1 Samwel 16 - Fanawbuid tagsibaliwas Fakayabian

Nafili Dabid laman sik Fun

¹ Ginanya, Yawi nalong sas Samwel te, “Seduge tua ban nu kabalu o at kinfasludan sas Saul? Kwa kaylat ya anya nu gfunan. Katsi ro, namapnu o langis sas sunge fag fagsuadan ay loi sas Ese sas furuan Betleem aroro nafili au at baguama at sadi laman sik fun.”

² Dewa katanya, Samwel nalong te, “Tain ro nu manangadasug au sanya? Aroro Saul ro nu nasaful way, gfabul ro angku.” Yawi nalong te, “Tabani sik baka tina tumad ay longi ro te, ‘Andasug au laman namon fanggalangun sas Yawi.’

³ Ay gina ro wo namon fanggalangun tabani Ese, ay gfoyung kro emu am fakamulun. Ay gfoyung kyangay ro sa emu Ese at baguama at sadi ku nafili fag fun. Ay ugwagi ro sat alfuyu langis.”

⁴ Ay Samwel nafaning Yawi at suguan. Kanya nu ndasug sas Betleem, ngay fagtainan sis furuan nafablang anya gtadtaruyan kalimu ay nainto te, “O am fagnasteun sa tua baliwas fagmanabayanun?”

⁵ Samwel gbalus te, “Sabv, nastie au laman namon fanggalangun sas Yawi. Falganani ay sadili nu nansalubang am Yawi, ay aloi angku laman namon sa anya fanggalangun.” Sanya ginan, Samwel nafafalganan Ese talamean ay nataban laman namon fanggalangun sas Yawi.

⁶ Ay talamean nu ndasug wan, Samwel nadama Elyab ay namatangan te, “Sia wa fia Yawi at nafili fag fun.”

⁷ Ay Yawi nalong sas Samwel te, “Lag o gdama at kabatan ay at kaseganaman aroro bunwa kanya ku nafili. Aroro nu gfili au wa kata staw nu gfili, taw nu gdama si way at kabilugan, ay nu gdama au si tua at amatanganan.”

⁸ Sanya ginan, Ese nauro Abinadab ay nafakbang sas Samwel. Ay Samwel nalong te, “Bunya kanya Yawi at nafili.”

⁹ Ay Ese nauro Sama ay nafakbang sas Samwel. Ay Samwel nalong te, “Bunya kanya Yawi at nafili.”

¹⁰ Ay Ese nauro at baguama fag fitu ay nafakbang sas Samwel, ay Samwel nalong te, “Ye sanya Yawi at nafili.”

¹¹ Samwel nainto sas Ese te, “O kayu way nya am ngay baguama?” Ese gbalus te, “Bundi, ku ngenge ya, kanya galaga way em ngay tupa.” Samwel nalong te, “Sugui sik taw laman nantaban anya. Ya ro tam namon fanggalangun nu dyakmay ro kanya andasug.”

¹² Nu katanya, Ese nafauro Dabid ay nafakbang sas Samwel. Dabid sik maseganama fag baguama, ay masine at kamatan. Sanya ginan, Yawi nalong te, “Kanya wan ku nafili, ugwagi sat alfuyu langis.”

¹³ Ay Samwel nabul at buba fag langis ay naugwag sas Dabid at alfuyu sit ngay faduksay at daga salubangan. Siginan ginanya fag menit, Yawi at Falad antayuk sas Dabid. Ay Samwel noli wan sas Rama.

Dabid Gfakamulun sis Saul

¹⁴ Yawi at Falad wa gbanwan ya sis Saul. Ay Yawi nafadasug sik mauri fag falad laman namaidapan anya.

¹⁵ Ay Saul at ngay fagsuguan nalong te, “Matuyan wan, Yawi nafadasug sik mauri fag falad laman namaidapan emu.

¹⁶ Em fun, nu kaylat o, nanrvbvy ro mi sik taw tagsaful gfawang fagfawangun ke ngay bakyang, laman ban at mauri fag falad nu gfaidapan way emu, manabayan tua am amatanganan.”

¹⁷ Ay Saul gbalus at ngay fagsuguan te, “Agvd, nanrvbvy am sik taw tagsaful gfawang fagfawangun ke ngay bakyang ay tabani anya stae.”

¹⁸ Ay at fagsuguan at sadi nabalus anya te, “E nasaful au sik baguama tagsaful gfawang fagfawangun ke ngay bakyang, kanya Ese at baguama at sadi sis Betleem. Ay kanya fag baguama sik maseganama nu gfawayan, ay matuyan nu garingang. Saman ya kanya, Yawi si tua anya.”

¹⁹ Nu katanya, Saul nasugu sik ngay tagfosuk longan sas Ese laman nanlong te, “Get au sa emu te, sugui stae am baguama Dabid, fag tagulit ngay tupa.”

²⁰ Ay katanya wa fia Ese at nafakamulun, kanya nasugu Dabid sas Saul, ay nafabuba sas sik asnu ngay tinapay laman at famonun sas fun, ay fanlangu at masuadan si sik balat kambing fag fagsuadan, ay sik riangan kambing.

²¹ Sanya ginan, Dabid nalao sas Saul laman namasigad namakamulun ay Saul maksvn nu guseganan, ay nafili anya tagbuba at ngay famawayan.

²² Ay Saul gdog yay nafadasug sik longan sas Ese te, “Get au sa emu te, aylati nu gfabanwan au Dabid ste laman ggubuk angku, aroro maksvn nu guseganan au anya.”

²³ At mauri fag falad galay andasug sas Saul, Dabid gfawang at fagfawangun ke ngay bakyang. Kaduge Dabid gfawang, at mauri fag falad gduksun siginans Saul ay at amatanganan kamanabayan.