1 Kurintu 16 - Fanawbuid tagsibaliwas Fakayabian

Fanggubukun sa sangay Tagafanud sis Uda

¹ Ay nu saman baliwa ay fanggubukun sa tam ngay faduksay sas talun Udea, fakamuluni kata ku suguan sa sangay furuan sis Galasya.

² Fasadik menit kayu linggu, galay am at sadi fasamani wan ay fanggubukun kafanud ay fagmakatuun, ay nu gfaful am, lag gfanya ya gina au ndasug sanya.

³ Ay nu ndasug kban sanya, gsugu kban ay nafili at namuba ay fanggubukun sas Erusalem, ay gfabuba kban ku rirukan tagfatoglag anya fagayu.

⁴ Ay nu au waban at sadi at namosuk, gtaban kban ay nafili fag ngay taw.

Pablu at Algan

⁵ Ay gina kban siginans talun Masidunya, ku algan nandalan au sa ayu.

⁶ Ay ngaduge ban nu magamut au si ayu. Malgau sanya waban nu gfalangfe au abagat, laman ban ggubuk am angku sa ku ngay fagayudanun gina au gfataglayun glao nusnga nday kban.

⁷ Ay kwa kaylat nu nandalan au lang sanya. Ay tam Fun nu kaylat, gbanwan kban sirut magamut ayu.

⁸ Ay ku algan gbanwan kyay ban sis furuan Efesu yakmay ban andasug Pentekustes fag fagmafulun.

⁹ Aroro umke buknga au gfakamulun ku fakamulun ste, dewa ngayu tagsalag angku.

¹⁰ Ay Timuteu nu ndasug sanya, gubuki fia anya laman umke fagmanabayanun tua sat amatanganan. Aroro kanya gfakamulun yangay kata angku laman sa tam Fun.

¹¹ Dangay am gfalingun anya, nu bunway gubuki tua laman mabayan tua nu kafoli stae sa angku, aroro gfanya au anya gadgaloan tiba ya tam faduksay.

¹² Ay nu saman tam faduksay Apulus, naet au sa anya te, nansiboi ayu sanya gadgaloan tiba tam faduksay. Dewa katanya, kanya fagayu ya manansibo ayu, gfanya yay sik buknga.

At Fakatabuan at Longan

¹³ Mafalganani tua ay maksvni ay fagafanudun, magarasi tua ay mabakvdi.

¹⁴ Fagayu ay fagnamakamulunun fakamuluni at ke fakesugun.

¹⁵ Nasaful wam Estefanas fag bale taguna gafanud sis talun Akaya, kanya mafalganan tua nu ggubuk tibak tagafanud. Ku ngay faduksay, maksvn nu glong au sa ayu te,

¹⁶ faningi tua takata kanya fag ngay taw, ay tiba yak taw takata anya taginlufuyan gfakamulun.

¹⁷ Guseganan au Estefanas, ay Furtunatu ay Akaiku at nadasugan, aroro nafakamulun ay nayud nakatu fag fakamulun laman sa angku.

¹⁸ Kanya fag tulu nafasun tua angku ay anggan ayu. Esugi fia takatanya fag ngay taw.

¹⁹ Ay fagayu tam faduksay sis Asya glong ayu te, O manabayan tuam? Ay anggan Akila ay Prisila ay tiba yak tagafanud at nangaful gugat sit bale takata yangay ayu at kinsadi sa tam Fun Isus, glong yangay te, O manabayan tuam?

²⁰ Ay anggan fagayu tam ngay faduksay tagste glong ayu te, O manabayan tuam? Adkafanyuani tua sas galay am at sadi.

²¹ Au Pablu at nariruk tuy fag longan.

²² Fagumfaurianan ban nusnga sinu fag taw at yud kesug tam Fun. Em Fun, adasugi wa nangus.

²³ Sumawa nangus fia ayu tam Fun Isus at fagmagalangun.

²⁴ Kesug au ayu fagayu am ku ngay faduksay sa tam Fun Isus. Anud.