1 Kurintu 7 - Fanawbuid tagsibaliwas Fakayabian

Fagintoun sabaliwa nu Nangadadwa

¹ Katsi gbalus au ay rirukan sa angku te, “O masine sik mangama nu ddi kamubay ya?”

² Galay sik mangama masine nu kamubay, ay galay sik mangena masine nu gfanmangama, laman masaruy fagfanugtugun.

³ At masine sik mangama fauseganani tua at mangena, ay anggan at mangena fauseganani yangay at mangama.

⁴ Aroro bunwa ya at mangena tagagbilug at sadili bilug, nu bunway at mangama wan tagagbilug anya. Ay katanya yangay bunwa ya at mangama tagagbilug at sadili bilug, nu bunway at mangena wan tagagbilug anya.

⁵ Lag am yud gtaladan nu ddi am e kamatoanan te, “Lag yap ban ta nantaladan, laman e buknga tua ta gdarangin.” Ay sanya ginan nandog yap am nantaladan laman Satanas di gfae asalanan ayu siginan ay bilug at fakaylatun.

⁶ Ku longan bunwa sik suguan, gfae amatanganan kway lang ayu sabaliwa takatanya.

⁷ Ku fakaylatun nangus nu kata am angku. Dewa katanya, galay am at sadi e fagmakatuun am tagsaman saman siginans Dius.

⁸ Ay katatuy ku longan sa sangay yud yay e mangama ay sa sangay fagbubayun, masine kafag ngay mangena nu yud gfanmangama ya, kata nu yud au kamubay.

⁹ Ay baliwan nu dway mafaragang at sadili, masine nu gfanmangama yay. Masine fanmangamai yap laman ban di gamatangan gugat sabaliwa at bilug at fakaylatun.

¹⁰ Ay katatuy ku longan sa sangay dadwa. Bunwa au at ke suguan takatatuy nu bunway tam Fun tua. Sik mangena lag gubun at mangama.

¹¹ Ay nu naubun way, lag gdog ya gfanmangama, nu dway anfoli ya sat mangama. Ay sik mangama lag yangay gubun at mangena.

¹² Sa tibak taw, katatuy ku longan, bunwa tam Fun at ke longan. Sik tagafanud fag mangama at mangena dewa sik yud gafanud, kafag mangena nu kaylat tua anya, kanya fag mangama lag gubun ya at mangena.

¹³ Ay sik tagafanud fag mangena, at mangama dewa sik yud gafanud, kafag mangama nu kaylat tua anya, kafag mangena lag gubun ya at mangama.

¹⁴ Aroro sik mangama at yud gafanud ansik matuyan tua sas Dius siginan at mangena, ay sik mangena at yud gafanud ansik matuyan tua sas Dius siginan at mangama. Ay nu dway katanya, at sisian ban wa masine sas Dius. Ay at matuyan, ansine tua sa anya.

¹⁵ Ay dewa katanya, at yud gafanud fag mangama nu gubun wan at mangena, ay at yud gafanud fag mangena nu gubun wan at mangama, lag am gsalag ya. Sabaliwa takatanya, tagafanud fag mangama ay fag mangena wa gfatawad ya at mangena ay at mangama. Aroro tam Dius at fagnauroun antam laman namanwan tua tam manabayan.

¹⁶ Mangena, wo nasaful te, Dius nangagbilug emu laman ban am mangama umlangfe. Ay o, mangama, wo nasaful te, Dius nangagbilug emu laman ban am mangena umlangfe.

¹⁷ Ay dewa katanya, galay am at sadi banwani kata tam Fun at nafon sa ayu fag kayaunanan, kata gina Dius guro ayu. Katanya ku suguan sas fagayu tagafanud.

¹⁸ Sik taw nu e fakatoglagan wan gina Dius guro anya, lag gfabali ya at fakatoglagan. Ay sik taw at yud e fakatoglagan gina Dius guro anya, lag gfae fakatoglagan ya.

¹⁹ Aroro wa mafanud sik taw dewa e fakatoglagan ay deyud e fakatoglagan. At mafanud nu gfaning tua Dius at ngay suguan.

²⁰ Galay am at sadi fataglayuni ay kayaunanan kata gina Dius guro ayu.

²¹ Nu sik fagsuguan o gina Dius guro emu, lag o gamatangan ya. Dewa katanya, nu e buknga tuo kalfas, ugatani laman umkalfas o.

²² Aroro sik taw dewa sik fagsuguan gina tam Fun guro anya, tam Fun nafalfas wan anya siginans asalanan. Ay katanya yangay sik taw yud fagsuguan gina tam Fun guro anya, kanya tam Fun Isus wan at fagsuguan.

²³ Dius nabayad ayu at maksvn fag famayad. Nu katanya, lag am nangafagsuguanan ya sa tibak taw.

²⁴ Nu katanya, ku ngay faduksay, nusnga setain ay kayaunanan gina tam Dius guro ayu, banwani katanya at ke fagmasadiun sas Dius.

Sabaliwa at ngay Yud yay e Mangama ay e Mangena ay sa sangay Fagbubayun

²⁵ Ay sabaliwa at yud yay e mangena ay e mangama, kwe faluan longan tagsiginan tam Fun. Ay dewa katanya, aroro sik fagfatigwanan au siginan tam Fun at fakafanyun, katatuy ku amatanganan:

²⁶ masine sik mangama nu gbanwan kata at kayaunanan, aroro katsi fag ngay menit maksvn nu maidap.

²⁷ Nu e mangena wo, lag am gsaruayan ya. Ay nu dyay o e mangena, lag gfanmangena ya.

²⁸ Ay dewa katanya, dewa o nafanmangena bunwa asalanan. Ay anggan sik baguina dewa nafanmangama bunwa asalanan. Dewa katanya, nu ndadwa am, gdalan ban am ngayuk fagidapun, ay ku fakaylatun nu gsaruy am takatanya.

²⁹ Ku ngay faduksay, ku longan at masuad fia te, munakbang wan at fakatabuan fag ngay menit. Nu katanya, siginan katsi, at ke mangena katai nu yud e mangena,

³⁰ ay nusnga sinu tagwayway katai nu yud gwayway, ay taguseganan katai nu yud guseganan, ay tagbayad katai nu yud e ramraman,

³¹ ay nusnga sinu at ke fagagbilugun nusnge wain ste swa daga, katai at yud e fagagbilugun. Aroro fagayu nusnge wain ste swa daga e fakatabuan way.

³² Ku fakaylatun nu ddi am e fagafanawaun. Sik mangama yud e mangena at fagamatanganun sa tua baliwa tam Fun, aroro kanya kaylat gfauseganan tam Fun.

³³ Ay at ke mangena fag mangama at fagamatanganun sa way baliwa tagste swa daga, aroro kaylat gfauseganan at mangena.

³⁴ Aroro katanya, at amatanganan ankafud. Ay sik mangena at yud e mangama ay anggan sik baguina at fagamatanganun sa tua baliwa tam fun. Ay dewa katanya, sik mangena at ke mangama, at fagamatanganun sa way baliwa at mangama, aroro kaylat gfauseganan at mangama.

³⁵ Ku fagnalongun sa ayu katanya laman ggubuk au ayu. Ay kwa gsalag nu kadadwa am. Ku fakaylatun laman masine tua nu gbanwan am, ay di e gsalag nu gfaning am tam Fun.

³⁶ Sik baguama at fakamulun nu dway matuyan ya aroro maksvn nu ganamataladanun at famangenan, ay kanya nu kaylat wan nangadadwa, at masine adadwai wan. Takatanya bunwa asalanan.

³⁷ Dewa katanya, kanya fag mangama nu nke amatanganan te, “Kwa nangadadwa ya sa ku famangenan, ay kwa ban gfanmangena ya,” takatanya at algan masine, kanya nu mafaragang tua at bilug fakaylatun.

³⁸ Kanya masine nu gfanmangena, ay amasine yap nu ddi gfanmangena ya.

³⁹ Sik mangena lag gubun at mangama kaduge gleleg. Ay dewa katanya at mangama nu nbul wan, kafag mangena masine wa gdog gfanmangama sas nusnga sinu at fakaylatun, nu sa tua sik tagafanud.

⁴⁰ Nu sa angku ku amatanganan kaugat yay nu masine at yud gdog ya gfanmangama. Ay nu gamatangan au, si yangay angku Dius at Masine fag Falad.