1 Samwel 13 - Fanawbuid tagsibaliwas Fakayabian

Samwel Nasalag Saul

¹ Saul at banwa tuluk safulu gina gfasigad gfunan ngay taw Israel, ay at kadugean nu gfunan ufatk safulu e duak banwa.

² Ay Saul nafili tuluk libuk mangama siginan sangay taw Israel laman namawayan ngay taw Filistia, ay at yud antap fag ngay mangama nafauli wan sat mesa bale. Ay kanya nataban duak libuk mangama sas Mikmas ay sa sangay buksul tagsis ligung furuan Betel, ay sadik libuk mangama nanangalo at baguama Yunatan sas Gibya, Benamin at talun.

³ Ay Yunatan nafawayan ay nababo ngay taw Filistia sit fagmafulan sis Geba ay tibak taw Filistia nadungug at kinfasludan. Ay Saul nasugu te, “Budyungi sas fagdaul Israel laman ngay taw Ebreu gfalganan nu namawayan.”

⁴ Ngay taw Israel nadungug te, ngay taw Filistia maksvn nu kadotama anya fagayu aroro Saul nafawayan at fagmafulan. Nu katanya, Saul ay ngay taw Israel nanangaful sas Gilgal.

⁵ Nu katanya, ngay taw Filistia nafalganan laman namawayan ngay taw Israel. Kanya fagayu e tuluk libuk faguyudan fangawayan, ay unumk libuk tagsaful gsakay sis kabayu, ay at ngay tagfawayan at yud katap ya kayu lagnas sis tigyangan dagat. Ay kanya fagayu nanangaful sas Mikmas, sis Bet-Aben sfakamenitan baliwa.

⁶ Ngay taw Israel nu nasaful te, gababawan way ro, kanya fagayu nananuksuan sa sangay luib ay sas wa sigbo ay sas wa gang ay sa sangay alian ay sa sangay fagfungsuan mamam.

⁷ Ay tibak taw Israel nadife Liskung Urdan tagsas Gad ay sas Gilyad. Ay Saul anfamato sis Gilgal, ay at ngay ibama gtadtaruyan at kaksvnan nu kalimu.

⁸ Ay Saul nafanya Samwel sis Gilgal fituk menit kata at fatuyanan, dewa katanya, Samwel wa ndasug. Ay Saul nu nalag te, at ngay ibama glao wan gsadsadian, kanya nalong te,

⁹ “Bubai stae fagirugun fag fanggalangun ay fanggalangun laman sas fagmanabayanun.” Ay Saul nafon sas Dius kafag ngay fanggalangun.

¹⁰ Saul nu gakatabuun wan nu gfon kafag ngay fanggalangun, Samwel andasug. Ay Saul nangakbang laman namakamatoan, ay Samwel ginto te,

¹¹ “Nataw am nafakamulun?” Saul gbalus te, “Nalag au ku ngay ibama nu glao gsadsadian, aroro wo andasug sim nalong fag buknga, aroro ngay taw Filistia maful sis Mikmas ay mafalganan laman namawayan.

¹² Nu katanya, namatangan au te, ngay taw Filistia siring namawayan wan emi ay yami nafon fanggalangun sas Yawi laman get gubuk sa anya. Ay nafabulunan kwan nairug kanya fag ngay fanggalangun.”

¹³ Samwel nalong te, “Mauri am nafakamulun! Wo nafaning Yawi am Dius at suguan emu. Nu nafaning di o, satu ban kabavn am ngay kasugfunanan tua tagfunan Israel.

¹⁴ Dewa katanya, wa ban kafasludan ya takatanya aroro Yawi nalag wan sik taw tagfaning at fakaylatun, ay kanya nafili laman at nanfangguna ban at ngay taw, aroro wo nafaning Yawi at suguan.”

¹⁵ Sanya ginan, Samwel nalao wan siginans Gilgal ay nataglayun sas Gibya, Benamin at fagagbilugun fag daga. Ay Saul natap at ngay tagfawayan ay at sawad, unum yak sandan.

Ngay Taw Israel we Famawayan

¹⁶ Saul ay at baguama Yunatan ay at kinsawad fag ngay tagfawayan anful sas Geba, Benamin at fagagbilugun fag daga, ay ginanya ngay taw Filistia anful yangay sas Mikmas.

¹⁷ Ngay taw Filistia nu namawayan wan, nafud sas tuluk gaban. Sik gaban nasas Ufra, sas Sual fag talun.

¹⁸ Ay sik gaban nasas Bet-Kurun, ay sik gaban nasa sik buksul takabanawan sas datag Sebuyim tagsas talun at yud e taw.

¹⁹ Ginanya, ngay taw Israel we saful kawat fiso, aroro ngay taw Filistia wa nafoyung, ay kanya fagayu nalong te, “Ngay taw Ebreu ban manga manangawat at ngay fiso ay at ngay bangko.”

²⁰ Nu katanya, ngay taw Israel nu kaylat way namaglat at ngay fagagbilugun kata aradu, pala, wase, ay fanggafas, kanya glao yay sa sangay taw Filistia tagsaful.

²¹ Ngay taw Israel nu nanamaglat way at ngay aradu ay pala, at famayad duak salapi, ay nu nanamaglat at ngay fanggafas ay wase, at famayad sadik salapi.

²² Nu katanya, gina ngay taw Israel namawayan, fun Saul way lang talame at ke fiso ay at ke bangko.

²³ Ginanya, ngay taw Filistia nasugu at ngay tagfawayan laman nangulit tagsas Mikmas fag dalan.