1 Timuteu 4 - Fanawbuid tagsibaliwas Fakayabian

Takamuagan fag ngay Takamoyung

¹ Mayamag wan at Masine fag Falad at longan te, sa ban taguyan fag ngay menit tiba bank taw gubun at fagafanudun, ay nangalo takamuagan fag ngay falad ay ngay bara at ngay foyungan.

² Takatanya fag ngay foyungan siginan way takamaningan fag ngay takamuag, ay at amatanganan annanad wan sat mauri, ay wa gfaning ya at amatanganan at masine.

³ Kafag ngay taw gfoyung te, mauri way takadadwa, ay gsalag te, “Lag kon tibak fakonun,” dewa Dius at nawat kafag ngay fakonun laman ngay tagafanud ay at nasaful at matuyan gbul guseganan sas Dius.

⁴ Dius at awatan fagayu masine. Lag tam gamatangan te, mauri. Masine fagayu taw nu gbul ay kon guseganan,

⁵ aroro siginan Dius at longan ay siginans darangin, ngay fakonun ansine wan.

Isus at Fagsuguan

⁶ Nu gfoyung tua ban o takatanya sa tam ngay faduksay, tam Fun Isus o at matuyan at fagsuguan. Ay gina ban o kamoyung, kabitsug yangay o siginan tam fagafanudun at fagmatuyanun, ay siginan am fagfaningun fag ngay foyungan at matuyan.

⁷ Lag gdungugan tagste swa daga fag ngay fansulitan at yud e tungkul, nu bunway ananadi tua nu gfaning o Dius.

⁸ E tungkul tua nu gfananad tam tam bilug laman kabitsug, ay dewa katanya, gtungud yay nu e tungkul nu gfaning tam tam Dius, aroro e fanggubukun tua ban sa tam leleg katsi ay anggan sa takadasug ban fag leleg.

⁹ Kanya fag longan matuyan; masine fagayu taw nu gafanud ay gfaning.

¹⁰ Siginan takatanya, gugatan tam aroro e fagsegun tua tam sa tagleleg fag Dius tagfalangfe fagayu taw, kaugat wan sa sangay tagafanud.

¹¹ Foyungi ay fafasludani takatanya fagayu.

¹² Dangay o e kafalingun siginan nu mabaguama yay o. Nu bunway ugatani laman sik fagfaningan tuo sas fagayu tagafanud, siginan am aringang, am ugali, am fakesugun, am fagafanudun ay am fagyudun e malong.

¹³ Yakmay kban andasug sanya, tapi tua gugat Dius at Longan sas fagngayuan taw, ay foyungi ay fayamagi sa anya fagayu.

¹⁴ Lag o gfangulan at Masine fag Falad at nafon emu fag fagmakatuun kata ngay fagtainan at nafoyung sa emu gina gfatayuk sa emu at ngay daluap.

¹⁵ Fakamuluni takatanya fagayu ay falganani fia am sadili laman fagayu taw lumag te, kafamut am fagmakatuun.

¹⁶ Dirii fia am ugali ay nu gfoyung o. Fataglayuni nu gfakamulun o takatanya fagayu, laman umlangfe ban o, anggan tagdungugan am foyungan.