1 Timuteu 6 - Fanawbuid tagsibaliwas Fakayabian

¹ Ngay fagsuguan masine nu gsuyu tua fia at ngay tagfayafun, laman di e gfalingun Dius ay tam foyungan.

² Ay sik fagsuguan at tagfayafun nu sik tagafanud, lag gyud gsuyu aroro duksay sas fagafanudun. Nu bunway, kafag fagsuguan faugati yap nu gfaning at tagfayafun aroro kanya gafanud yangay ay Dius kesug anya, ay e tungkul tua sa anya at fagmafaningun. Fafasludani foyungi takatanya fagayu.

Fakesugun sas Salapi

³ Ay nusnga sinu fag taw tagfoyung tibak foyungan, at yud gfaning tam Fun Isus at longan ay at foyungan sabaliwa nu gfaning Dius,

⁴ kanya sik takamatungudun ay at yud way e fagsafulun. Kanya kaylat kamawayan ay kamabadbaboan, ay siginan takatanya anke fagfangalabianun, ay fagfangadotamaun, ay fakamalingunun, ay fakadkasulupanun.

⁵ Kanya fagayu kaylat kamabadbaboan ay wa matuyan at ngay amatanganan ay wa saful at matuyan. Kanya fag ngay taw at amatanganan, fagfaningun Dius sik balyawvtan way laman karamraman.

⁶ Dewa katanya maksvn at fanambagun sa antam nu manabayan tua tam gfaning tam Dius.

⁷ Nu kasalug tam, wa tam e nabuba ste sfagdaul daga, ay wa yangay ban tam e buba nu glo tam ste ginan sfagdaul daga.

⁸ Nu katanya, useganani wan nu e fakonun tua tam ay nu e lanbung tua tam.

⁹ Takaylat nangaramraman umtong sas famaskud ay sas sangdaw ay sat yud matuyan ay at mauri fag algan tagtaban taw sas fakabaluun ay sas faurianan.

¹⁰ Aroro fakesugun salapi, kanya wan fagsigadan fagayu fagmauriun. Tibak taw naubun wan at fagafanudun aroro kesug salapi, nu katanya, ngayu at fakabaluun.

Taguyan fag Suguan sas Timuteu

¹¹ Ay o, Dius at fagsuguan, masine nu gsaruy o takatanya fagayu. Ay kabavn rvbvyi fagmasineun, ay fagfaningun Dius, ay fagafanudun, ay fakesugun, ay fagagwantanun, ay fagmalukmeun.

¹² Fabadbaboani sabaliwa am fagafanudun. Ay bakvdi leleg at yud e fakatabuan. Kanya wan Dius at fagnauroun emu gina o maseganama gfoyung sa sangay taw sabaliwa am fagafanudun.

¹³ Sas Dius at daga salubangan, tagfon leleg sas fagayu, ay sa tam Fun Isus at daga salubangan at nafatuyan sas Punsyu Pilatu, gsugu au sa emu te,

¹⁴ kabavn matuyani nu gfaning o tuy fag suguan laman ban di o e malong anggan tam Fun Isus andasug,

¹⁵ gina ban sis Dius at nafalganan fag menit. Tam Dius way lang at mabalyanan fag Fun, fagayu fun at Fun ay fagayu fagtainan at Fagtainan.

¹⁶ Kanya at yud kabul kabavn ay tagbanwan sisad mayamag yud e manangakbang, ay we taw batang glag anya, ay wa ban batang e glag. Siwa anya at yud e fakatabuan fag famauseganan ay fag fagmabalyananun Anud.

¹⁷ Foyungi sat ngay maramraman at ke fagagbilugun nusnge wain ste swa daga te, lag kamatungudun, ay lag gseg takatabu fag ramraman, nu bunway segi tua Dius tagfon antam tam fagayudanun yud e fakatabuan, tagfae fagusegananun antam.

¹⁸ Ay foyungi yangay anya te, fakamuluni tua at masine, ay aramramani sat masine fag fakamulun, ay famoni tua ay gubuki ay kaiban.

¹⁹ Nu katanya tua at fakamulun, kanya gfaful at yud katabu fag ramraman at mogat fag fagsarigan sa takadasug ban, laman ban kanya magbilug at matuyan fag leleg.

²⁰ Timuteu, bakvdi at nafafatigwanan sa emu fag ngay foyungan. Ay saruyi fagayu tagste swa daga yud e tungkul fag kamatoanan, ay tagbadbaboan sabaliwa at yud mafanud fag fagsafulun.

²¹ Aroro siginan takatanya fag fagsafulun, tibak taw naubun at fagafanudun. Dius at fagmagalangun si wa nangus fia ayu.