1 Pedru 1 - Fanawbuid tagsibaliwas Fakayabian

¹ Au, Pedru, Isus tam Fun at nasugu. Griruk au sa ayu, Dius at ngay nafili at narapyagan ay tagbanwan sis Puntu ay sis Galasya ay sis Kapadusya, ay sis Asya, ay sis Bitinya fag ngay talun.

² Am wan Dius tam Mama at ngay nafili kata at fagsafulun siginans fakasigadan. Ay at Masine fag Falad gfasine ayu, laman gfaning tuam Isus tam Fun ay laman umkalyam ay ngay asalanan siginan at nabulanan. Sumawa nangus fia ayu tagtungud at fagmagalangun ay at fagmanabayanun.

Gbia Tam Fagsegun

³ Segi tam Dius, tam Fun Isus at Mama. Aroro Dius maksvn nu kafanyu antam, ansalug tam sa sik bagu fag leleg, siginan tam Fun Isus at nadogan naleleg. Kanya fag bagu leleg tagfon sa antam at maksvn fag fagsegun.

⁴ Magbilug tam sik ramraman at yud katabu ay at yud karasras ay at yud kalyam. Kanya fag ramraman at mafalganan sa ayu si tuas banwa.

⁵ Ay siginan ay fagafanudun, Dius at fagmabalyananun gdiri ayu kaduge am gfanya fakalangfean, at mafalganan takasure ban sa taguyan fag buknga.

⁶ Nu katanya, useganani maksvn, dewa ban am nandalan yay ngay fagidapun siginan ngayuk famaskud at yud ban ngaduge.

⁷ Gintu dewa mafanud, namadalan sasad afuy laman sumaful te, o matuyan. Ay ay fagafanudun tagtungud tuas gintu, gfadalan yangay sas famaskud, laman umsaful te, o matuyan. Ay nu matuyan tua, e gfauseganan ban ayu, ay e gfae fagmasineun gina ban Isus, Dius at nafili fag Fun, andasug.

⁸ Dewa am yud batang glag anya, kesug tuam anya. Ay dasug katsi yam glag anya, dewa katanya gafanud tuam sa anya. Nu katanya, maksvn tua nu guseganan am, at kaksvnan we taw ya mafafoyung.

⁹ Aroro gbul wam ay fagafanudun at rawvg, we tiba nu bunway ay falad at fakalangfean.

¹⁰ Dius at ngay taglong ebi nainsaful fia maksvn sabaliwa kanya fag fakalangfean, ay kanya fagayu nafoyung sabaliwa kafag famonun takadasug sa ayu.

¹¹ Ay kanya fag ngay taglong gugatan gyasafulun te, ginain ban ay setain nu kafasludan at longan. Siwa anya fagayu tam Fun Isus at Masine fag Falad, ay kanya fagayu gfoyung sabaliwa Dius at nafili fag Fun at fagnandalanun fag fagidapun ay at fagnamadasugun fag fagmasineun.

¹² Dius nafoyung sa kafag ngay taglong te, bunwa at ngay sadili at faggubukun nu bunway ayu tua at faggubukun. Ay katsi nadungug tuam kanya fag foyungan siginan at nafoyung ayu at Masine fag Barita. Kanya fagayu nafoyung sa ayu siginan at Masine fag Falad at fagmabalyananun, Dius at nasugu siginans banwa. Ngay tagbarita kaylat yangay nangasaful sabaliwa kafag ngay matuyan.

Ugalii at Matuyan

¹³ Nu katanya, falganani ay ngay amatanganan. Am maksvni ay e fagseguni te, Dius gfon ban ayu at fagmagalangun, gina ban tam Fun Isus andasug.

¹⁴ Am wan, takata at mafamaning fag ngay sisian, nu katanya, lag am gfaning ya ay ngay bilug at fakaylatun, kata ebi gina am yud e fagsafulun.

¹⁵ Dakngani at nafili ayu fag Dius we malong, at masine anggan am, dangay am e kalong nusnge wain ay fakamulun.

¹⁶ Kata Dius at Longan sit Rirukan te, “Lag am e malong, aroro au kwe malong.”

¹⁷ Amatangani te, ay fagsegan fag Mama di e fagfili. Kanya ban namaurianan ay mannga namon at masine sas galay at sadi kata at nafakamulun. Nu katanya, ugalii tua at masine ay at matuyan, ay faningi anya kaduge am gbanwan ste swa daga.

¹⁸ Nasaful wam at nafalangfe ayu siginan at yud e tungkul fag ugali, tagsiginan ay ngay mangaguyang. At nafalangfe ayu bunwa takarasras ay takamin, kata sanbung salapi ay gintu,

¹⁹ nu bunway siginan tua tam Fun Isus at taguk. Kanya kata sik tupa riangan at masine ay at yud e malong.

²⁰ Siginan nu yud ankawat tam daga, Dius nafili wan anya, ay katsi, sfakatabuan fag ngay menit, kanya nsure laman sa ayu.

²¹ Aroro siginan anya gafanud tuam sas Dius, at nafadog nafaleleg ay at nafauseganan anya. Nu katanya, e fagafanudun tuam ay e fagsegun sas Dius.

²² Siginan nu gfaning am at matuyan, katsi masine tuam ay kedkesugan laman sik ngay tagfaduksayan. Nu katanya, faksvni ay famafanudi fia nu kedkesugan am.

²³ Nadog am ansalug, bundi siginans taw at fakamulun, nu bunway siginan tua tagleleg ay yud katabu fag Dius at Longan.

²⁴ Kata at Rirukan te, “Fagayu taw kata ways makmak, ay fagayu at fagmasineun kata ways barugwak. Makmak kalangke way ay at barugwak katong.

²⁵ Dewa katanya, tam Fun at longan katanya tua gugat kabavn.” Kanya wa fag longan, at Masine fag Barita ay nadungug.