1 Timuteu 1 - Fanawbuid tagsibaliwas Fakayabian

¹ Au, Pablu, tam Fun Isus at nasugu, gfaning Dius tam tagfalangfe at suguan, ay tam Fun Isus tam fagsegun.

² Timuteu, ku fakesugun ku sisian sas fagafanudun: siwa nangus fia emu fagmasineun, ay fagmagalangun, ay fagmanabayanun siginans Dius tam Mama ay Isus tam Fun.

Famararang sabaliwa at Yud Matuyan fag Foyungan

³ Kata ku longan emu gina au glo sas Masidunya te, banwani yap sis Efesu laman nansalag o tibak taw sanya tagsalan at foyungan.

⁴ Fararangi sa kafag ngay taw te, lag gfangulan at buknga sat ngay talagtagan ay nu ginsaful sabaliwa at ngay mangaguyang at ngay ngayan. Takatanya at fungfung fagbadbaboanun way, ay wa magubuk nu gfafasludan Dius at algan tam nasaful siginans fagafanudun.

⁵ Ku foyungan at masuad te, laman kedkesugan tua tam siginan at masine fag amatanganan, ay siginan at matuyan fag fagafanudun.

⁶ Tibak taw naubun takatanya ay nafaning sat yud e tungkul fag kamatoanan laman kamabadbaboan.

⁷ Kafag ngay taw kaylat nu sik tagfoyung fia Muisis at Faugali, deyud fia nasaful at longan ay at foyungan at fagfabulunun te, togdungug.

⁸ Saful watam te, masine Muisis at Faugali, nu gfaning tua tam sat matuyan fag balyawvtan.

⁹ Amatangani te, nusnge wain fag faugali bunwa sat matuyan fag ngay taw, sa way takamabo, ay sa takauri, ay sat yud gtoglag Dius, ay sa tagasalanan, ay sat yud gsuyu Dius, ay sat yud gafanud ay sa tagfabul at mama ay at mina, ay sa tiba yak takamabul,

¹⁰ ay sa tagfanugtug, ay sa tagtugtug at usama, ay sa tagfangkamul taw, ay sa takamuag, ay sa tagfoyung at yud matuyan ay sa takamabo at matuyan fag foyungan.

¹¹ Kanya fag foyungan siginan at Masine fag Barita sabaliwa tam Dius at mabalyanan ay tam fagfausegananun. Dius nafatigwanan sa angku laman gfoyung au sabaliwa kafag Masine fag Barita.

Pablu nu Gseg Dius

¹² Guseganan au sa tam Fun Isus at nafon angku fagmabitsugun, aroro natuyan angku te, sik fagfatigwanan, ay nafili angku laman at fagsuguan.

¹³ Kanya nafili angku dewa au nalong at mauri sa anya ay dewa au nafauri ay nafalingun anya. Ay dewa katanya, Dius anfanyu yay angku, aroro gina au yud gafanud sa anya, kya saful ku fakamulun.

¹⁴ Tam Fun nafon angku at maksvn fag fagmagalangun gasfuan fagafanudun ay fakesugun siginan tam Fun Isus.

¹⁵ Tuy at matuyan fag longan tam fagfaningun fia ay tam fagafanudun: tam Fun Isus andasug ste swa daga laman namalangfe ngay tagasalanan. Ay au wan at maksvn nu mauri sas fagayu.

¹⁶ Dewa katanya, tam Fun Isus anfanyu tua angku laman kanya namalag sas fagayu taw te, kaksvn tua kanya nu gagwantan laman sa angku, au fag taw tagtungud tua tibak taw nu mauri, laman at kinfasludan sa angku sik fafaskudanan sas fagayu tagafanud yay ban sa anya, kafag ngay taw at ke leleg ban at yud e fakatabuan.

¹⁷ Sadi way tam Dius at mabalyanan, at yud e fakatabuan fag Fun, ay at yud kabul, ay at yud kalag. Kabavn segi anya. Anud.

¹⁸ Timuteu, kata o ku sisian, nafon au sa emu tuy fag suguan, ebi fag ngay taglong at foyungan sabaliwa emu, laman maseganama nu gfawayan o,

¹⁹ ay laman e fagafanudun tuo ay masine am amatanganan. Tibak taw wa gfaning at matuyan fag amatanganan, nu katanya, kanya fagayu nafalyam at fagafanudun.

²⁰ Ay anggan Imeneu ay Aleandru nafalyam yangay at fagafanudun. Nafon kwan duama sas Satanas laman gfaragang wan nu glong at mauri sas Dius.