faduksay, kanya gbanwan tua sisad mayamag ay di gfakamulun at mauri sat faduksay.

¹¹ Nusnga sinu takauri at faduksay, kanya gbanwan yay sisad madulum, ay wa saful at fagnanloan, aroro dulum gfayud glag anya.

¹² Griruk au sa ayu, ku ngay sisian, aroro siginans Isus, nafalyam tua ay ngay asalanan.

¹³ Griruk au sa ayu, ngay mama, aroro natoglag tuam tagsiginans fakasigadan. Griruk au sa ayu, ngay baguama, aroro nababo wam Satanas.

¹⁴ Griruk au sa ayu, ku ngay sisian, aroro natoglag tuam tam Mama. Griruk au sa ayu, ngay mama, aroro natoglag wam tagsiginans fakasigadan. Griruk au sa ayu, ngay baguama, aroro mabitsug tuam, ay aroro Dius at longan gbanwan tua si ay ngay amatanganan, ay aroro nababo wam Satanas.

¹⁵ Lag kesug fagdaul daga, anggan at ugali. Sik taw nu kesug fagdaul daga, wa kesug tam Mama.

¹⁶ Aroro fagdaul daga at ugali, tam bilug ay tam mata at fagfangalabianun, ay fakamatungudunun sabaliwa tam leleg, takatanya bunwa siginan tam Mama, siginan ways fagdaul daga.

¹⁷ Ay fagdaul daga umkamin ban, anggan at fagfangalabianun, ay dewa katanya, nusnga sinu tagfaning Dius at fakaylatun, gleleg tua ban kabavn.

Tagfawayan tam Fun Isus

¹⁸ Ku ngay sisian, katsi munakbang wan at fakatabuan fag ngay menit. Ay nadungug wam te, kadasug ban tagfawayan tam Fun Isus. Ay dewa katsi ngayu wan tagfawayan tam Fun Isus. Nu katanya, nasaful watam te, katsi munakbang wan at fakatabuan fag ngay menit.

¹⁹ Ebi, kafag ngay tagfawayan tam Fun Isus magamut tua antam, ay katsi naubun wan antam. Kanya fagayu bunwa fia tam ibama, aroro nu tam ibama di, masadi tua ro tam nangus gugat. Ay kanya naubun way antam, sik famasaful te, kanya fagayu bunwa tam ibama.

²⁰ Ay nafon sa ayu at Masine fag Falad ay nasaful tuam at matuyan.

²¹ Ku fagnarirukun sa ayu bunwa aroro wam saful at matuyan. Ay sabv, saful wam at matuyan, ay saful yangay am te, we famuagan tagsiginan at matuyan.

²² Ay sinu takamuag? Nusnga sinu taglong te, Isus bunwa Dius at nafili fag Fun, kanya fagayu tagfawayan tam Fun Isus ay wa kaylat gtoglag tam Mama ay at Baguama.

²³ Nusnga sinu at yud gtoglag at Baguama, at Mama wa si anya. Ay nusnga sinu tagtoglag tua at Baguama, at Mama gbanwan tua si anya.

²⁴ Ay am, bakvdi ay nadungug siginan ebi taguna laman e fagmasadiun tuam sat Baguama ay anggan sat Mama.

²⁵ Nu katanya, mul tua ban am at fatuyanan fag leleg at yud e fakatabuan.

²⁶ Nariruk au sa ayu sabaliwa ngay taw tagfandayan ayu.

²⁷ Tam Fun Isus nafon sa ayu at Masine fag Falad. Nu katanya wam gayudan ya tibak takamoyung, aroro at Masine fag Falad tagfoyung ayu nusnge wain fagayu. At ugali matuyan ay kanya wa kamuag. Ay faningi at foyungan ayu te, banwani gugat sa tam Fun Isus.

²⁸ Ku ngay sisian, nu katanya, mabanwani tua sis Isus, laman ban kanya nu ndasug, e fagmanabayanun tua tam, ay di ban tam kapla gina ndasug.

²⁹ Nasaful wam te, tam Isus matuyan, ay saful yangay am te, fagayu taw tagfakamulun at matuyan, kanya Dius at sisian.