1 Samwel 2 - Fanawbuid tagsibaliwas Fakayabian

Ana at Darangin

¹ Sanya ginan, Ana gdarangin te, “Guseganan au sas Yawi! Aroro sat nafakamulun, nafalyam tua ku fakaplaun. Katsi kase ktua sa ku ngay fawayan. Guseganan au aroro kanya nafalangfe tua angku.

² Yawi way lang at yud e malong. We mafasud anya. We tibak fagsarigan at mafasud Dius.

³ Lag kamatungudun nu garingang o, aroro Yawi saful way fagayu nusnge wain, ay kanya ban nanginsaful ngay taw siginan at nafakamulun.

⁴ Kanya nafabul wan at maseganama fag ngay tagfawayan, ay nafabitsug tua at ngay mamomuy.

⁵ At maramraman ebi, katsi grvbvy at fakonun. Ay at yud e kwa ebi, katsi di e fagayudanun ya. Ay fagayu tagaranas anke ngay sisian tua. Dewa katanya, tangayu at sisian katsi we sisian ya.

⁶ Yawi e fagmabalyananun gfabul ay gfaleleg taw. Ay e fagmabalyananun namoli taw sat mabulan at talun ay gfalin sanya ginan.

⁷ Yawi e fagmabalyananun gfayud e kwa ay gfaramraman. Ay e fagmabalyananun yangay gfabat tibak taw ay gfababa tibak taw.

⁸ Kanya ggubuk at maidap fag ngay taw siginans fagidapun. Yawi e fagmabalyananun gfae fanambagun at maidap fag ngay taw magamut ngay fun ay gfae fagusegananun. Yawi wan tagagbilug fagdaul daga at fagtungkudan.

⁹ Kanya gdiri tua at matuyan fag ngay taw tagbanwan si anya. Dewa katanya, kanya gfabul at mauri fag ngay taw ay gfasas fagmadulumun. Nusnga sinu wa mababo nu siginan way at sadili fagmabitsugun.

¹⁰ Kanya gfabul at ngay fawayan, ay gfae lingsi laman namaurianan takatanya fag ngay taw. Yawi wan tagwabilug sas fagdaul daga. Ay at nafili fag fun gbabo tua ban gugat ay mabalyanan.”

¹¹ Ay Ana nu ntabu wan nu gdarangin, Elkana talanan noli wan sas Rama ay nafamato wan Samwel sis Yawi at bale laman gfakamulun sas Yawi, ay Eli galaga anya.

Eli at Baguama fag Dua at Asalanan

¹² Eli at baguama fagdua mauri ay wa gfaning Yawi.

¹³ Aroro wa gfaning ngay faugali sabaliwa ngay tagfon fanggalangun at fakamulun. Katatuy duksay at fakamulun: gina ngay taw gfon at fanggalangun, kaduge gseud yay ngay yamas, duksay gsugu at fagsuguan ay gfabuba sik tagbia fag saruk tagasarangan tulu.

¹⁴ Sanya ginan, at fagsuguan gsurut sasad bisu at ba saruk. Ay kayu at kinsuluy fag yamas, kanya ro sa sangay tagfon way fanggalangun at ekwan. Katanya duksay at fakamulun galay ngay taw Israel gfon at fanggalangun sis Silu.

¹⁵ Ay gina nangirug taba, at fagsuguan nangakbang sa tagirug ay glong te, “Foni sas tagfon fanggalangun yamas laman at sinugba. Aroro wa kaylat at maseudan, at fakaylatun at yud way antama.”

¹⁶ Ay tagirug nu nalong te, “Fanyai yap, ay nu nairug wa ro kafag taba, buli wa ro nusnge wain am fakaylatun,” ay kanya fag fagsuguan gbalus te, “Fastei wan! Aroro nu dway ro wo nafon angku, gago kro siginan emu kafag taba.”

¹⁷ Eli at ngay baguama at fakamulun maksvn nu mauri sis Yawi at daga salubangan, aroro wa gfae masuad ngay fanggalangun.

¹⁸ Ginanya, Samwel dewa sisian yay, gfakamulun wan sas Yawi. Kanya galanbungan at mafilian fag lanbung at mawatan siginan at masine fag ramit kata sik tagfon fanggalangun.

¹⁹ Kayu banwa Ana kawat Samwel at lanbung ay namosuk sa anya, gfasfuan galay dadwa namon at fanggalangun sas Yawi.

²⁰ Ay Eli nafadante Elkana dadwa. Kanya nalong sas Elkana te, “Yawi ban nangus gfae ngay sisian emu siginan am mangena Ana, fantubus at naet fag sisian ay at nafon sas Yawi.” Sanya ginan, dadwa guli wan sat bale.

²¹ Yawi kafanyu tua Ana. Nu katanya, Ana anke sisian yay tuluk munama ay duak munina, kaduge Samwel kagurang ay gfakamulun sis Yawi at bale.

Eli ay at ngay Baguama

²² Eli mafufuama wan. Kanya nadungug at ngay baguama at nafakamulun mauri sa sangay taw Israel. Ay nasaful yangay te, at baguama fagdua nafanugtug sa sangay mangena tagfakamulun sis Yawi at sakbawan bale.

²³ Ay kanya nalong sat ngay baguama te, “Nadungug au siginan sangay taw te, maksvn ay nafakamulun at mauri. Wain ay fagnafakamulunun takatanya?

²⁴ Faragangi wan takatanya ay fakamulun, aroro wa masine ku nadungug siginans Yawi at ngay taw.”

²⁵ Ay Eli nalong yangay te, “Sik taw nu anke asalanan sat iba, Dius gfawabilugan yay kafag duak taw, dewa katanya, sinu ya ban tagwabilug ngay taw nu nke asalanan way sas Yawi?” Dewa katanya, duksay wa nadungugan at mama, aroro Yawi nafalganan wan gfabul kanya fag dua.

²⁶ Ay kaduge Samwel kagurang, Yawi ay anggan ngay taw guseganan tua anya.

At Foyungan sabaliwas Eli Talanan

²⁷ Dius at fagsuguan at sadi ankakbang sas Eli laman nanlong sa anya te, “Katatuy Yawi at longan: nafasure au ku sadili sa am mangaguyang Arun, ay sat ngay kaiban gina kanya fagayu gafagsuguanan sis talun Igiptu.

²⁸ Sas fagayu Israel at kasugfunanan, nafili au Arun laman tagfon fanggalangun tagfakamulun si ku fagirugan, laman tagfon famaebebanglu, ay tagsulun at mafilian fag lanbung laman sa sangay tagfon fanggalangun. Nafae afud kyangay sa anya fagayu siginan sangay taw Israel at ngay fanggalangun.

²⁹ Wain ay fagalabianun yay ngay fanggalangun laman sa angku? Wain nu gsuyu o am ngay baguama fagtungudun tua nu gsuyu o angku? Nafabayan o am ngay baguama nu gfataglu at bilug siginan nu kon ngay fanggalangun ku ngay taw Israel at fon sa angku.

³⁰ Au Yawi, Israel at Dius, ebi nafatuyanan au te, am mangaguyang way lang ban at ngay kasugfunanan at namakamulun sa angku laman sik ngay tagfon fanggalangun. Ay katsi duan ya, aroro gfauseganan au tagfauseganan angku, ay gfaurianan kway tagfauri angku.

^31-32 Amatangani, sik buknga ban namabul au am ngay baguama ay am ngay mangaguyang at ngay sugfun. Ay kabavn ban gidapan o ay wa ban o magbilug ku fagnamonun at yud ban kamin sa sangay taw Israel. Ay nu gleleg ban am wa ngaduge.

³³ Ay kya ban gaiyan am kalongan tiba nu gfakamulun tua sa angku laman sik tagfon fanggalangun, dewa katanya, kanya ban fag ngay taw nandalan faurianan, ay wa yangay ban ngaduge nu gleleg.

³⁴ Am fagtoglagan ban te, kafasludan takatanya fagayu, sik menit ban am baguama fagdua gasfuan kabul.

³⁵ Gfili kban sik tagfon fanggalangun at matuyan ay tagfaning ku fakaylatun. Namayu kban at ngay sugfun at namakamulun ban kabavn sa ku nafili fag fun.

³⁶ Fagayu ban am ngay sugfun at sawad gfangetan way lang salapi ay fakonun siginan ku nafili fag tagfon fanggalangun at ngay sugfun. Am kasugfunanan ban gfainfanyuan get sanya fag ngay tagfon fanggalangun laman e fakonun.”