1 Samwel 1 - Fanawbuid tagsibaliwas Fakayabian

Samwel nu Kasalug

¹ E sik mangama at ngayan Elkana siginan Suf at gaban. Kanya gbanwan sis Rama, tagsis Efraim at fagagbilugun fag ngay buksul. Kanya Erukam at baguama, ay Elyu at fufu. Ay Elyu, Tuku at baguama, ay Tuku, Suf at baguama, siginan Efraim at gaban.

² Elkana dua at mangena: Ana ay Penina. Penina e ngay sisian tua ay Ana we sisian.

³ Galay banwa, Elkana gadgaloan at mangena fagdua ay at ngay sisian sas Silu laman nanseg ay namon fanggalangun sas Yawi at Mabalyanan. Ginanya tagfon fanggalangun sas Yawi, Ufni ay Finekas. Kanya fag dua Eli at baguama.

⁴ Elkana galay gfon at fanggalangun, kanya gfafudan at fanggalangun sas Penina talnayan.

⁵ Dewa katanya, at fon sas Ana ayu yap tua aroro kanya kesug tua anya dewa yud e sisian, aroro Yawi nafasik tagaranas Ana.

⁶ Ay aroro we sisian, Penina gfalingun ay gfapla gugat anya.

⁷ Galay banwa katanya way gugat at fakamulun. Ana galay glao sas Yawi at bale, Penina gfalingun anya yakmay nawayway ay Ana wa gfangon ya.

⁸ Elkana nalong sas Ana te, “Nataw am fagwaywayun? Wain am fagyudun kaylat gfangon? Wain am fagmabaluanun gugat? O nunda nu mafanud au sa emu wa gtungud yap tua sas safuluk sisian?”

^9-10 Sayginan, gina Elkana talanan antabu gfangon sis Yawi at bale sis Silu, Ana namalindug ay gdarangin gwayway aroro maksvn nu kabalu. Ginanya, Eli sanya yangay malunggung sis Yawi at sakbawan bale.

¹¹ Ana gfatuyanan sas Yawi te, “Yawi at Mabalyanan, damai ku fagidapun. Amatangi angku am fagsuguan. Nu nafon di ban o angku sik sisian munama, namon kban anya sa emu kaduge gleleg ay kwa ban gufo at buk.”

^12-13 Kaduge Ana gdarangin sas Yawi, Eli nalag Ana nu gibugan. Ay Eli namatangan te, Ana galangu.

¹⁴ Nu katanya, kanya nalong sa anya te, “Seduge ya ban nu glanguan o gugat? Deyud ya am fanlangu!”

¹⁵ Ay Ana gbalus te, “Duan, kwa galangu, kwa batang ginum nusnge wain fag fanlangu. Ku fakataun tuy gfatigwanan kway sas Yawi ku fagidapun si ku amatanganan.

¹⁶ Lag o gamatangan te, sik mauri au fag mangena. Gdarangin kway aroro maksvn ku fakabaluun.”

¹⁷ Eli nalong te, “Kin, ulii wan mabayan. Israel at Dius gfon ban nangus emu am fagetun.”

¹⁸ Ana gbalus te, “Fadi fadi ngaro am fagmasineun sa angku.” Sanya ginan, Ana nfoli wan ay nafangon tua, ay di e fakabaluun ya.

¹⁹ Balabag di, Elkana ay at mangena fagdua ay at ngay sisian masurip nu kafulo ay naseg Yawi, sanya ginan, noli wan sat bale sas Rama. Ay Elkana nafataladan Ana, ay Yawi nabalus Ana at darangin.

²⁰ Ay andasug sik buknga, Ana nafafion ay nafasalug sik munama. Ay kanya nafangayan at munama te, Samwel, aroro kanya nalong te, “Naet au ku sisian sas Yawi.”

Ana nu Gfatigwanan Samwel sas Yawi

²¹ Andasug at buknga Elkana ay at mangena fagdua ay at ngay sisian nu gdog namon fanggalangun sas Yawi, kata at fakamulun gugat galay banwa. Ay ginanya yangay nu gfon at fanggalangun laman gfafasludan at fatuyanan sas Yawi.

²² Dewa katanya, Ana wa nanangalo. Kanya nalong sat mangama te, “Ta sisian ban nu ddi gsusu ya, namuba kban anya sas Yawi at bale laman ku fanggalangun sas Yawi. Ay kabavn ban sanya wan nu gbanwan.”

²³ Elkana gbalus te, “Namakamulun o nusnga setaw am algan at masine. Ste yap o kaduge ta sisian gsusu yay. Nangus Yawi ggubuk emu laman gfafasludan o am fatuyanan sa anya.” Ay Ana wa nanangalo aroro galaga way at sisian.

²⁴ Ay kafag sisian nu nbia wan, Ana nanamuba anya sas Yawi at bale sas Silu. Ay nabuba yangay sik baka tama tagtulu at banwa, ay sik wabilug saku fangawat tinapay ay sik malangu fag mamam masuadan si sik balat fagbaugun.

²⁵ Ay nu nafabul wan kafag baka, nabuba Samwel sas Eli.

²⁶ Ay Ana nalong sas Eli te, “Nu namatang di o, au wan ebi fag mangena at malindug ste tagdarangin sas Yawi.

²⁷ Ginanya naet au tuy fag sisian sas Yawi ay kanya nabalus tua angku.

²⁸ Ay katsi gfon au anya sas Yawi. Ay kanya ban gfaning gugat Yawi.” Ay kanya fagayu naseg Yawi.