1 Pedru 5 - Fanawbuid tagsibaliwas Fakayabian

Dius at ngay Tupa

¹ Maksvn nu glong au sa ayu tagfagtainan ngay tagafanud te, au sik fagtainan kyangay, at nalag tam Fun Isus at ngay naidapanan, ay e afud kyangay at fagmasineun takadasug yay ban.

² Alagai Dius at ngay tupa tagsi ayu. Dangay am gafabulunan, nu bunway useganani tua fia sa ay amatanganan, ay bunwa te, aroro kaylat am gyabulun salapi. Katanya tua Dius at fakaylatun.

³ Lag am kata sik fun, tagfansugu sat ngay fagsuguan, abat ngate, fanggunai kanya fagayu sat masine, laman sik fagulitan tuam.

⁴ Ay nu ndasug ban Tiba Tungud fag Tagalaga tupa, kanya namauseganan ayu kabavn ban.

⁵ Ay am fag ngay baguama, faningi tua ay ngay fagtainan bale fakafulan. Ay fagayu am fadfababaunani tua, aroro marirukan sis Dius at Longan te, “Dius gsalag fagayu taw takamatungudun, ay ggubuk fagayu takamababaun.”

⁶ Nu katanya, famababauni tua sas Dius at daga fagmabalyananun, ay kanya ban gfabat ayu nu ndasug sit filian fag menit.

⁷ Fatigwanani wan sa anya fagayu ay fagafanawaun, aroro kanya wan takesug ayu.

⁸ Mafuloani ay mafalganani aroro Satanas ay fawayan glo gsubang gugat kata sik liun, gligungan ay grvbvy at fagnangonun.

⁹ Ay am, fawayani anya, ay faksvni ay fagafanudun sas Dius. Nasaful wam te, bundi am lang tagagwantan takatatuy fag fagidapun, nu bunway anggan tua ay ngay faduksay sas fagdaul daga.

¹⁰ Tam Dius magalang sas fagayu taw, ay kanya at nauro ayu sat yud e fakatabuan fag fagmasineun siginan tam Fun Isus. Wa ban glugo ya nu gidapan am, ay Dius ban namafia ay namabitsug ay namaksvn ayu.

¹¹ Siwa anya fagmabalyananun kabavn. Anud.

Fakatabuan at Longan

¹² Gtoglag au Silas te, sik matuyan fag faduksay. Kanya at nagubuk angku nu griruk au sa ayu tuy fag rirukan at munagud, laman gfaksvn ay amatanganan ay gfatuyan ayu te, Dius at nafakamulun sa ayu gfalag te, kanya magalang tua. Banwani sat fagmagalangun.

¹³ Sis furuan Babilunya tam ngay faduksay glong ayu te, O manabayan tuam? Dius nafili yangay anya fagayu kata ayu. Markus ku sisian sas fagafanudun, glong yangay ayu te, O manabayan tuam?

¹⁴ Kamatoani fia masine ay iba aroro tagfaduksayan am sa tam Fun Isus. Fagmanabayanun sumawa nangus fia ayu fagayu at masadi sa tam Fun Isus.