1 Samwel 6 - Fanawbuid tagsibaliwas Fakayabian

Ngay Taw Filistia Nafafoli Fagsuadan Nasadian sas Talun Israel

¹ Fituk magdanun Yawi at Fagsuadan Nasadian nu si sangay taw Filistia. Gina yay sanya Fagsuadan Nasadian,

² ngay taw Filistia nafauro at ngay tagfon fanggalangun ay at ngay taginsaful ay nainto te, “Setain ro manga em fakamulun sas Yawi at Fagsuadan Nasadian? Longi emi nu setain ban nu namafoli ami sa em fagbulan fag talun.”

³ Ay at ngay tagfon fanggalangun ay at ngay taginsaful gbalus te, “Gina am namafoli Israel at Dius at Fagsuadan Nasadian, bubai yangay sik famalyam asalanan fag fanggalangun, ay sanya ginan ban Dius gfafia ayu ay gfaragang wan nu gfaurianan ayu.”

^4-5 Ngay taw Filistia ginto te, “Nataw ban em fagfabubaun fag fanggalangun laman famalyam asalanan?” Ay at ngay tagfon fanggalangun ay at ngay taginsaful gbalus te, “Nangawat am limak takata sik famaga ay limak takata sik but at mawatan siginans gintu, ay nu seyu tam ngay tagfangguna, fakayui nya ay awatan, aroro andasug sa antam ay sa tam ngay tagfangguna famaga fag faurianan ay andasug yangay sa antam ngay but at nafamin tam ngay fananumun si tam talun. Namon am takatanya fag fanggalangun sas Israel at Dius, bangaran ban kanya gfaragang wan nu gfaurianan tam ngay fagsegan ay tam talun.

⁶ Lag am kamaogatun ya ay ngay amatanganan, kata ngay taw Igiptu ay at fun at nafakamulun. Ngay taw Igiptu nafalfas ngay taw Israel aroro maksvn Dius nu gfaurianan anya fagayu.

⁷ Nu katanya, katsi nangawat am at bagu fag faguyudan ay namul am duak tina baka at bagu yay bangan griangan, ay yud yay batang nangguyudan. Namaguyud am kafag duak faguyudan sa kafag duak baka, ay ubungi way sas fagubungan at ngay riangan.

⁸ Sanya ginan, namul am Fagsuadan Nasadian ay namasa am sfaguyudan. Ay fasai yangay sday Fagsuadan Nasadian ay nawat takata famaga ay but at mawatan siginans gintu laman ay fanggalangun famalyam ay asalanan. Falaoi kafag baka deyud e gtaban; lag gsalag ya nusnga nday ro nu glao.

⁹ Dewa katanya, uliti fia nu dada ro nu glao. Kanya ro nu glao nu sa tuas Bet-Semes, sa sangay taw Israel at furuan at sadi, sumaful ro tam te, Yawi wan at nafaurianan antam. Ay nu dway ro nasanya, sumaful ro tam te, bunwa Israel at Dius at nafaurianan antam. Antunggu way lang sik faurianan.”

¹⁰ Nu katanya, kafag ngay taw nanamul duak baka tina ke riangan ay nafaguyudan sanya at nawat fag faguyudan. Dewa katanya, naubung way at riangan.

¹¹ Kafag ngay taw nafoli Fagsuadan Nasadian sas faguyudan ay nafasanya yangay fagsuadan at awatan fag limak famaga ay fag limak but at mawatan siginans gintu.

¹² Sanya ginan, kafag duak tina baka glao wan ay gturunan sas Bet-Semes ay kaduge glao guni. Ay ngay taw Filistia at ngay tagfangguna gguyan yay yakmay andasug sas Bet-Semes.

¹³ Ginanya, ngay taw Bet-Semes ggutlu sisad datag. Ay kanya fagayu maksvn nu guseganan nu nalag Fagsuadan Nasadian.

^14-15 Ay kafag duak baka andasug sas Uswe, sik taw Bet-Semes at gamasun, ay anragang si sik day gang daul. Ay Lebi at kasugfunanan fag ngay tagfon fanggalangun nabul Fagsuadan Nasadian ay fagsuadan at mawatan fag ngay famaga ay fag ngay but, ay nafoli sas tungud dalifi daul. Sanya ginan ngay taw nairug wan kafag faguyudan, ay nafabul kafag duak baka laman sik fagirugun fag fanggalangun sas Yawi.

¹⁶ Ay ngay taw Filistia at tagfangguna fag lima nalag at kinfasludan, ay ginanya yangay fag menit noli wan sas Ekrun.

¹⁷ Kafag limak famaga ay fag limak but at mawatan siginans gintu, kanya sik famonun siginans Filistia at ngay tagfangguna fag limak furuan: Asdud, Gasa, Askelun, Gat, ay Ekrun. Ay kanya fag ngay awatan sik fanggalangun laman famalyam asalanan.

¹⁸ Kafag limak but at mawatan siginans gintu, kanya tuga ngay taw Filistia at ngay furuan fag lima, ay at fagagbilugun mesa fag ngay furuan ayu sirut at maligung sanya, kafag limak tagfangguna at fagagbilugun. Ay dasug katsi, fagfatungkudan Fagsuadan Nasadian fag dalifi si yay gugat Uswe fag taw Bet-Semes at gamasun, laman famamatang sat kinfasludan.

¹⁹ Dewa katanya, Yawi nafabul fituk safuluk taw Bet-Semes, aroro kanya fagayu nananlag Fagsuadan Nasadian at bilug. Ay ngay taw Bet-Semes maksvn nu kabalu, aroro maksvn at faurianan sa kafag fituk safuluk taw.

²⁰ Kafag ngay taw ginto te, “Sinu at masalubang Yawi, at yud e malong fag Dius? Dada ban nu gfalin tam Fagsuadan Nasadian laman wa si ya antam?”

²¹ Sanya ginan, kafag ngay taw nasugu ngay tagfosuk longan sas furuan Kiryat-Earim, laman nanlong te, “Ngay taw Filistia nafafoli wan Fagsuadan Nasadian. Gewan, bubai wan sa ay talun.”