1 Samwel 8 - Fanawbuid tagsibaliwas Fakayabian

Ngay Taw Israel Naet sik Fun

¹ Samwel nu mafufuama wan, nafili at baguama fagdua laman ngay taw ban Israel at tagfangguna.

² At kaka at ngayan Uel, ay at arian Abya. Duksay gsud gfangguna sis Beerseba,

³ dewa katanya, wa kata at mama. Aroro kafag dua gfangalabian salapi, ay gbul ngay taw at famayad siginan nu gfadiuganan dewa yud matuyan, ay gsaruy at matuyan.

⁴ Ay ngay taw Israel at ngay fagtainan anful sas Samwel sas Rama.

⁵ Kanya fagayu glong te, “Mafagtainan wo ay am ngay baguama wa kata ya emu at matuyan. Katsi, foni emi sik fun at nanfunan ban emi, kata tibak talun nu e fun.”

⁶ Dewa katanya, Samwel ankuri kafag ngay tagfangguna at fagetun sa anya, ay kanya gdarangin sas Yawi.

⁷ Yawi nabalus Samwel te, “Fakamuluni kafag ngay taw at fagetun, aroro bunwa emu kafag ngay taw at fakauriun, angku way.

⁸ Siginan nu gfaduksun au kafag ngay taw siginans talun Igiptu dasug katsi, kanya fagayu kamabo way angku ay gfaning tibak fagsegan. Ay katsi, katanya yay at fakamulun sa emu.

⁹ Nu katanya, namakamulun o kata at fakaylatun, ay namararang o sa anya fagayu nu setain ban kafag fun at fakamulun.”

¹⁰ Ay Samwel nafoyung Yawi at nalong sa sangay taw taget at fun.

¹¹ Kanya nalong te, “Katatuy ban at nanfangguna ayu fag fun at fakamulun: kanya ban gbul siginan ayu ay ngay baguama laman sik ngay tagfawayan. Ay tiba ban tagsakay sis faguyudan ay tiba ban tagsakay sis kabayu laman tagfangguna ngay tagsakay sis faguyudan.

¹² Ay tiba ban sik ngay fun tagfawayan laman at namangguna sik libuk tagfawayan, ay tiba ban gfangguna limak safuluk tagfawayan. Ay tiba ban takali fagtanuman ay tiba taggutlu ay tiba ban takawat ngay famawayan ay takawat ngay fagagbilugun sis faguyudan.

¹³ Ay kanya ban namananad yangay ay ngay baguina laman takawat famaebebanglu, takamatama, ay takawat tinapay.

¹⁴ Ay kanya ban nangagbilug ay ngay daga at masine ay ay ngay tanum wat ubas, ay ay tanum ulibu, ay namon ban sat ngay fun sirut, fag ngay fagsuguan yangay.

¹⁵ Ay kanya ban namul ay fasafuluk afud trigu ay ngay tanum wat ubas ay namon yangay ban sat ngay fun sirut, fag ngay fagsuguan.

¹⁶ Ay gbul yangay ban ay ngay fagsuguan mangama ay mangena, ay anggan ay ngay baka ay ay ngay asnu laman namakamulun sat gamasun.

¹⁷ Ay kanya ban namul yangay ay fasafuluk afud fag ngay fagbaugun, ay namagsuguan ayu.

¹⁸ Ay ginanya ban fag menit, get am gubuk sa angku aroro ay nafili fag fun madot, dewa katanya kwa ban gbalus ayu.”

¹⁹ Ay kanya fag ngay taw wa gdungugan Samwel, glong way te, “Duan! Kaylat ami sik fun at nanfunan emi.

²⁰ Laman ban kata tuami tibak talun at ke fun at nanfangguna emi gina ami namawayan.”

²¹ Ay Samwel nu nadungug kafag ngay taw at longan, kanya nalong sas Yawi.

²² Ay Yawi gbalus anya te, “Namakamulun o kata at fagetun sa emu, ay nanfili o sik fun laman sa kafag ngay taw.” Sanya ginan, Samwel nalong sa sangay taw Israel te, “Kin! Kaylat kwan, ulii wan sa ay mesa furuan.”