1 Kurintu 4 - Fanawbuid tagsibaliwas Fakayabian

Ngay Nasugu at Fakamulun

¹ Masine nu gamatangan am te, ami, Isus waymi at fagsuguan, ay sik fagfatigwanan laman gfoyung Dius at ngay longan at masuksukan.

² Ay sik fagfatigwanan matuyani tua fia nu gfakamulun at fanambagun.

³ Kwa kauri dewa am gamatangan te, ku fakamulun mauri way, ay anggan tibak taw dewa katanya at amatanganan, nustua kwa gamatangan nu sa way ku sadili.

⁴ Ay kin, matuyan tua ku amatanganan. Dewa katanya bunwa te, kwe asalanan. Tam Fun wan tagsaful sabaliwa angku.

⁵ Nu katanya, kaduge tam Fun yud andasug, lag am gamatangan te, sik taw masine ay mauri. Tam Fun waban tagfasure fagayu nusnge wain at masuksukan sisad dulum ay anggan at masuksukan si sik taw at amatanganan. Ay ginanya ban fag menit, galay at sadi gbul famauseganan siginans Dius.

⁶ Ku ngay faduksay, ami Apulus ay fagfaningan laman e tungkul tuam, ay sumaful am at masuad sik faydayuanan te, “Lag glangfe at Rirukan.” Ay laman nusnga sinu am wam e kamatungudun te, ami fag ngay nasugu at sadi gtungud tua em iba.

⁷ Setain nu malong am te, gtungud tuam ay iba? O nunda bunwa tam Dius at nafon sa ayu fagayu nusnge wain? Nu katanya, wain ay fakamatungudunun te, siginan way ayu takatanya fagayu?

⁸ Gamatangan am te, fagayu ay fakaylatun siwa ayu, ay anramraman wam, ay ansik ngay fun sis Dius at fagfagtainanan, ay ami fag ngay nasugu, wami kataip ya sa ayu. Nangus sik fun wam fia ay namasfuan ami ayu nanfunan!

⁹ Ay gamatangan au te, Dius nafakata nu yud e tungkul emi fag ngay nasugu sa sangay taw. Kata ami sik nafalganan fag fagnamabulun, ay sik mafalingun ami sas fagayu awatan, sa sangay tagbarita ay sa sangay taw at daga salubangan.

¹⁰ Aroro gfaning ami tam Fun Isus, ansik ngay yud mamatanganan ami, ay ansik ngay mamatanganan am sabaliwa tam Fun Isus. Ay mamomuy ami, ay am mabitsug tuam. Ay am wan ngay taw at fagfausegananun ay ami gafalingunan waymi!

¹¹ Dasug katsi kalunus ami, ay kadanum, ay em lanbung marasrasan way, ay e gfaidapan emi, ay wami e bale.

¹² Ay gfakamulun ami laman e fakonun tuami. Ay gdarangin ami ngay taw tagfauri emi. Ay gagwanta ami nu e gfaidapan emi.

¹³ Masine tua em famalus sa tagfalingun emi. Ay dasug katsi, kata waymi sik nakaurian.

¹⁴ Ku fagnarirukun takatatuy kwa namapla ayu, nu bunway gfararang kway sa ayu, aroro am wan ku fakesugun ku ngay sisian.

¹⁵ Ay dewa ro safuluk libu ay takamoyung sabaliwa tam Fun Isus, sadi way ay mama sas fagafanudun. Ay aroro sa tam Fun Isus, au wan ay mama sas fagafanudun siginan nu gfoyung au sa ayu at Masine fag Barita.

¹⁶ Maksvn nu glong au sa ayu te, faningi ku ugali.

¹⁷ Kanya wan ku fagnasuguun sanya Timuteu, ku fakesugun ku sisian ay at matuyan sa tam Fun. Kanya ban tagfamatang ayu sabaliwa ku ugali siginan ku fagmasadiun sa tam Fun Isus, ay katanya yangay fag ugali ku nafoyung sas fagayu tagafanud nusnga nday fag furuan.

¹⁸ Ay tibak taw sanya kamatungudun aroro gamatangan te, kwa ban kadasug ya sanya.

¹⁹ Dewa katanya, tam Fun nu kaylat, wa ban glugo ya kadasug kban sanya, ay nanlag kban te, o kafag ngay taw takamatungudun e fagmafakamulunun.

²⁰ Aroro nasaful tua tam te, Dius nu gfagtainan sik taw, bundi siginan kafag taw at longan, nu bunway siginan yangay at fakamulun.

²¹ Nataw ay fakaylatun? O nu kadasug au sanya e buba au famalang, o mannga nu kadasug au sa ayu, malukme tua ku amatanganan ay kesug au ayu?