1 Timuteu 5 - Fanawbuid tagsibaliwas Fakayabian

Tam Fakamulun sa Tam ngay Faduksay sas Fagafanudun

¹ Nu garingang o sat mafagtainan fag ngay mangama, lag mafangagrasan, nu bunway fakamatoani fia masine kata nu am mama. Ay nu gfakamatoan o sik mabaguama, katai tua nu am faduksay fia.

² Ay nu gfakamatoan o at mafagtainan fag ngay mangena, katai tua nu am mina. Ay nu gfakamatoan o sik baguina, katai yangay nu am faduksay fia ay masinei tua am amatanganan.

³ Afanyui ay gubuki at yud e ggubuk ya fag fagbubayun.

⁴ Ay sik fagbubayun nu e sisian yay ay nu e fufu yay, at masine kanyai yap taggubuk anya laman gfauseganan at fagtainan. Aroro katanya tua tagfauseganan Dius.

⁵ At matuyan fia fag fagbubayun, at yud e kalongan ya, ay siginan way langs Dius at fagsegun, ay kanya gdarangin kayu menit ay yabi laman get gubuk sas Dius.

⁶ Dewa katanya, sik fagbubayun tagfaning at sadili fakaylatun, kanya kata wan nu mabulan dewa gleleg yay.

⁷ Fakatanyai am foyungan laman we kadungug siginan anya fagayu at mauri.

⁸ Nusnga sinu fag taw at yud kaylat ggubuk at ngay kalongan, kaugat wan at sadili talanan, kanya naubun wan at fagafanudun, ay nu mauri gtungud yay at yud gafanud.

⁹ Am fagrirukun sas fagrirukan, ngay fagbubayun yakman at ke banwa unumk safulu sat tungud baliwa, ay at matuyan tua nu gfaning at mangama gina gleleg yay,

¹⁰ ay at nafakamulun tua fia at masine, kata nu gfagurang at sisian, ay nu guseganan gfasakbo sat bale at fagyudun toglag fag ngay taw, ay nu ggubuk Dius at ngay nafili ay ngay tagayudan, ay nu gfon at sadili sas nusnge wain fag fakamulun at masine.

¹¹ Ay lag griruk sas fagrirukan at mabaguina yay fag fagbubayun, aroro manandog nanfanmangama ay mafabayan nu gfaning tam Fun Isus.

¹² Ay nu katanya, kanya umke asalanan siginan nu kamabo at fatuyanan te, gfaning tam Fun Isus.

¹³ Saman ya takatanya, kanya umnanad gfamomuyun ay kamanloan way lang sat ngay fasabale. Sarokta, kanya nanfanginasanan sat ngay iba, ay namasaysalagan, ay glong at mauri sat ngay iba.

¹⁴ Nu katanya way, gamatangan au te, masine ngap at mabaguina yay fag fagbubayun nu gdog gfanmangama, laman kae sisian ay gulit fia sat talanan, laman at yud gafanud we fagmalongun at mauri sabaliwa antam.

¹⁵ Ku fagnalongun takatanya aroro tibak fagbubayun nasaruy at fagafanudun ay nanangalo Satanas.

¹⁶ Sik tagafanud fag mangena nu e kalongan sik ngay fagbubayun, masine kanya nu ggubuk, laman wa gfaidapan tibak tagafanud, nu ggubuk at yud e kalongan ya fag ngay fagbubayun.

¹⁷ Foni fia at kasakan sa sangay tagfangguna ngay tagafanud, kaugat wan sat maseganama nu gfoyung ay gfasaful Dius at Longan.

¹⁸ Katatuy at rirukan sis Dius at Longan: “Lag am gbuksung ay baka at dungus kaduge gruyus.” Marirukan yangay sis Dius at Longan te, “Sik taw tagfakamulun e bulan fia.”

¹⁹ Lag o gdungugan nu e gfantabugan sa sik fagtainan bale fakafulan, nu dway e gfatuyan duak taw ay mannga tuluk taw.

²⁰ Dewa katanya, salagi ay faurii sisad fagngayuan taw ngay fagtainan at kinke asalanan, laman sik famararang sat iba.

²¹ Maksvn nu gsugu au emu sas Dius ay sa tam Fun Isus ay sat masine fag ngay tagbarita at daga salubangan te, fakamuluni takatanya yud e fagfili sas nusnga sinu fag taw.

²² Lag gabanganan nu gfatayuk o am daluap sas nusnga sinu fag taw, laman gfadante o anya sat fanambagun ban. Lag o kataip sa tibak taw at asalanan. Ay dangay o e malong.

²³ Dangay lang mamam am fanginum. Inumi yangay sik fanlangu sirut, laman famafia am fakasaitun am ungdan ay tiba ya am fakasaitun at malayun.

²⁴ Tibak taw at asalanan kalag wan dewa yud yay anfaurianan. Dewa katanya, tibak taw at asalanan nu kasaful gina ya ban kafaurianan.

²⁵ Ay katanya yangay, sik masine fag fakamulun kalag wan. Ay tibak fakamulun at masine, nu kasure sa ya ban tibak menit.