1 Timuteu 3 - Fanawbuid tagsibaliwas Fakayabian

Ngay Tagafanud at ngay Fagtainan

¹ Matuyan tuy fag longan te, nusnga sinu takaylat nanga sik fagtainan sas bale fakafulan, at algan at masine tua fag fakamulun.

² Katatuy at masine at ugali: di e kalong te, mauri, ay sadi way at mangena, ay saful tua gfaragang at sadili, ay di gfangadotama, ay masuyu tua, ay gfasakbo tua sat bale nusnga sinu fag taw, ay masine tua nu gfoyung,

³ ay di glanguan, ay di gfangagras nu bunway malukme tua, ay di gfangalabian salapi,

⁴ ay masine tua nu gfagtainan at talnayan, ay at ngay sisian gfaning tua ay gsuyu anya.

⁵ Aroro setain ro kanya nu mafagtainan Dius at ngay taw, nu dway makatu gfagtainan at sadili talnayan?

⁶ Ay at masine kanya nu glugo wan nu gafanud, aroro kanya nu bagu yay gafanud, mafamatungudun ay manfaurianan kata at kinfasludan sas Satanas.

⁷ Ay at masine laman anggan at yud gafanud fag ngay taw gsuyu tua anya, laman kanya di gafalingunan ay di katong sas Satanas at sangdaw.

Ngay Tagtanud

⁸ Ay katatuy at masine ngay tagtanud at ugali: sik fagsuyuun tua, ay matuyan tua at aringang, ay di glanguan, ay di gfangalabian,

⁹ ay masine tua fia at amatanganan sabaliwa nu gbakvd at matuyan sabaliwas fagafanudun.

¹⁰ Ay faskudi yap anya fagayu, ay nu ddi am e nalag at fagmauriun, filii wan laman sik ngay tagtanud.

¹¹ Ay masine yangay at ngay mangena nu sik ngay fagsuyuun, ay nu ddi glong at yud masine sabaliwa at iba, nu bunway malukme tua ay mafatigwanan sas fagayu at fakamulun.

¹² Ay sik tagtanud at masine sadi way at mangena, ay masine nu gfagtainan at talnayan, ay nu gfangguna at ngay sisian.

¹³ Aroro ngay tagtanud nu matuyan tua sat fanambagun, fagayu taw gsuyu tua anya, ay kanya fagayu maseganama nu gfoyung sabaliwas fagafanudun tagsi antam, aroro sa tam fagmasadiun sa tam Fun Isus.

Tam Fagafanudun at Kamatuyanan

¹⁴ Maksvn nu gseg au te, wa glugo ya lumadlagan wata fia. Dewa katanya, griruk kyay sa emu

¹⁵ laman deyud au vtv andasug, sumaful o at masine Dius at ngay sisian at ugali. Itam wan tagleleg fag Dius at ngay taw, ay itam wan tagbakvd ay tagsarig sas fagmatuyanun.

¹⁶ Mayamag te, e nafasure at madulo sabaliwa tam fagafanudun: Kanya nsure, ay ansik taw fia. At Masine fag Falad nafatuyan sabaliwa anya, ay ngay tagbarita nalag anya. Sas fagayu talun e nafamoyung wan sabaliwa anya, ay ngayu tagafanud sa anya sas fagdaul daga, ay Dius nafabat anya sat fagmasineun.